Рэгіёны Бразіліі

У наш час Бразілія падраздзяляецца на 5 рэгіёнаў (званых таксама макрарэгіёнамі). Гэты падзел быў уведзены Бразільскім інстытутам геаграфіі і статыстыкі на падставе агульных прыродных, культурных, эканамічных, гістарычных і сацыяльных умоў у штатах, якія ўваходзяць у гэтыя рэгіёны.

1 — Цэнтральна-заходні рэгіён
2 — Паўночна-ўсходні рэгіён
3 — Паўночны рэгіён
4 — Паўднёва-ўсходні рэгіён
5 — Паўднёвы рэгіён

Нягледзячы на некаторую ўмоўнасць і невысокую дакладнасць з навуковага пункта гледжання, гэты падзел выкарыстоўваецца ў афіцыйных даных, і таму мае досыць шырокае распаўсюджанне.

Параўнальная табліца

Назва	Насельніцтва, млн чал. (2009)	Плошча, тыс. км²	Найбуйнейшы горад (з прыгарадамі)	Склад
Цэнтральна-заходні рэгіён	13,6	1612	Бразілія	Федэральная акруга і 3 штата: Гаяс, Мату-Гросу, Мату-Гросу-ду-Сул
Паўночна-ўсходні рэгіён	53,5	1561	Рэсіфі	9 штатаў: Алагоас, Баія, Мараньян, Параіба, Пернамбуку, Піяўі, Рыу-Гранды-ду-Норты, Сеара, Сержыпі
Паўночны рэгіён	15,8	3870	Манаус	7 штатаў: Акры, Амазонас, Амапа, Пара, Рандонія, Рарайма, Такантынс
Паўднёва-ўсходні рэгіён	80,7	927	Сан-Паўлу	4 штата: Мінас-Жэрайс, Рыа-дэ-Жанэйра, Сан-Паўлу, Эспірыту-Санту
Паўднёвы рэгіён	27,3	577	Порту-Алегры	3 штата: Парана, Санта-Катарына, Рыу-Гранды-ду-Сул

Цэнтральна-заходні рэгіён

Асноўны артыкул: Цэнтральна-заходні рэгіён

Другі па плошчы рэгіён Бразіліі. Кліматычныя зоны ад саван да тропікаў. Шчыльнасць насельніцтва нізкая, асноўны занятак жыхароў — сельская гаспадарка (соя), а таксама жывёлагадоўля. У гэтым рэгіёне размешчана сталіца — Бразілія.

Паўночна-усходні рэгіён

Асноўны артыкул: Паўночна-ўсходні рэгіён

Клімат ад трапічнага да засушлівага, доўгая лінія ўзбярэжжа. Шчыльнасць насельніцтва высокая, другі па колькасці сярод рэгіёнаў. З'яўляецца курортным цэнтрам, таму асноўны занятак насельніцтва — турыстычны сэрвіс. Апроч гэтага — машынабудаванне, вытворчасць тэкстылю, вырошчванне какава.

Паўночны рэгіён

Асноўны артыкул: Паўночны рэгіён

Самы вялікі па плошчы сярод рэгіёнаў. Клімат экватарыяльны, высокая тэмпература і вялікая колькасць ападкаў. Шчыльнасць насельніцтва вельмі нізкая. Асноўныя галіны эканомікі — металургія, энергетыка, вытворчасць электронікі і каўчуку.

Паўднёва-ўсходні рэгіён

Асноўны артыкул: Паўднёва-ўсходні рэгіён

Па плошчы рэгіён параўнальна невялікі, але ў гэтым рэгіёне пражывае амаль палова насельніцтва краіны, таму шчыльнасць насельніцтва вельмі высокая. Клімат ад трапічнага да ўмеранага. У гэтым рэгіёне сканцэнтраваны найбуйнейшыя гарады і прамысловыя прадпрыемствы. Паўднёвы ўсход з'яўляецца дзелавым цэнтрам Бразіліі.

Паўднёвы рэгіён

Асноўны артыкул: Паўднёвы рэгіён

Самы маленькі па плошчы рэгіён, шчыльнасць насельніцтва высокая. Клімат ад трапічнага да ўмеранага. Галіны эканомікі — машынабудаванне, энергетыка, вырошчванне садавіны.