Свята-Мікалаеўская царква (Азярніца)

Свята-Мікалаеўская царква — праваслаўны храм на ўскраіне в. Азярніцы, Слонімскага раёна. Помнік архітэктуры сінадальнага кірунку рэтраспектыўна-рускага стылю.

Царква
Свята-Мікалаеўская царква
53°04′22,81″ пн. ш. 25°00′34,41″ у. д.HGЯO
Краіна	Беларусь
Вёска	Азярніца
Канфесія	Беларуская праваслаўная царква
Епархія	Гродзенская і Ваўкавыская
Архітэктурны стыль	рэтраспектыўна-рускі стыль
Дата пабудовы	1867 год
Стан	працуе
Медыяфайлы на Вікісховішчы

У паняцця ёсць і іншыя значэнні, гл. Свята-Мікалаеўская царква.

Гісторыя

Пабудавана ў 1867 г. з цэглы на сродкі казны (6654 руб.); была прыпісана да Раства-Багародзіцкай царквы вёскі Міжэвічы. У 19 стагоддзі маёнтак Азярніца належаў святару Антону Аліфяровічу.

Архітэктура

Царква з боку апсіды

Падоўжана-восевую кампазіцыю белакаменнага храма фармуюць двухярусная чатырохгранная званіца-прытвор, прасторная трапезная, папярочны аб'ём малітоўнай залы, прамавугольная апсіда. Плоскасныя фасады прарэзаны адзінарнымі і здвоенымі арачнымі вокнамі ў руставаных ліштвах. Маляўнічы сілуэт завяршаюць самкнуты сферычны купал з макаўкай над званіцай і цыбулепадобны купал на 8-гранным барабане асноўнага аб'ёму. Уваход вырашаны чатырохслуповым арачным рундуком з бочкавым кілепадобным пакрыццём. Лапідарны дэкор абмежаваны філёнгамі шырынкамі, прафіляванымі карнізамі і шырынкавымі фрызамі.

Царква акаймавана бутавай агароджай з чатырохслуповай брамай.

Літаратура

• Праваслаўныя храмы Беларусі / А.М. Кулагін, З.Э. Герасімовіч, У.П. Свентахоўскі. - Мн., БелЭн, 2007. стар. 10.

Спасылкі

• Свята-Мікалаеўская царква (Азярніца) на сайце Radzima.org
• Свята-Мікалаеўская царква (Азярніца) на сайце Глобус Беларусі (руск.)
• Свята-Мікалаеўская царква (Азярніца) на сайце Праваслаўная архітэктура Беларусі (бел.)