Сенненская партызанская брыгада

Сенненская партызанская брыгада — партызанская брыгада, створаная ў кастрычніку 1942 года ў выніку падзелу партызанскай брыгады М. П. Гудкова. Дзейнічала на акупіраванай тэрыторыі Сенненскага, Чашніцкага і Лепельскага раёнаў. У верасні 1943 года з брыгады была вылучана група (60 партызан) для арганізацыі Багушэўскай партызанскай брыгады. 26 чэрвеня 1944 года брыгада (1939 партызан; 13 атрадаў) злучылася з Чырвонай Арміяй.

Сенненская партызанская брыгада
Гады існавання	1942—1944
Краіна	Беларуская ССР
Падпарадкаванне	Беларускі штаб партызанскага руху
Тып	партызаны
Функцыя	барацьба з нямецкімі акупацыйнымі ўладамі
Колькасць	1939 партызан (26.6.1944)
Дыслакацыя	Сенненскі, Чашніцкі, Лепельскі раёны
Войны	Вялікая Айчынная вайна
Удзел у	Вялікая Айчынная вайна
Камандзіры
Вядомыя камандзіры	В. С. Лявонаў

Склад

• атрад В. А. Захарчанкі^[1];
• атрад імя Суворава^[2];
• атрад імя Хаіркізава^[3];
• атрад імя Чапаева;
• атрад А. М. Захарава;
• 6-ы атрад;
• атрад «За Радзіму»;
• атрад імя Аляксандра Неўскага;
• атрад «Смерць фашызму»;
• атрад П. Ф. Гарбачова;
• атрад імя Багдана Хмяльніцкага;
• атрад імя Кутузава;
• разведвальны атрад.

Камандаванне

Камандзір

• В. С. Лявонаў;

Камісары

• П. В. Сырцаў;
• М. Ц. Любімцаў

Начальнікі штаба

• В. Дз. Сыценка;
• І. К. Пашчанка;
• Я. З. Шарахоўскі

Гісторыя

Партызаны праводзілі дыверсіі на камунікацыях. У «рэйкавай вайне» на чыгунках Орша — Віцебск, Орша — Лепель падарвалі і папсавалі больш за 1 тысячу рэек. У снежні 1942 года разбілі нямецкія гарнізоны ў вёсцы Чарэя, у верасні — кастрычніку 1943 — у вёсках Граеўшчына, Слідцы, Закур’е, Прыдвор’е, Лукомль Чашніцкага раёна, удзельнічалі ў Лепельскай аперацыі, Лепельскім баі. У снежні 1943 — сакавіку 1944 вялі баі каля вёскі Новая Беліца Сенненскага раёна. У студзені — лютым 1944 года разбілі нямецкія гарнізоны ў вёсках Ходцы, Ладзікава, Ладынец, Крыльцова Сенненскага раёна. У час карнай экспедыцыі супраць партызан Полацка-Лепельскай зоны ў маі 1944 года разбілі нямецкія гарнізоны ў вёсках Залессе, Матырына Лепельскага раёна, у чэрвені прарвалі блакаду на шашы Лепель — Барысаў і Халопенічы — Бягомль.

Памяць

У 1975 годзе ў гонар брыгады ў вёсцы Антаполле Чашніцкага раёна была ўстаноўлена мемарыяльная дошка, у 1975 годзе ў вёсцы Чарэя Чашніцкага раёна — мемарыяльная дошка, у 1968 годзе каля вёскі Крайцы Лепельскага раёна — мемарыяльны знак.

Зноскі

1. пачаў стварацца ўвосень 1941
2. створаны ў маі 1942
3. атраду нададзена імя памочніка камандзіра брыгады К. А. Хаіркізава, які загінуў у чэрвені 1943