Уладзімір Іванавіч Хільмановіч

Уладзімір Хільмановіч (нар. 6 красавіка 1967; Каменка, Шчучынскі раён, Гродзенская вобласць) — беларускі гісторык, журналіст, праваабаронца.

Уладзімір Іванавіч Хільмановіч
Дата нараджэння	6 красавіка 1967(1967-04-06)[1] (58 гадоў)
Месца нараджэння	Каменка, Каменскі сельсавет, Шчучынскі раён, Гродзенская вобласць, Беларуская ССР, СССР
Грамадзянства	СССР  Беларусь
Род дзейнасці	журналіст, гісторык
Месца працы	Гродзенскі дзяржаўны музей гісторыі рэлігіі
Альма-матар	Гродзенскі дзяржаўны ўніверсітэт імя Янкі Купалы
Член у	Саюз беларускіх пісьменнікаў

Біяграфія

Нарадзіўся 6 красавіка 1967 гожда ў в. Каменка Шчучынскага раёна Гродзенскай вобласці. У 1984 годзе на выдатна скончыў Ракавіцкую сярэднюю школу. У 1984—1991 гадах вучыўся на гістарычным факультэце Гродзенскага дзяржаўнага ўніверсітэта імя Янкі Купалы. Паводле адукацыі — гісторык, выкладчык сацыяльна-палітычных дысцыплін. З чэрвеня 1985 года да чэрвеня 1987 года служыў у савецкай арміі.

У 1991—1998 гадах працаваў настаўнікам у СШ № 20 Гродна, навуковым супрацоўнікам Беларускага дзяржаўнага музея гісторыі рэлігіі і метадыстам Гісторыка-мемарыяльнага цэнтра аддзелу культуры Гродзенскага гарвыканкама. У 1998 г. скончыў аспірантуру пры кафедры тэорыі і гісторыі беларускай культуры Гродзенскага дзяржаўнага ўніверсітэта (спецыялізацыя — канфесійная гісторыя). У 1997—1998 гг. працаваў на Гродзенскім абласным тэлебачанні.

Аўтар і распрацоўшчык, кіраўнік шэрагу адукацыйных праектаў, сурэдактар серыі брашур для настаўнікаў «Праз адукацыю — да грамадзянскай супольнасці» (выйшла 10 кніг, Шчэцін, 2001—2006), адзін з аўтараў і рэдактараў кнігі «Białoruskie wędrówki», аўтар шматлікіх аналітычных публікацый. Актыўны дзеяч грамадска-палітычнага руху з 1987 года. Адзін з заснавальнікаў першай у Заходняй Беларусі моладзевай грамадскай арганізацыі «Заходне-Беларускае згуртаванне моладзі» (1989). Стаяў ля вытокаў стварэння Гродзенскай асацыяцыі маладых вучоных «Віт» (1995), Гродзенскага рэгіянальнага цэнтра інфармацыйнай падтрымкі грамадскіх ініцыятыў «Трэці сектар» (1996), адзін з ініцыятараў стварэння Беларускага краязнаўчага таварыства імя Тодара Нарбута і іншае.

У 2000—2003 гадах — намеснік старшыні Гродзенскай гарадской арганізацыі БАЖ. Член ГА Беларуская асацыяцыя журналістаў, Міжнароднай асацыяцыі журналістаў і Асацыяцыі спартыўнай прэсы Рэспублікі Беларусь. Друкаваўся ў газетах «Літаратура і мастацтва», «Гродзенская праўда», «Футбол Беларуси», «Прессбол», «Пагоня» (цягам 9 гадоў), «Наша Ніва», «Биржа информации» і іншых. Быў сувыдаўцом інфармацыйна-аналітычнага бюлетэня «Свой Лад» (2002—2004). З 2004 года стала друкуецца ў беластоцкай газеце «Ніва» і на інтэрнэт-сайтах. Аўтар Беларускага календара-даведніка (Вільня, 2007)^[2].

З чэрвеня 2008 года вядзе перадачы «Беларускае золата», «Імёны Гародні» і «Краязнаўчыя кропкі» на радыё «Рацыя» (Беласток)^[3].

Выдаў футбольны даведнік, дзе апісаныя ўсе галы і пенальці чэмпіянатаў свету (1930—2010) і Еўропы (1960—2012)^[4].

Уладзімір Хільмановіч — адзін з пераможцаў конкурсу БАЖ «Абяры жыццё»^[5].

З чэрвеня 2015 г. член Саюза беларускіх пісьменнікаў^[6].

Суаўтар «Календара Слонімшчыны»(2018)^[7].

З 2002 года — сябра праваабарончага цэнтру «Вясна».

19 жніўня 2024 года Хільмановічу завочна прысудзілі пяць гадоў калоніі ўзмоцненага рэжыму і вялізны штраф па экстрэмісцкіх артыкулах^[8].

Бібліяграфія

• Палітычная сцэна Беларусі: гарадзенскія грамадскія рухі і супольнасці / Пшэмыслаў Фенрых. — Шчэцін: Фонд імя Льва Сапегі, 2002. — 68 с. — (Праз адукацыю – да грамадзянскай супольнасці). — ISBN 83-88044-26-5. Архівавана 5 сакавіка 2016.
• Беларускі каляндар-даведнік на кожны дзень. — Вільня: Гудас, 2007. — 184 с. — 300 экз. — ISBN 998-6952-02-2. Архівавана 19 жніўня 2014.
• Беларускае золата. — Беласток: СЕОРВ, 2014. — 248 с. — ISBN 978-83-930408-7-2

Зноскі

1. Library of Congress Authorities — Library of Congress. Праверана 29 ліпеня 2025.

   <a href='https://wikidata.org/wiki/Track:Q13219454'></a><a href='https://wikidata.org/wiki/Track:Q131454'></a>
2. Сяргей Астраўцоў. Беларускі каляндар на кожны дзень (нявызн.). Грамадства. Беларуская служба Радыё «Свабода» (1 студзеня 2013).
3. Хільмановіч Уладзімір профіль на Kamunikat.org
4. Уладзімір Хільмановіч: “Для мяне футбольная статыстыка — як паэзія” (нявызн.). Будзьма беларусамі!.
5. Уладзімір Хільмановіч — адзін з пераможцаў конкурсу БАЖ «Абяры жыццё» (нявызн.). Праваабарончы цэнтр «Вясна».
6. Зрілість Хільмановіча
7. У Слоніме прэзентавалі «Каляндар Слонімшчыны» (нявызн.)(недаступная спасылка). Газета Слонімская. Архівавана з першакрыніцы 30 студзеня 2023.
8. Хронікі рэпрэсій, 21 жніўня. Чатырох берасцейцаў пазбавілі волі за ўдзел у пратэстах у 2020 годзе (нявызн.). Новы Час.