Фёдар Ільіч Афанасьеў

Фёдар Ільіч Афанасьеў (1854 — ?) — рускі інжынер і архітэктар, які працаваў на тэрыторыі Беларусі і Украіны, гродзенскі губернскі архітэктар (1877—1885).

Фёдар Ільіч Афанасьеў
Дата нараджэння	1854
Дата смерці	невядома
Альма-матар	Санкт-Пецярбургскі дзяржаўны архітэктурна-будаўнічы ўніверсітэт
Медыяфайлы на Вікісховішчы

У Вікіпедыі ёсць артыкулы пра іншых людзей з прозвішчам Афанасьеў.

Біяграфія

Нарадзіўся ў 1854 годзе^[1]. Паступіў у Пецярбургскае будаўнічае вучылішча ў 1871 годзе і пры выпуску ў 1876 годзе атрымаў званне грамадзянскага інжынера і чын X класа. Тады ж прылічаны да Міністэрства ўнутраных спраў з адкамандзіраваннем для заняткаў у Тэхнічна-будаўнічы камітэт  (руск.)^[1].

У хуткім часе быў прызначаны малодшым архітэктарам у Гродна, пазней быў там губернскім архітэктарам, а потым перавёўся ў Жытомір. Тут служыў некаторы час у будаўнічым аддзяленні валынскага губернскага праўлення^[1].

Творчасць

Царква Святога Міхаіла Арханёла ў Навасёлках.

Царква Прападобнай Параскевы Сербскай у Балаце.

Найбольш бачная тэхнічная дзейнасць Фёдара Афанасьева датычыцца часу яго працы на пасадзе епархіяльнага архітэктара Валынскай губерні, дзе ён пабудаваў шмат царкоўных і іншага роду пабудоў^[1].

Праекты

• Выканаўца работ па рамонце Свята-Пакроўскай царквы ў вёсцы Харашэвічы Слонімскага павета (1879) — не захавалася^[2].
• Нагляд за аднаўленнем згарэлай Свята-Пакроўскай царквы ў мястэчку Лыскаве Ваўкавыскага павета (1881)^[3] — не захавалася.
• Праект драўлянай царквы ў вёсцы Зубачы Пружанскага павета (1880) — не захавалася.
• Праект драўлянай царквы ў вёсцы Мала-Ельня^[d] Брэсцкага павета (14 снежня 1879) — не захавалася^[4].
• Праект драўлянай царквы ў імя пакутніц Веры, Надзеі, Любові і Сафіі ў вёсцы Страдзеч Брэсцкага павета (1880) — не захавалася^[5].
• Праект іканастаса для Свята-Мікалаеўскай царквы ў вёсцы Самуйлавічы Дольныя Ваўкавыскага павета (13 кастрычніка 1881)^[6].
• Праект перабудовы касцёла Найсвяцейшай Тройцы ў праваслаўную царкву ў мястэчку Лыскаве Ваўкавыскага павета (1881)^[7].
• Праект Свята-Міхайлаўскай царквы ў вёсцы Навасёлках Кобрынскага павета (29 студзеня 1880)^[8]
• Праект царквы Прападобнай Параскевы Сербскай у вёсцы Балаце Кобрынскага павета (27 сакавіка 1880)^[9].