Флор Данатавіч Манцэвіч

У Вікіпедыі ёсць артыкулы пра іншых людзей з прозвішчам Манцэвіч.

Флор Данатавіч Манцэвіч, у некаторых крыніцах Фларыян (30 жніўня 1890, вёска Іказнь, Браслаўскі раён Віцебскай вобласці— 30 ліпеня 1941, Полацк) — беларускі педагог, грамадскі дзеяч.

Старонкі пашпарта Флора Манцэвіча. 1940 год

Флор Данатавіч Манцэвіч
Род дзейнасці	настаўнік, грамадскі дзеяч
Дата нараджэння	30 жніўня 1890(1890-08-30)
Месца нараджэння	Іказнь, Дзісенскі павет, Віленская губерня, Расійская імперыя
Дата смерці	30 ліпеня 1941(1941-07-30) (50 гадоў)
Месца смерці	Полацк, Віцебская вобласць, Беларуская ССР, СССР
Грамадзянства	СССР  Расійская імперыя  Польшча
Бацька	Данат Паўлавіч
Маці	Алена Паўлаўна
Жонка	Аляксандра Міхайлаўна Манцэвіч (Герасімава)
Дзеці	Барыс Флоравіч Манцэвіч
Альма-матар	Полацкая настаўніцкая семінарыя (1910)
Член у	Таварыства беларускай школы

Біяграфія

Нарадзіўся ў сялянскай сям’і. Бацька — удзельнік паўстання 1863 года. Скончыў Полацкую настаўніцкую семінарыю (1910). Настаўнічаў у Дзвінскім павеце Віцебскай губерні.

Збіраў беларускі песенны і музычны фальклор, займаўся музыкай, дасылаў карэспандэнцыі ў газету «Наша Ніва» (псеўданім Якім Пярэчка). У іх абараняў годнасць селяніна, выступаў супраць нацыянальнага прыгнёту.

У Першую сусветную вайну санітар пры шпіталях.

Ад 1917 года ўдзельнічаў у арганізацыі школьнага навучання на радзіме, з 1923 года настаўнік у польскай пачатковай школе на Браслаўшчыне і Міёршчыне. Выступаў за адкрыццё беларускіх школ у Заходняй Беларусі.

Член Таварыства беларускай школы.

Першы настаўнік народнага артыста СССР Генадзя Іванавіча Цітовіча.^[1][2]

З далучэннем Заходняй Беларусі да БССР удзельнічаў у стварэнні новай сістэмы народнай адукацыі. У Друі ўзначальваў курсы па перападрыхтоўцы настаўнікаў беларускіх школ, працаваў настаўнікам у вёсцы Малая Кавалеўшчына Міёрскага раёна.

Дэпутат Народнага сходу Заходняй Беларусі (28.—30.10.1939, Беласток), член яго Паўнамоцнай камісіі для прадастаўлення Дэкларацыі аб уваходжанні Заходняй Беларусі ў БССР на 5-ю нечарговую сесію Вярхоўнага Савета СССР. Дакладчык на сходзе па пытанні «Аб уваходжанні Заходняй Беларусі ў склад Беларускай ССР».

У пачатку нацысцкай (нямецкай) акупацыі Беларусі па даносе арыштаваны гітлераўцамі і пасля катаванняў расстраляны. Дакладнае месца смерці і пахавання невядомыя, ёсць не пацверджаныя звесткі, што загінуў у Полацку.

Зноскі

1. Г.И.Цитович. Мой первый учитель // Люди Нарочанского края. Воспоминания участников революционной борьбы и Великой Отечественной войны. — Мн.: Беларусь, 1975. — С. 94-101. — 592 с. — 75 000 экз.
2. Страницы истории Архівавана 4 лютага 2016. (руск.) // Сайт Мёрскага райвыканкама