Provespa

Provespa é un xénero de insectos himenópteros da suborde dos apócritos, superfamilia dos vespoideos, familia dos véspidos, unha das comprendidas na subfamilia dos vespinos.

Provespa
Provespa sp.
Clasificación científica
Reino: Animalia Filo: Arthropoda Clase: Insecta Orde: Hymenoptera Suborde: Apocrita Superfamilia: Vespoidea Familia: Vespidae Subfamilia: Vespinae Xénero: Provespa Ashmead, 1903
Especies
Véxase o texto

Dos catro xéneros que constitúen a subfamilia dos vespinos, Vespa, Provespa, Dolichovespula e Vespula, os dous primeiros contrastan notabelmente cos dous últimos porque mostran hábitos máis especializados e son principalmente habitantes da Rexión Indomalaia ou Oriental.^[1]

O xénero Provespa comprende catro especies, unha delas extinta, coñecidas vulgarmente como avespas nocturnas.

Taxonomía

Descrición

O xénero foi descrito en 1903 polo entomólogo estadounidense William Harris Ashmead,^[2] nun traballo publicado en Entomogical News, 14: 182.^[3]

Etimoloxía

O nome científico Provespa está formado polos elemenros Pro- e -vespa. O primeiro está tirado da preposición latina pro, "diante de", e o segundo do xénero Vespa. Literalmente, "as avespas antecesoras das do xénero Vespa".

Especies

O xénero comprende na actualidade as tres especies seguintes:^[3]

• Provespa anomala (Saussure, 1854)
• Provespa barthelemyi (Buysson, 1905)
• Provespa nocturna Vecht, 1935

Ademais, está descrita unha especie extinta:^[3]

• † Provespa nobilis Zhang et al., 1994

Características

As especies de Provespula son os únicos membros nocturnos da subfamilia dos vespinos, e tamén os únicos vespinos onde se forman novas colonias por pululación (unha raíña á que acoden un gran número de obreiras, de modo semellante ao das abellas melíferas).^[4]

Tenden a construír os niños a partir de material vexetal fibroso, o que os fai tomar unha cor marrón agrisada uniforme, polo que adoitan ser difíciles de localizar.