Bacillus

Bacillus er ættkvísl Gram-jákvæðra, staflaga gerla innan ættarinnar Bacillaceae. Þeir eru ýmist nauðháð eða valfrjálst loftsæknir, katalasa-jákvæðir og geta myndað dvalargró. Þeir finnast víða í náttúrunni, eru til dæmis algengir í jarðvegi.

Bacillaceae
Gram-litaðir Bacillus subtilis gerlar
Vísindaleg flokkun
Ríki: Bacteria Fylking: Firmicutes Flokkur: Bacilli Ættbálkur: Bacillales Ætt: Bacillaceae Ættkvísl: Bacillus Cohn 1872
Tegundir
Fjölmargar tegundir tilheyra Bacillus, þeirra á meðal eru: B. alvei Cheshire & Cheyne 1885 B. amyloliquefaciens Fukumoto 1943 B. anthracis Cohn 1872 B. cereus Frankland & Frankland 1887 B. circulans Jordan 1890 B. coagulans Hammer 1915 B. larvae White 1906 B. laterosporus Laubach 1916 B. megaterium de Bary 1884 B. natto Ehrenberg 1835 B. polymyxa (Prazmowski 1880) Macé 1889 B. pumilus Meyer & Gottheil 1901 B. sphaericus Meyer and Neide 1904 B. sporothermodurans Pettersson et al. 1996 B. stearothermophilus Donk 1920 B. subtilis (Ehrenberg 1835) Cohn 1872 B. thuringiensis Berliner 1915

Vistfræði

Meðlimir Bacillus ættkvíslarinnar búa yfir fjölbreyttum efnaskiptum og fá því þrifist í ýmiss konar umhverfi. Þeir eru algengir í jarðvegi, þar sem þeir taka þátt í niðurbroti plöntu- og dýraleifa, en margar Bacillus tegundir seyta meltingarensímum út í umhverfið sem brjóta niður fjölsykrur, prótín og aðrar lífrænar fjölliður. Margar tegundir ættkvíslarinnar, svo sem hin vel þekkta B. subtilis, finnast í miklu magni í rótarhveli plantna sem nýta sér þau næringarefni sem falla til við starfsemi gerilsins. Sumar tegundirnar, svo sem B. azotofixans^[1] og B. pumilus^[2], eru færar um að binda köfnunarefni andrúmsloftsins og mynda ammoníumsölt sem plöntur geta nýtt sér. Aðrar Bacillus tegundir, svo sem B. thuringiensis, B. anthracis og B. cereus eru sýklar manna, dýra eða plantna.

Saga

Bacillus er meðal best þekktu ættkvísla örverufræðanna, en Ferdinand Cohn skilgreindi hana fyrstur manna árið 1872.^[3] Rannsóknasaga þessara gerla er þó enn lengri, því tegund sú sem Cohn nefndi B. subtilis hafði þá um nokkurt skeið verið til rannsóknar hjá hinum þekkta náttúrufræðingi og smásjárskoðanda Christian Ehrenberg sem nefndi hana Vibrio subtilis þegar árið 1835.^[4]