Li Qiang

Li Qiang (kínverska: 李强; pinyin: Lǐ Qiáng; f. 23. júlí 1959) er kínverskur stjórnmálamaður og áttundi og núverandi forsætisráðherra Alþýðulýðveldisins Kína frá mars 2023. Hann hefur verið næstæðsti meðlimurinn í fastanefnd stjórnmálanefndar kínverska kommúnistaflokksins frá október 2022. Hann var áður flokksritari Kommúnistaflokksins í Sjanghaí frá 2017 til 2022, flokksritari í Jiangsu-héraði frá 2016 til 2017 og héraðsstjóri Zhejiang frá 2012 til 2016.

Þetta er kínverskt nafn: kenni- eða fjölskyldunafnið er Li, eiginnafnið er Qiang.

Li Qiang
李强
Li Qiang árið 2024.
Forsætisráðherra Alþýðulýðveldisins Kína
Núverandi
Tók við embætti 11. mars 2023
Forseti	Xi Jinping
Forveri	Li Keqiang
Persónulegar upplýsingar
Fæddur	23. júlí 1959 (1959-07-23) (65 ára) Rui'an, Zhejiang, Kína
Stjórnmálaflokkur	Kommúnistaflokkur Kína
Háskóli	Zhejiang Wanli-háskóli Zhejiang-háskóli Flokksskóli kínverska kommúnistaflokksins Fjöltækniháskólinn í Hong Kong
Starf	Stjórnmálamaður

Li gekk í Kommúnistaflokkinn árið 1983 og varð ritari ungliðahreyfingar flokksins í Rui'an, Zhejiang. Hann vann síðar hjá borgaramáladeild héraðsins og varð flokksritari í Yong Kang í Wenzhou, ritari stjórnmála- og lagamálefna í Zhejiang og síðan aðstoðarflokksritari héraðsins. Hann varð héraðsstjóri Zhejiang árið 2012, flokksritari Jiangsu-héraðs árið 2016 og loksins flokksritari í Sjanghaí árið 2017. Sama ár hlaut Li sæti í stjórnmálanefnd kommúnistaflokksins.

Í stjórnartíð sinni í Sjanghaí lét Li opna STAR Market-kauphöllina, hafði umsjón með erlendum fjárfestingum í borginni eins og byggingu risaverksmiðju Tesla, Inc., auðveldaði innlendum innflytjendum að öðlast dvalarleyfi í borginni og lét byggja fimm nýja bæi til að bæta úr skorti á byggðarlandi. Hann skipaði jafnframt tveggja mánaða útgöngubann í Sjanghaí árið 2022 vegna kórónuveirufaraldursins, sem hafði mjög neikvæð áhrif á efnahag borgarinnar og hefur sætt gagnrýni.^[1] Li hlaut engu að síður stöðuhækkun til fastanefndar stjórnmálanefndarinnar síðar á árinu 2022 og varð forsætisráðherra Kína árið 2023. Li hlaut nánast öll 2.900 at­kvæðin á flokksþingi Kommúnistaflokksins.^[2]

Li hefur unnið ásamt núverandi aðalritara Kommúnistaflokksins, Xi Jinping, í Zhejiang og er álitinn náinn bandamaður Xis.^[3] Þrátt fyrir að vera náinn Xi er Li almennt talinn hlynntur viðskiptafrelsi.