ព្រះរាជដំណាក់

ព្រះរាជដំណាក់ គឺជាព្រះបរមរាជវាំងដែលមានទីតាំងស្ថិតនៅក្នុងខេត្តសៀមរាប ព្រះរាជាណាចក្រកម្ពុជា។^[១]ព្រះរាជដំណាក់គឺជាទីកន្លែងស្នាក់នៅផ្លូវការនិងបណ្ដោះអាសន្នរបស់ព្រះមហាក្សត្រនៃព្រះរាជាណាចក្រកម្ពុជានៅពេលដែលព្រះអង្គយាងមកកាន់ខេត្តសៀមរាបទឹកដីអង្គរ។^[២]

ព្រះរាជដំណាក់
ព្រះបរមរាជវាំង
ទិដ្ឋភាពភាពនៃព្រះរាជដំណាក់
ព័ត៌មានទូទៅ
រចនាបទស្ថាបត្យកម្ម	ខ្មែរ
ទីតាំង	ផ្លូវជាតិលេខ ០៦ សង្កាត់ស្វាយដង្គំ ក្រុងសៀមរាប ខេត្តសៀមរាប
កូអ័រដោណេ	13°21′42″N 103°51′32″E

ប្រវត្តិសាស្ត្រ

យោងតាមមន្ទីរព័ត៌មានខេត្តសៀមរាបព្រះរាជដំណាក់ត្រូវបានកសាងឡើងនៅក្នុងឆ្នាំ ១៩០៤។^[៣]

នៅក្នុងសម័យអាណានិគមនិយមបារាំងព្រះរាជដំណាក់បានក្លាយជាទីតាំងដ៏សំខាន់មួយសម្រាប់អតីតព្រះមហាក្សត្រគឺព្រះបាទនរោត្តម សីហនុដែលត្រូវបានគេសន្មត់ថាព្រះអង្គបានប្រើប្រាស់ព្រះរាជដំណាក់នេះដើម្បីធ្វើផែនការនិងចាប់ផ្តើមស្វះស្វែងរកសេរីភាពដើម្បីឯករាជ្យភាពរបស់ប្រទេសកម្ពុជាឲ្យរួចផុតពីការត្រួតត្រារបស់ប្រទេសបារាំងនៅក្នុងទសវត្សរ៍ឆ្នាំ ១៩៥០។^{[៤][៥][៦]}

នៅក្នុងទសវត្សរ៍ឆ្នាំ ១៩៩០ ព្រះរាជដំណាក់ត្រូវបានព្រះបាទនរោត្តម សីហនុប្រើប្រាស់ធ្វើជាម្ចាស់ផ្ទះនៃឥស្សរជននយោបាយផ្សេងៗជាចម្បងសម្រាប់កិច្ចចរចាសន្តិភាពចំពេលមានការវិវឌ្ឍនយោបាយរបស់ប្រទេសកម្ពុជារួមទាំងការជួបជាមួយនឹងនាយករដ្ឋមន្ត្រីហ៊ុន សែននិងព្រះអង្គម្ចាស់នរោត្តម រណឫទ្ធិដែលជាអ្នកនយោបាយប្រឆាំងនឹងលោកសម រង្ស៊ីនិងអ្នកការទូតបរទេស។^[៧][៨]

កាលពីថ្ងៃទី ១៨ ខែកុម្ភៈ ឆ្នាំ ២០១៧ ព្រះបាទនរោត្តម សីហមុនីបានទទួលស្វាគមន៍តារាសម្ដែងហូលីវូដគឺអ្នកស្រីអែនជេលីណា ចូលីនិងក្រុមគ្រួសារនៅព្រះរាជដំណាក់។អ្នកស្រីអែនជេលីណា ចូលីបានស្នាក់នៅក្នុងខេត្តសៀមរាបដើម្បីចូលរួមពិធីបញ្ចាំងនិងសម្ភោធជាផ្លូវការលើកដំបូងនៃខ្សែភាពយន្តរឿងមុនដំបូងខ្មែរក្រហមសម្លាប់ឪពុករបស់ខ្ញុំដែលអ្នកស្រីគឺជាអ្នកដឹកនាំខ្សែភាពយន្តនិងព្រះបាទនរោត្តម សីហមុនីគឺជាអ្នកឧបត្ថម្ភនិងគាំទ្រខ្សែភាពយន្តនេះ។^{[៩][១០]}

នៅចុងខែធ្នូ ឆ្នាំ ២០២២ ក្រសួងព្រះបរមរាជវាំងបានដំឡើងរូបសំណាកមេទ័ពខ្មែរចំនួន ១២ ធ្វើអំពីស្ពាន់ដើម្បីទុកជាអនុស្សាវរីយ៍និងរំលឹកដល់មេទ័ពខ្មែរនៅក្នុងសម័យអាណាចក្រខ្មែរ។រូបសំណាកទាំងនេះត្រូវបានបើកឲ្យសាធារណជនឃើញជាផ្លូវការនៅខាងក្រៅព្រះរាជដំណាក់ហើយមិនយូរប៉ុន្មានព្រះបាទនរោត្តម សីហមុនីបានយាងទៅពិនិត្យនិងទតមើលការដំឡើងរូបសំណាកថ្មីៗទាំងនេះផងដែរ។^{[១១][១២]}

នៅយប់ថ្ងៃទី ១២ ខែមីនា ឆ្នាំ ២០២៣ អគ្គិភ័យបានឆាបឆេះយ៉ាងសន្ធោសន្ធៅដោយសារទុស្សេចរន្តអគ្គិសនីដែលបានធ្វើឲ្យខូចខាតផ្នែកខ្លះនៃអគារព្រះបរមរាជវាំងពិសេសអគារដែលនៅជាប់គ្នាដែលជាអគារការិយាល័យរបស់ព្រះមហាក្សត្របើទោះបីជាអគារព្រះបរមរាជវាំងធំមិនមានរងផលប៉ះពាល់ក៏ដោយ។^{[១៣][១៤][១៥][១៦]}មន្ត្រី​ជំនាញបាន​សន្យា​ថា​នឹងជួសជុល​ររចនាសម្ព័ន្ធរបស់ព្រះរាជដំណាក់ឡើង​វិញ​ដោយ​ក្រុមការងារ​បាន​ចាប់​ផ្តើមជួសជុលព្រះរាជដំណាក់នេះឡើងវិញ​ហើយ​។^{[១៧][១៨]}

ព្រះរាជដំណាក់បច្ចុប្បន្ន

ក្រៅពីជាទីកន្លែងស្នាក់នៅផ្លូវការនិងបណ្ដោះអាសន្នរបស់ព្រះមហាក្សត្រខ្មែរព្រះរាជដំណាក់នៅក្នុងក្រុងសៀមរាប ខេត្តសៀមរាបក៏ជាទីតាំងទាក់ទាញភ្ញៀវទេសចរជាតិនិងអន្តរជាតិផងដែរ។បើទោះបីជាមិនអនុញ្ញាតឲ្យសាធារណជនចូលទៅក្នុងព្រះរាជដំណាក់ដោយផ្ទាល់ក៏ដោយក៏គេអាចទស្សនានិងគយគន់ទិដ្ឋភាពព្រះបរមរាជវាំងបានពីខាងក្រៅពីសួនច្បារឯករាជ្យដែលនៅជាប់គ្នាដែលជាសួនសាធារណៈបានផងដែរ។^{[១៩][២០]}នៅក្នុងបរិវេណព្រះរាជដំណាក់មានរូបសំណាកមេទ័ពទាំង ១២ និងទីសក្ការៈបូជាព្រះអង្គចេក ព្រះអង្គចមដែលជាទីកន្លែងសក្ការៈបូជារបស់ប្រជាជនខ្មែរគ្រប់រូបដែលជាពុទ្ធសាសនិកចូលទៅគោរពបូជា។^{[២១][២២][២៣]}