Marie Muller

D'Marie Muller, gebuer den 29. Juli 1985 zu Filderstadt bei Stuttgart, ass eng fréier lëtzebuergesch Judoka an duebel Olympionickin.

Marie Muller
Gebuer	29. Juli 1985 Filderstadt
Nationalitéit	Lëtzebuerg
Aktivitéit	Judoka
Gréisst	163 cm
Gewiicht	53 kg
Huet matgemaach bei	Olympesch Summerspiller 2008, Olympesch Summerspiller 2012
Famill
Papp	Charles Muller

Si huet lëtzebuergesch-däitschen Originnen: hir Mamm ass Däitsch iwwerdeems hire Papp, de fréiere Fechter a fréieren Direkter vum Escher Theater, Charles Muller, Lëtzebuerger ass.

2008, 2010 an 2012 war si Lëtzebuerger Sportlerin vum Joer. 2016 huet si wéinst Blessure mat hirer Sportscarrière opgehalen.^[1]

Den 28. September 2012 huet si sech zu Esslingen mat hirem Trainer Ralf Heiler bestuet.^[2]

Sportskarriär

D'Marie Muller huet eréischt zanter 2007 d'Lëtzebuerger Faarwe representéiert. Virdru war se (hire Papp ass Lëtzebuerger) an der däitscher Nationalekipp. No zwou schwéieren Operatiounen um Knéi an den noutgedrongene Pausen huet déi jonk Judokämpferin sech du fir d'lëtzebuergesch Formatioun decidéiert. Hir éischt international Kompetitioun fir Lëtzebuerg war bei de Spiller vun de klenge Länner 2007 zu Monaco.

Hir Participatioun bei den Olympesche Summerspiller 2008 zu Peking am Hallef-Liichtgewiicht (-52 kg) war souwuel fir d'Sportlerin wéi och de Grand-Duché eng Première. Et waren hir éischt Spiller an et war och déi éischt Kéier datt eng weiblech Judoka Lëtzebuerg bei den Olympesche Spiller vertrueden huet. D'Marie Muller hat d'Olympia-Qualifikatioun net direkt gepackt, krut awer no gudde Resultater beim Super World Cup 2008 zu Moskau nach am leschten Ament eng Wild Card fir Peking wou si déi 9. gouf.

No den Olympesche Spiller huet d'Marie Muller sech an d'Lëtzebuerger Arméi gemellt wou si vu Januar bis Abrëll 2009 hir Grondausbildung gemaach huet an duerno e spezielle Programm fir Héichleeschtungssportler absolvéiert huet. Si gouf duerno vun der Arméi fräigestallt fir sech voll hirem Training an der Kompetitioun ze konsakréieren.^[3]

Bei den Olympesche Summerspiller 2012 zu London huet si knapps eng Bronze-Medail verpasst an ass op déi 5. Plaz komm.^[4] Bei der Erëffnungsfeier huet si de lëtzebuergesche Fändel gedroen.

Hire Veräin zu Lëtzebuerg ass de JJC Bonnevoie an an Däitschland ass si am Bundesligateam vum KSV Esslingen.

2016 huet si no enger Rei Verletzunge Schluss gemaach mat hirer Sportskarriär. Duerno huet si eng Zäit an der Coque geschafft. Aktuell schafft si am Sportsdéngscht vum Prisong Ueschterhaff^[5].

Palmarès

2004

• 2. Plaz, DEM zu Lübeck (-48 kg)
• 3. Plaz, EM U23 zu Ljubljana (-48 kg)
• Deelgeholl un der Juniore-WM zu Budapest

2005

• 5. Plaz, WC zu Leonding (Éisträich)
• 2. Plaz, Däitsche Mannschaftsmeeschter mat der 1. Judobundesliga vum KSV Esslingen
• 5. Plaz, EM U23 zu Kiew

2006

• 7. Plaz, Super World Cup zu Hamburg
• 1. Plaz, DHM zu Braunschweig
• 5. Plaz, DEM zu Esslingen

2007

• 1. Plaz bei de Swedish Open an der Gewiichtsklass -52 kg, (3. November 2007)
• 5. Plaz bei de Europameeschterschaften u23 zu Salzburg
• 1. Plaz bei de Spiller vun de klenge Länner zu Monaco
• 9. Plaz, Universiade zu Bangkok
• 9. Plaz, A-World Cup zu Tallinn
• 9. Plaz, Super World Cup zu Rotterdam

2008

• 9. Plaz ënner 22 Konkurrentinnen aus 22 Natioune bei den Olympesche Summerspiller 2008 zu Peking (Gewiichtsklass -52 kg)
• 1. Plaz, A-World Cup zu Birmingham
• 5. Plaz, Super-World Cup zu Moskau
• 7. Plaz, A-World Cup zu Roum
• 9. Plaz, A-World Cup zu Warschau

2009

• 1. Plaz, Spiller vun de klenge Länner zu Nikosia op Zypern (-57 kg) am Eenzel a mat der Ekipp
• 2. Plaz, World Cup op Samoa
• 3. Plaz, Jeux de la francophonie zu Beirut
• 5. Plaz, IDM Frauen zu Sindelfingen (-57 kg)

2010

• 5. Plaz, Grand Prix zu Qingdao
• 5. Plaz, Grand Slam zu Tokyo
• 1. Plaz, World Cup zu Birmingham
• 9. Plaz, Weltmeeschterschaft zu Tokyo, ausgescheet an der 1/8 Finall (no Verlängerung) géint d'spéider Weltmeeschterin
• 3. Plaz, World Cup zu Miami
• 2. Plaz, US Open zu Miami
• 1. Plaz, World Cup zu Tallinn
• 9. Plaz, World Cup zu Sao Paulo
• 3. Plaz, World Cup zu Warschau, ë. a. mat der POR Joana Ramos
• 2. Plaz, Grand Slam zu Rio
• 5. Plaz, World Cup zu Budapest

2011

• 3. Plaz, World Cup zu Samoa
• 5. Plaz, World Cup zu Roum
• 2. Plaz, World Cup zu El Salvador
• 3. Plaz, World Cup zu Venezuela
• 5. Plaz, World Cup zu Sao Paulo

2012

• 5. Plaz ënner 23 Konkurrentinnen aus 22 Natioune bei den Olympesche Summerspiller 2012 zu London (Gewiichtsklass -52 kg)

2013

• 1. Plaz bei de Spiller vun de klenge Länner 2013 zu Lëtzebuerg (Gewiichtsklass -52 kg)

Kuckt och

• Portal Sport
• Lëscht vu lëtzebuergesche Sportler
• Lëscht vu lëtzebuergeschen Olympionicken
• Lëtzebuergesch Sportler vum Joer

Virdrun	Sportlerin vum Joer	Duerno
Liz May Liz May Mandy Minella	2008 2010 2012	Liz May Mandy Minella Christine Majerus

Literatur

• Gricius, Pierre. Luxemburger Sportlerinnen bei den olympischen Spielen 1924 - 2012. Luxembourg: Conseil national des femmes, 2013. Print. S. 74-75. ISBN 978-2-9599734-5-1

Referenzen

1. "Réckbléck op eng aussergewéinlech Carrière." op rtl.lu, 20.10.2016.
2. Wort.lu: Von der Matte zum Traualtar: Hochzeitsglocken für Marie Muller
3. marie-muller.info "about me" Archivéiert de 25.03.2012. Gekuckt de 07.06.2011.
4. Wort.lu: Judoka Marie Muller verpasst knapp die Bronzemedaille und wird Fünfte
5. Bob Hemmen: Ex-Judoka Marie Muller arbeitet jetzt im Gefängnis am Luxemburger Wort vum 21. August 2025 S.38-39