Кула (Годивје)

Кула — археолошко наоѓалиште во охридското село Годивје, Општина Дебрца. Претставува опидум (утврдена населба) од хеленистичко време, доцната антика и средниот век.

„Кула“
План на наоѓалиштето
Местоположба	41°24′00″N 20°46′55″E
Основни податоци
Место	Годивје
Општина	Дебрца
Тип	опидум  тврдина
Период	хеленистичко време
	доцноантичко време
	среден век
Портал „Археологија“

Врвови од противоклопни стрели (XII - XIV век).

Местоположба

Месноста Кула лежи 0,5 км западно од селото. Тоа е тераса со висина од 70 м, јазичесто издадена меѓу две длабоки бразди — меѓу Годивска Река на север и Жмерница на југ.^[1] Лесно е пристапна од запад, каде што преку мало седло преминува во масивот на Славеј Планина. Има голем преглед околу, cи до патот Охрид — Кичево и до долината на Сатеска 3 км на исток и планинскиот превалец.

Опис

Повисокиот западен дел бил издвоен со внатрешен ѕид во малечка акропола, на чие што чело стоела издадена кула (оттука и името). Споменатиот врв претставува утврдено место со остатоци од бедем граден од кршен камен и варов малтер. Темелите на кулата се сложени од големи камени блокови, кои можеби потекнуваат од хеленистичко време.

Наоди

Антика

Ретки парчиња од грнчарија и една најдена фибула потекнуваат од хеленистичко време.^[2] Во доцноантичко време било изградено обѕидие со малтер околу простор голем 230 × 50 м (1 ха). Најдени се парчиња од ковано железо (клинци, кламфи, алатки, врвови од стрели и др.). Стари рудници и траги од преработка на железна руда се регистрирани на повеќе места на планинските падини југозападно од Кула.

Среден век

На Кула се утврдени и парчиња од словенски црепни, а меѓу железните врвови за стрели има повеќе примероци за пробив на оклоп, типични за развиенот среден век. Несомнено е дека со оживувањето на рударството во Дебрца во тоа време и борбите помеѓу Византија и Србија околу овој регион (1329/30 г.), старата крепост кај Годивје била повторно користена. Траги од нови ѕидарски работи нема и ова упориште најверојатно било користено само повремено. Во документите од тоа време местово не е забележано.

Поврзано

• Војо — населба од средниот век
• Горица — цркви од средниот век
• Св. Спас - Црквиште — сакрален објект од средниот век
• Трумени Гумења — црква од средниот век
• Черенец — населба од неолитот