Поло

Поло (персиски: چوگان, англиски: Polo) — екипен спорт со коњи и топка.

Поло
Играчи играат поло
Вид спорт:	екипен

Целта на играта е да се фрли топката во голот на противничката екипа. Играчите јаваат коњи за брзо движење и ја движат топката по полето со помош на посебен стап.

Играта потекнува од пред многу векови, а нејзина татковина е Древна Персија. Централниот плоштад на Исфахан (Иран), сместен под прозорците на шаховиот дворец, во минатото бил користен како стадион за поло.^[1]

Во својот современ облик, играта е обновена од англиските воени лица во Индија, меѓу кои истакнат играч бил и идниот премиер Винстон Черчил.

Историја

Потекнува од средината на првото илјадалетие од нашата ера како екипна игра — играта човган (човган-поло). Човганот бил многу популарен со векови на територијата на денешен Азербејџан, Средна Азија, Иран, Ирак, Таџикистан, Казахстан и во соседните турски земји. Фрагменти од играта периодично биле прикажувани на стари минијатури, а исто така биле дадени подробни описи и правила на играта во древните ракописи. Првите меѓународни натпревари во играта човган биле одржани меѓу коњаници од Блискиот Исток во XII век, во тогашната културна престолнина на исламскиот свет, градот Багдад.

Голема улога во ширењето и развојот на играта во Европа и низ целиот свет одиграле Англичаните. Така, играта човган, првично донесена од Индија (тогаш — Могулското Царство) во Англија во XIX век, станувала сѐ попопуларна, а воведувањето на нови правила придонело за брзо ширење на оваа игра во Европа и Америка.

Токму на иницијатива на Англичаните оваа игра го добила своето денешно име — коњско поло — и била вклучена во програмата на Вторите олимписки игри, одржани во 1900 г. во Париз. Во натпреварите учествувале 5 екипи од три земји.

Правила

Екипата се состои од четири играчи. Пречникот на топката за играње на отворено е 3¼ инчи (8,3 сантиметри), а тежината е четири унци (113,4 грама). Палката традиционално се изработува од бамбус или врбови прачки. За играта се одгледуваат и обучуваат посебни раси на пони.

Натпреварот се состои од периоди наречени чаки (англ. chukka), со времетраење од 7 минути. Натпреварот, во зависност од правилата на конкретното натпреварување, може да се состои од 4, 6 или 8 периоди. Најпопуларна е варијантата со 6 периоди.

Спортот е најпопуларен во Англија, САД, Индија, Пакистан, Аргентина и Австралија.^[2]

Полото било дел од програмата на Олимписките игри во 1900, 1908, 1920-24 и 1936 г.

Од 1987 г. се одржува Светското првенство во поло. Најголеми успеси постигнале екипите на Аргентина, Бразил, Чиле и САД.