വരാപ്പുഴ, IPA: [ʋɐɾɐːpːuɻɐ], കൊച്ചി നഗരത്തിന്റെ വടക്കൻ പ്രാന്തപ്രദേശമാണ്. ഇന്ത്യൻ സംസ്ഥാനമായ കേരളത്തിലെ എറണാകുളം ജില്ലയിലെ പറവൂർ താലൂക്കിലെ ഒരു സെൻസസ് പട്ടണമാണിത്. നഗര മധ്യത്തിൽ നിന്നും ഏകദേശം 15 കിലോമീറ്ററും, ഇടപ്പള്ളിയിൽ നിന്ന് നിന്നും 8 കിലോമീറ്ററും ദൂരത്തായി, വൈറ്റിലയെ വടക്കൻ പറവൂരുമായി ബന്ധിപ്പിക്കുന്ന എൻഎച്ച് 66 ലാണ് ഈ പ്രദേശം സ്ഥിതി ചെയ്യുന്നത്. ദേവസ്വംപാടം എന്നറിയപ്പെടുന്ന വരാപ്പുഴയുടെ പടിഞ്ഞാറ് ഭാഗത്താണ് പൊക്കാളി നെൽക്കൃഷിയും ഇടക്കാലവിളയായ 'കെട്ട്' എന്ന പേരിൽ മത്സ്യകൃഷിയും നടത്തുന്നത് എന്നതാണ് ഇതിന്റെ പ്രത്യേകത. മത്സ്യബന്ധനവും കൃഷിയുമാണ് നാട്ടുകാരുടെ പൊതു ജോലി. മീൻ മാർക്കറ്റിന് പേരുകേട്ടതാണ് വരാപ്പുഴ.