Andreas Kofler

Andreas Kofler (fødd 17. mai 1984) er ein austerriksk skihoppar frå Innsbruck, oppvaksen i Stubaital i Tirol. Han vann den tysk-austerrikske hoppveka 2009/10, og fekk sølvmedalje både i storbakkerennet under Vinter-OL 2006 i Torino og i rennet i normalbakken i Ski-VM 2011 i Oslo. Kofler har dessutan vore med å vinne to OL-gull i laghopp (2006 og 2010), tre gullmedaljar i laghopp under ski-VM (2007 og 2011) og to gull i skiflygings-VM (2008 og 2012) for Austerrike. I 2012 vart han nummer tre i verdscupen i skihopping.

Andreas Kofler
Statsborgarskap	Austerrike
Fødd	17. mai 1984 (41 år) Innsbruck
Idrett	skihopping
Tok del i	Skihopping under Vinter-OL 2006 – Stor bakke, Skihopping under Vinter-OL 2006 – Laghopp, Skihopp under Vinter-OL 2010 – Lag
Utmerkingar	æresteikn i gull for tenester til den austerrikske republikken

Aktiv

Kofler gjekk til topps i sit fyrste verdscuprenn i byrjinga av februar 2006, kort føre OL i Torino. I olympiaden hoppa han til 276,8 poeng i normalbakken, og hamna dermed 0,1 poeng bak gullvinnaren, landsmannen Thomas Morgenstern. Dei to var i eiga klasse i rennet. Seinare var dei begge med på Austerrike sitt firemannslag som vart olympiske meistrar i laghopp, eit renn som vart avvikla i storbakken.

Kofler var også med på det austerrikske laget som vann gull i laghopp i Ski-VM 2007 i Sapporo. Dei andre på laget var Wolfgang Loitzl, Gregor Schlierenzauer og Thomas Morgenstern. Også i 2008-sesongen kunne Kofler notere seg for eit VM-gull, då i laghopp under VM i skiflyging.

I den tysk-austerrikske hoppveka i 2009/10 gjekk Kofler heilt topps. Han vann på ny OL-gull i laghopp for Austerrike under vinter-OL 2010 i Vancouver. Mot slutten av OL-sesongen, 14. mars 2010, sette han ny offisiell bakkerekord med 139,5 meter i den nye Holmenkollbakken. Denne bakkerekorden forbetra han sjølv til 141 meter under Ski-VM 2011 den 5. mars 2011, då Austerrike enno ein gong vart verdsmeistrar i laghopp. I den same meisterskapen fekk Kofler sølv i normalbakkerennet i Midtstubakken i Oslo, atter ein gong bakom landsmannen Morgenstern.

Den 4. januar 2012 tok Kofler sin tiande og hittil siste individuelle siger i eit verdscuprenn. Det hende då han vann rennet i Bergisel-bakken i Innsbruck, hans heimebakke som hoppar. I alt har han tretti (10-9-11) pallplasseringar i verdscupen (2012). Kofler vann i 2012 sin sjuande VM- eller OL-tittel med austerrikske hopplag då Austerrike sigra i lagtevlinga i VM i skiflyging 2012 i Vikersund.

Verdscupsigrar

Nr.	Dato	Stad	Land
1.	4. februar 2006	Willingen	Tyskland
2.	29. desember 2009	Oberstdorf	Tyskland
3.	28. november 2010	Kuusamo	Finland
4.	19. desember 2010	Engelberg	Sveits
5.	16. januar 2011	Sapporo	Japan
6.	27. november 2011	Kuusamo	Finland
7.	3. desember 2011	Lillehammer	Noreg
8.	4. fesember 2011	Lillehammer	Noreg
9.	18. dedember 2011	Engelberg	Sveits
10.	4. januar 2012	Innsbruck	Austerrike

Kjelder

• Denne artikkelen bygger på «Andreas Kofler» frå Wikipedia på tysk, den 5. desember 2012.

Bakgrunnsstoff

• (en) Andreas Kofler – Profil og resultatoversikt hos FIS