Jerry Heil
From Wikipedia, the free encyclopedia
Remove ads
Jana Oleksandrivna Sjemajeva[a] (fødd 21. oktober 1995), kjend profesjonelt som Jerry Heil, er ein ukrainsk songar, låtskrivar og youtubar. Ho byrja karrieren sin etter å ha lansert ein YouTube-kanal i 2012, og publiserte vloggar og coverversjonar av låtar.
.jpg)
Heil byrja sin profesjonelle musikkarriere i 2017 då ho gav ut sin debut-EP De mij dim med Vidlik Records. Ho gav seinare ut singelen «Okhrana, otmjena» i 2019, som blei ein topp fem-hit i Ukraina. Debutalbumet hennar Ja Jana blei seinare gjeve ut i oktober 2019. Sidan ho starta YouTube-kanalen sin, har Heil fått meir enn 34,9 millioner syningar og 395 000 abonnentar. Ho representerte Ukraina i Eurovision Song Contest 2024 saman med Alyona Alyona med songen «Teresa & Maria».
Remove ads
Bakgrunn
Jana Sjemajeva blei fødd den 21. oktober 1995 i Vasylkiv, ein by like utanfor den ukrainske hovudstaden Kyiv.[1] Dei velståande foreldre hennar er båe private handelsfolk. Heil gjekk på musikkskuler i Kyiv, og gjekk på Glière musikkhøgskole og Kyiv konservatorium.[2][3]
Karriere
Tidleg karriere
Heil byrja å bruke aliaset sitt då ho var 15 år gammal. Etter å ha registrert seg for den russiske sosiale medietenesta VKontakte, brukte ho namnet Jerry Mouse, som refererte til teikneseriefiguren med same namn. Ho endra deretter «mus» til «Heil», og hevda at ho gjekk til ein nettstad med amerikanske etternamn og valde det ho likte best. Ho har skildra bakhistoria bak artistnamnet sitt som «idiotisk».[4]
I 2012 lanserte Heil YouTube-kanalen sin, der ho publiserte vloggar og coverversjonar av songar som blei gjort populære av ukrainske og internasjonale musikarar, som Twenty One Pilots, Okean Elzy, The Hardkiss og Kodaline. Frontfiguren i Okean Elzy, Svjatoslav Vakartsjuk, har ofte sporeidd Heil sine coverversjonane av songane til bandet, og gjeve si godkjenning til versjonane hennar.[5][2][4][6][7]
2017–2018: Gjennombrotet og De mij dim
I 2017 skreiv Heil platekontrakt med det ukrainske plateselskapet Vidlik Records, som er kjent for tilknytinga si til den ukrainske musikkgruppa Onuka. Ho blei introdusert for plateselskapet og grunnleggjarane Jevhen Filatov og Nata Zjyzjtsjenko – frontvokalisten i Onuka – etter at Heil byrja å leite etter produsentar for å hjelpe til med songen sin «De mij dim». Heil byrja deretter å jobbe tett med plateselskapet, og spela inn debut-EP-en sin De mij dim hos dei, som seinare blei gjeven ut i oktober 2017.[8][9]
I 2018 var Heil på audition for den niande sesongen av X-Faktor Ukraina. Ho gjekk vidare frå den fyrste auditionrunden framfor dommarane til bootcamp-fasen av konkurransen, der ho blei eliminert.[10][11] Etter elimineringa kom Heil tilbake til musikken og gav ut singlane «Kava» og «Postil»; den siste av dei to utgjevingane inneheldt den fyrste musikkvideoen hennar.[12]
2019–2024: «Okhrana, otmjena», Ja Jana og Eurovision
I mars 2019 publiserte Heil ein snutt av den kommande singelen sin «Okhrana, otmjena» på Instagram, som ho hadde spelt inn med den ukrainske produsenten Morphom.[13] Songen fekk raskt suksess, då ukrainske songarar som NK og Vera Brezjnjeva skrytte av han og vidarepubliserte songsnutten.[14] Heil gav seinare ut ein fullversjon av songen gjennom YouTube månaden etter, der musikkvideoen har fått meir enn 14,8 millionar syningar; «Okhrana, otmjena» blei i tillegg ein topp fem-hit i Ukraina.[15][16] Etter suksessen med songen byrja Heil å satse på låtskriving, der ho skreiv songar for musikarar, inkludert Brezjneva og det Kyiv-baserte bandet Cloudless, med den ukrainske låtskrivaren og produsenten Konstantin Meladze.[17][18]
I september 2019 gav Heil ut debutalbumet Ja Jana på YouTube. Albumet inneheld åtte songar, og blei kommersielt gjeve ut månaden etter.[19][20] I januar 2020 blei Heil kunngjord som ein av deltakarane i Vidbir 2020, den ukrainske nasjonale uttakinga for Eurovision Song Contest 2020 i Rotterdam.[21] Songen hennar «Vegan» kvalifiserte seg til finalen, der han enda på sjetteplass.
Heil deltok igjen i Vidbir i desember 2022 med songen «When God Shut the Door», og konkurrerte om å representere Ukraina i Eurovision Song Contest 2023. Ho enda på tredjeplass.
Heil og Alyona Alyona var blant deltakarane som deltok i Vidbir 2024, med songen «Teresa & Maria».[22] Duoen vann finalen 4. februar 2024, og fekk retten til å representere Ukraina i Eurovision Song Contest 2024.[23] Dei kvalifiserte seg frå den fyrste semifinalen 7. mai og enda til slutt på tredjeplass i finalen 11. mai med 453 poeng.
Remove ads
Privatliv
Heil snakkar ukrainsk og engelsk flytande. Dei fleste av songane hennar er spelte inn på ukrainsk.[24] Ho er kristen og veganar.[25][26]
Brot på opphavsrett
I august 2018 truga forlagsselskapet Komp Music Publishing – rettshavaren til Universal Music Group i Ukraina – med eit søksmål mot Heil for uautorisert bruk av songen «Believer» av Imagine Dragons i ein av videoane sine. Selskapet insisterte då på at alle songar frå Universal Music Group, som var brukte på kanalen til Heil, måtte bli fjerna og kravde ein bot på fleire tusen hryvnja for brot på lovar om opphavsrett. Selskapet starta to søksmål mot Heil, noko som førte til at kanalen til Heil blei fjerna frå YouTube.[27]
AIR Music, ein partnar av Heil, tok opp saka. I eit møte mellom representantar frå båe selskapa forhandla dei fram ein avtale der bøtene til Heil blei monalege reduserte, og det blei oppnådd semje om kor mange opphavsrettsbrot Heil hadde gjort. Komp Music Publishing trekte deretter søksmåla sine, og kanalen til Heil blei gjenoppretta.[28][27]
Merknadar
- ukrainsk: Я́на Олекса́ндрівна Шема́єва
Kjelder
Wikiwand - on
Seamless Wikipedia browsing. On steroids.
Remove ads