Krydderkake

Krydderkake er ei kake laga med visse krydder, som kanel, kardemomme, muskat, nellik, pepar,^[1] allehande og ingefær.^[2]

Nederlandsk krydderkake.

Krydderkaka Yorkshire-parkin.

Dette er ei tradisjonell kake der ein ofte bruker natron og eventuelt kulturmjølk eller liknande i røra.^[3] Andre oppskrifter bruker bakepulver.^[4][5] Vanlege søtemiddel er honning, sirup eller mørkt sukker.

Krydderkaker blir brukt ein del som julebakst.^[3] Peparkake er døme på ei småkake laga med ulike krydder ein ofte lagar til jul.

Variantar

Ulike krydderkaker kan ha namn etter det viktigaste krydderet ein bruker i dei, som kanelkake eller kardemommekake.

Kanelkake er ei krydderkake med særskild preg av kanel. Svenske kanelkakor kan vera småkaker i fingertjukke lengder skorne i snittar og strødd med strøsukker og kanel.^[6]

Kardemommekake er ei krydderkake med vekt på kardemomme. Svenske kardemummalöv kan vera småkaker laga av mørdeig, kjevla og pressa ut med former og pynta med kardemomme og perlesukker.^[6]

Maple spice cake er ei amerikansk krydderkake som bruker lønnesirup i røra. Denne kaka var ein spesialitet frå New Hampshire frå byrjinga av 1800-talet. Kaka kan smaka som kanel eller eplesider, og er ein typisk haustrett.^[7]

Mjuk pepparkaka er ei svensk krydderkake med smak som peparkake.

Parkin er ei kake frå Nord-England - Yorkshire og Lancashire - med ingefær, sirup og havregryn i røra. Kaka er særleg knytt til bonfire night 5. november.^[8]