Carel de Haseth

Carel Pieter de Haseth (☆ 22 di sèptèmber 1950 na Kòrsou) ta botikario, poeta, outor i polítiko di Kòrsou. E tabata e minister plenipotensiario di Antias Hulandes stashoná na Den Haag den gabinetenan Pourier II i III, den gabinete Ys I i brevemente den gabinete Ys II.

 E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.

Carel de Haseth
Informashon básiko
Nòmber kompleto	Carel Pieter de Haseth
Nasementu	22 di sèptèmber 1950  Kòrsou
Edukashon
Alma mater	Universidat di Leiden
Informashon profeshonal
Ofishi	botikario, poeta, outor, polítiko
Obra
Lenga literario	Papiamentu, hulandes
Obra notabel	Katibu di Shon (1988)
Polítiko
Partido polítiko	PAR
Kandidato den elekshon	1994
Famia
Yu	2
Otro informashon
Distinshon	Premio Cola Debrot (1989), Premio Boeli van Leeuwen (2013), Ofisial di Orden di Oranje-Nassau (1999)
Funshon
1994-1998, 2000-2003	minister plenipotensiario di Antias Hulandes
Imágennan riba Wikimedia Commons
dbnl-profil
[Editá Wikidata] · [Manual]

Bida i labor

Carel de Haseth a logra su diploma gymnasium-beta na Kòrsou na 1968. El a bai Hulanda pa studia farmasia na Universidat di Leiden. Na 1976 el a graduá komo botikario na e mesun universidat. Bek na Kòrsou De Haseth tabata hefe di farmasia i sterilisashon sentral di Sint-Elisabeth Hospital for di 1976 te 1994 i atrobe for di 1998 te 1999.

Durante su karera profeshonal de Haseth a forma parti di diferente komishon i plataforma. E tabata miembro di e komishon di kambio di lei tokante leinan riba tereno di farmasia, miembro di e komishon nashonal di formulas nashonal establesé pa gobièrnu di Antias Hulandes, miembro di e Stichting Leerstoel voor Milieu en Ontwikkeling, miembro di e komishon di entrenamentu profeshonal di dòkternan di kas, referente di e United States Pharmacopoeia Dispensing Information, tesorero di e Caribbean Institute of Perinatology Ltd. Ademas, e tabata presidente (na nòmber di e fakultat di Siensia Mediko di e Universidat di Groningen) di e Komishon di Enseñansa na Sint-Elisabeth Hospital, presidente di e Komishon di Eksamen pa botikario i asistente-botikario i presidente di e Komishon di registrashon di medikamentu di Antias Hulandes.

Politika

De Haseth a okupá un lugá prominente dentro di partido PAR; den direktiva e tabata tesorero di 1998 te 1999 i atrobe for di 2006, i sekretario den 2005. Na aña 1994 el a aparesé riba lista di PAR pa elekshon di parlamento di Antias Hulandes^[1] i ku e formashon di e di dos gabinete Pourier a keda nombrá komo minister plenipotensiario di Antias Hulandes, ku sede na Den Haag. El a sirbi den e funshon aki te ku 1998 i tambe for di 2000 te ku 2003 i den e lunanan di yüni i yüli 2004. Despues el a bira sekretario/asesor di e promé minister di Antias Hulandes (2004-2005), konsehero di konseho di minister (2006-2010) i direktor interino di departamentu di Relashonnan Eksterior di desèmber 2008 te òktober 2010.^[2]

Kultura i literatura

Riba tereno kultural-literario de Haseth tabata miembro di redakshon di e revista Watapana (1969-1974), kofundadó di Editorial Flamboyant/P (1974), editor di e revista Kristòf (1976-presente), kolaboradó di Ñapa (anekso di fin di siman di Amigoe) (1976-1994) i kolumnista di e edishon karibense di Algemeen Dagblad (1999-2001). Su trabou tambe a aparesé den De Gids, Kruispunt i Preludium. E ta skirbi tantu na papiamentu komo na hulandes. Su obra mas konosí Katibu di Shon a sali na papiamentu na 1988, pero no a sali na hulandes te na 2002 i a keda tradusí na aleman na 2007. Den e novela aki de Haseth ta konta e historia di e rebelion di katibu na Kòrsou na 1795 for di e perspektiva di un doño i un katibu ku a krese huntu komo dos amigu. Na 1989 e eskritor a risibí pa e buki aki e Premio Cola Debrot, e premio kultural di mas altu di Kòrsou.^[3]

Carel de Haseth ta kasá i ta tata di un yu muhé i un yu hòmber.^[4]

Publikashon literario

• 3 dagen vóór Eva (1969), kolekshon di poema
• Berceuse voor teleurgestelden (1975), poesia
• Bida na koló/Kleuren van leven (1981), poesia ku e obranan di José Maria Capricorne, re-imprimi komo Kleuren van leven: Antilliaanse dieren van Capricorne/Bida na koló: bestianan di Capricorne (1989)
• Poesia venená (1985), poesia
• Katibu di Shon (1988), novela kòrtiku
• Zolang er kusten zijn (1994), poesia
• Tot Memorie/Slaaf en Meester (2001)

Distinshon

•  Kòrsou: Premio Cola Debrot di teritorio insular di Kòrsou (1989)
•  Venezuela: Orden Francisco de Miranda de Primera Clase (1998)
•  Hulanda: Ofisial di Orden di Oranje-Nassau (1999)
•  Kòrsou: Premio Boeli van Leeuwen (2013) − pa e opera Katibu di Shon, huntu ku Tania Kross i Randal Corsen

Wak tambe

• Literatura di Karibe Hulandes
• Lista di minister-plenipotensiario di Antias Hulandes