Patrick wa Ireland

Patrick wa Ireland (kwa Kilatini Patricius) aliishi kuanzia mwaka 387 hivi hadi tarehe 17 Machi 461^[1] (wengine wanasema 493^[2]).

Mt. Patrick katika kioo cha rangi.

Mahali panapodhaniwa kuwa alifanyiwa mazishi huko Downpatrick.

Ni maarufu kama Mkristo kutoka Uingereza aliyepata kuwa mmisionari mkuu wa Ireland na anaheshimiwa kama mtakatifu msimamizi wa kisiwa hicho ^[3].

Sikukuu yake inaadhimishwa tarehe ya kifo chake^[4].

Maisha

Kati ya maandishi yake, zimetufikia barua mbili, ambamo tunapata habari za kuaminika juu yake, tofauti na nyingine nyingi ambazo zinatia shaka.^[5]

Alipokuwa na umri wa miaka 16 hivi huko Wales, alitekwa na maharamia kutoka Ireland na kufanywa mtumwa kisiwani huko.

Baada ya miaka 6 alifaulu kukimbia na kurudi kwenye familia yake.

Lakini akajisikia wito wa kuinjilisha wakazi wa kisiwa hicho, hivyo baada ya kujiandaa katika monasteri ya Ufaransa akarudi huko kama askofu akafanya kazi hasa kaskazini na magharibi akitangaza kwa bidii Injili kwa wote na kuongoza kwa nguvu Kanisa lake.^[6][7]

Sala yake

Kristo uwe nami, Kristo uwe ndani mwangu,

Kristo nyuma yangu, Kristo mbele yangu,

Kristo karibu nami, Kristo ili unitawale,

Kristo, ili unifariji na kunifundisha,

Kristo pamoja nami, Kristo juu yangu,

Kristo katika amani, Kristo katika hatari,

Kristo moyoni mwa wote wanaonipenda,

Kristo mdomoni mwa rafiki na mgeni.

Tazama pia

• Watakatifu wa Agano la Kale
• Orodha ya Watakatifu Wakristo
• Orodha ya Watakatifu wa Afrika
• Orodha ya Watakatifu Wafransisko
• Mababu wa Kanisa