காசுமீர் பிரச்சினை

காசுமீர் பிரச்சினை என்பது காசுமீர் மாநிலம் மீது இந்தியாவிற்கும், இந்தியாவின் அண்டை நாடான பாகித்தானிற்கும் இடையே நிலவி வரும் நில உரிமை தொடர்பான பிரச்சினைகளைக் குறிக்கிறது. இந்தியா, பாகித்தான் நாடுகள் ஆங்கில அரசிடமிருந்து சுதந்திரம் அடைந்த நாள் முதல் இன்று வரை இது தீர்க்கப்படாத பிரச்சினைகளில் ஒன்றாக பார்க்கப்படுகிறது. நிலப்பகுதிகள் ஆக்கிரமிப்பு செய்யப்படுவதும், அதனைத் தொடர்ந்து போர் அல்லது இராணுவ நடவடிக்கை நடைபெறுவதும் அவ்வப்போது இரு அரசுகளும் பேச்சுவார்த்தை நடத்துவதும், பன்னாட்டு அமைப்புகள் தலையிட்டு இந்த பிரச்சினையை தீர்த்து வைக்க முயற்சிகள் செய்வது என்று இருந்தாலும் காசுமீர் சர்ச்சை இன்று வரை தொடர்கிறது.^[1]

ஆக்கிரமிப்புகள்

ஜம்மு காஷ்மீர் இராச்சியத்தின் மேற்குப் பகுதிகளையும், வடக்குப் பகுதிகளையும் சூலை 1947-இல் பாகிஸ்தான் ஆக்கிரமிப்பு செய்ததது. இப்பகுதிகளை ஆசாத் காஷ்மீர் மற்றும் வடக்கு நிலங்கள் என்ற பெயரில் பாகித்தான் தனது கட்டுப்பாட்டுக்குள் வைத்துள்ளது. மற்றொரு அண்டை நாடான சீனா ஜம்மு கஷ்மீரின் கிழக்குப் பகுதியில் உள்ள அக்சய் சின் பகுதியை ஆக்கிரமிப்பு செய்து தனது கட்டுப்பாட்டில் வைத்துள்ளது. பின்னர் ஜம்மு காஷ்மீர் இராச்சியத்தின் மன்னர் ஹரி சிங், ஜம்மு காஷ்மீரை இந்தியாவுடன் இணைய ஜம்மு காஷ்மீர் இணைப்பு ஒப்பந்தம் செய்து கொண்டார்.

வரலாறு

முதன்மைக் கட்டுரை: ஜம்மு காஷ்மீர் வரலாறு

காஷ்மீர் மாநிலத்தின் ஆக்கிரமிப்பு தொடர்பாக 1947, 1965 மற்றும் 1999 ஆகிய ஆண்டுகளில் இரண்டு நாடுகளுக்கு இடையே மூன்று முறை போர்கள் நிகழ்ந்துள்ளன. இந்த போர்கள் தவிர்த்து அவ்வப்போது ராணுவ மோதல்களும் நிகழ்ந்துள்ளன. இரு நாடுகளின் சார்பாகவும் பல ஆண்டுகளாக எல்லைப்புறத்தில் ராணுவ வீரர்கள் குவிக்கப்பட்டு அமைதியற்ற சூழல் நிலவி வருகிறது.

முக்கிய நிகழ்வுகள்

இந்தியா பாகித்தான் இரு நாடுகளுக்கு இடையே உயர்மட்ட அளவில் பேச்சுவார்த்தைகள் பல நடைபெற்றுள்ளன. இரு நாட்டு வெளியுறவுத்துறை அமைச்சர்கள், வெளியுறவுத் துறை செயலாளர்கள், பிரதமர், அதிபர் போன்ற இருநாடுகளின் தலைவர்கள் என பல்வேறு மட்டங்களிளும் பேச்சுவார்த்தை நடைபெற்றுள்ளன. இவ்வாறான பேச்சுகளின் முடிவில் சில முடிவுகள் எட்டப்பட்டாலும் கூட பிரச்சினை முற்றிலும் தீர்க்கப்படவில்லை.

இதுவரை நடைபெற்ற முக்கிய சந்திப்புகள் மற்றும் நிகழ்வுகள்:

• அக்டோபர் 27, 1947 – ஜம்மு காஷ்மீர் இணைப்பு ஒப்பந்தம் மூலம் ஜம்மு காஷ்மீர் இராச்சியம் இந்தியாவின் ஒரு பகுதியானது^[2].
• ஜனவரி 1948 – இந்திய-பாகிஸ்தான் போர், 1947–1948 போரின் முடிவில் இந்தியா- பாகிஸ்தான் இடையே போர் நிறுத்தக் கட்டுப்பாட்டு கோடு எற்படுத்தப்பட்டது.
• ஆகஸ்ட் 5, 1965 – இந்திய-பாகிஸ்தான் போர், 1965, காஷ்மீர் உரிமை தொடர்பான போர் மூண்டது. போர் முடிவில் ஐக்கிய நாடுகள் பாதுகாப்பு சபையின் முன்னிலையில் கட்டுப்பாடு கோட்டை இரு நாடுகளும் எல்லையாக கொள்ள இரு நாடுகளும் சம்மதித்து போர் நிறுத்தம் அறிவித்தன.
• ஜனவரி 10, 1966: சோவியத் யூனியன் ஏற்பாடுசெய்த அமைதி முயற்சியில் தாஷ்கண்ட் ஒப்பந்தம் கையெழுத்தனது. அப்போது நிலவிவந்த போர் சூழலை முடித்து வைக்க சோவியத் யூனியனின் பிரதமர் கோசிஜின், முயற்சியால் இந்த ஒப்பந்தம் கையெழுத்தானது^[3].
• ஜூலை 14-16, 2001: பாகிஸ்தான் அதிபர் முஷாரப் மற்றும் இந்தியப் பிரதமர் வாஜ்பாயி இடையே பேச்சுவார்த்தை. ஆக்ராவில் நடந்த இந்த பேச்சுவார்த்தை முடிவேதும் எட்டப்படாமல் தோல்வியடைந்தது.
• ஜூலை 2006: இந்திய-பாகிஸ்தான் இரண்டாம் சுற்றுப் பேச்சுவார்த்தை.

• 5 – 6 ஆகஸ்டு 2019 நாட்களில் இந்திய நாடாளுமன்றத்தில் ஜம்மு காஷ்மீர் மறுசீரமைப்புச் சட்டத்தை இயற்றியதன் மூலம் இந்திய அரசியலமைப்பு சட்டம், பிரிவு 370 மற்றும் இந்திய அரசியலமைப்புச் சட்டம், பிரிவு 35ஏ ஆகியவற்றின் மூலம் காஷ்மீருக்கு வழங்கப்பட்ட சிறப்புத் தகுதிகள் நீக்கப்பட்டுள்ளது. மேலும் காஷ்மீர் – ஜம்மு இணைந்த பகுதிகளைக் கொண்டு, சட்டமன்றத்துடன் கூடிய ஒன்றியப் பகுதியாகவும், லடாக்கை சட்டமன்றம் இல்லாத ஒன்றியப் பகுதியாகவும் பிரிக்கப்பட்டுள்ளது. இந்த ஒன்றியப் பகுதிகளின் ஆட்சி முறை 31 அக்டோபர் 2019 முதல் நடைமுறைக்கு வருகிறது.

• பாகிஸ்தான் மற்றும் சீனா தவிர பிற உலக நாடுகள் காஷ்மீர் இந்தியாவின் உள்நாட்டு பிரச்சனை எனக் கூறி விட்டது. ஐக்கிய நாடுகள் பாதுகாப்பு அவையும் காஷ்மீர் பிரச்சனையில் தலையிட விரும்பவில்லை என்றும், இந்தியா - பாகிஸ்தான் இருநாடுகளும் தமக்குள் காஷ்மீர் பிரச்சனையை பேசித் தீர்த்துக் கொள்ள வேண்டும் கூறிவிட்டது.^[4]

• 31 அக்டோபர் 2019 - புதிய ஜம்மு காஷ்மீர் ஒன்றியப் பகுதி செயல்படத் துவங்கியது.

இதனையும் காண்க

• ஜம்மு காஷ்மீர் மறுசீரமைப்புச் சட்டம் 2019