மலேசியா எயர்லைன்சு விமானம் 17

மலேசியா ஏர்லைன்சு விமானம் 17 (Malaysia Airlines Flight 17, எம்எச்17 (MH17/MAS17)^[2] என்பது ஆம்ஸ்டர்டாமில் இருந்து கோலாலம்பூர் நோக்கி சென்றுகொண்டிருக்கையில், 2014 சூலை 17 இல், விபத்துக்குள்ளாகி வீழ்ந்து நொறுங்கிய மலேசிய நாட்டு வானூர்தி ஆகும். போயிங் 777 ரக விமானம் உக்ரைனின் தோனெத்ஸ்க் வட்டாரத்தில் கிராபோவ் நகருக்கு அண்மையில்^[3][4] உருசிய எல்லையில் இருந்து கிட்டத்தட்ட 40 கி.மீ. தொலைவில் வீழ்ந்தது.^[5] விமானத்தில் பயணம் செய்த அனைத்து 283 பயணிகளும், 15 பணியாளர்களும் உயிரிழந்தனர்.^[6]

மலேசியா எயர்லைன்சு விமானம் 17

ரோமின் பியுமிசினொ விமான நிலையத்தில் 2011ஆம் ஆண்டு அக்டோபர் மாதத்தில் சம்பந்தப்பட்ட விமானம் நின்றிருந்தபோது எடுக்கப்பட்ட ஒளிப்படம்
Incident சுருக்கம்
நாள்	17 சூலை 2014 (2014-07-17)
சுருக்கம்	Under investigation. Fired at with surface-to-air missile.[1]
இடம்	ஹ்ரபோவே அருகே ,டநிட்ஸ்க் ஒப்லாஸ்து , உக்ரைன் 48°7′56″N 38°39′19″E
பயணிகள்	283
ஊழியர்	15
உயிரிழப்புகள்	(மொத்தம்) 298
தப்பியவர்கள்	0
வானூர்தி வகை	போயிங் 777-200ER
இயக்கம்	மலேசியா எயர்லைன்சு
வானூர்தி பதிவு	9M-MRD
பறப்பு புறப்பாடு	ஆம்ஸ்டர்டம் வானூர்தி நிலையம் ஸ்கைபோல்
சேருமிடம்	கோலாலம்பூர் பன்னாட்டு வானூர்தி நிலையம்

உக்ரைனில் உருசிய-சார்புக் கிளர்ச்சியாளர்களுக்கும், அரசுப் படையினருக்கும் இடையில் இடம்பெற்று வரும் போர்ப் பகுதியிலேயே விமானம் வீழ்ந்துள்ளது. அமெரிக்கப் புலனாய்வுத்துறை அறிக்கைகளின் படி, இவ்விமானம் ஏவுகணைத் தாக்குதலுக்கு உள்ளாகியதாகக் கூறப்படுகிறது. ஆனாலும், யார் இதனைச் சுட்டு வீழ்த்தினார்கள் என்பது உறுதிப்படுத்தப்படவில்லை.^[7][8] உக்ரைனியப் பிரச்சினையில் உருசியா சம்பந்தப்பட்டிருப்பதால் அதன் மீது அமெரிக்கா பல பொருளாதாரத் தடைகளை அறிவித்த அடுத்த நாள் விமானம் சுட்டு வீழ்த்தப்பட்டுள்ளது.^[9]

விமானம் 10,000 மீட்டர் உயரத்தில் வைத்து பூக் நில வான் ஏவுகணை மூலம் சுட்டு வீழ்த்தப்பட்டிருப்பதாக உக்ரைனின் உட்துறை அமைச்சு அறிவித்தது.^[10][11] உக்ரைனிய அரசுத்தலைவர் பெத்ரோ பொரொசென்கோ இதனை ஒரு "பயங்கரவாதத் தாக்குதல்" எனக் கூறியுள்ளார்.^[12] உக்ரைனியப் படையினரே விமானத்தை சுட்டு வீழ்த்தினர் என கிளர்ச்சியாளர்கள் குற்றம் சுமத்தினர். தாம் ஒரு பயணிகள் விமானத்தை சுட்டு வீழ்த்தியதாக கிளர்ச்சியாளர்கள் இருவர் தமக்குள் தொலைபேசியில் உரையாடியதைத் தமது புலனாய்வுப் பிரிவு ஒட்டுக் கேட்டதாக உக்ரைனிய அரசு அறிவித்தது.^[13][14]

11 செப்டம்பர் 2001 தாக்குதலுக்குப் பிறகு நடந்த மிகவும் மோசமான வானூர்தித் தொடர்பான தாக்குதலாக இந்நிகழ்வு கருதப்படுகிறது^[15].

விமானம் வீழ்ந்து நொறுங்கிய விவரம்

விமானம் பயணித்த பாதை

நெதர்லாந்தின் தலைநகர் ஆம்ஸ்டர்டாமிலிருந்து மலேசியத் தலைநகர் கோலாலம்பூருக்கு சூலை 17, 2014 அன்று 12:15 (நெதர்லாந்து நேரம்) மணியளவில் விமானம் புறப்பட்டது. பயண அட்டவணைப்படி இவ்விமானம் காலை 06:10 (மலேசிய நேரம்) மணியளவில் கோலாலம்பூர் சென்று சேரவேண்டும். ஆனால் 17:15 (உக்ரைன் நேரம்) மணியளவில் கிழக்கு உக்ரேனின் வான்வெளிப் பகுதியில் விமானம் எரிந்து விழுந்தது. கடைசித் தொடர்பின்போது விமானம் 10,000 மீட்டர் உயரத்தில் பறந்துள்ளது.^[16]

விமானத்தின் காலக்கெடு

கடந்துவிட்ட நேரம்	நேரம்				நிகழ்வு
	ஒருங்கிணைந்த அனைத்துலக நேரம்	ஆம்ஸ்டர்டாம்	உக்ரைன்	கோலாலம்பூர்
00:00	10:14	12:14	13:14	18:14
04:01	14:15	16:15	17:15	22:15	விமானம் உக்ரைன் ரேடாரில் இருந்து மறைந்தது

பயணிகள் மற்றும் பணிக்குழுவினர்

நாடு வாரியாகப் பயணிகள்^[17]

நாடு	எண்ணிக்கை
நெதர்லாந்து	192[a]
மலேசியா	44[b]
ஆத்திரேலியா	27[18]
இந்தோனேசியா	12
ஐக்கிய இராச்சியம்	10
பெல்ஜியம்	4
செருமனி	4
பிலிப்பீன்சு	3
நியூசிலாந்து	1[19]
கனடா	1
மொத்தம்	298

விமானத்தில் பயணம் செய்த அனைத்து 283 பயணிகளும், 15 மலேசியப் பணியாளர்களும் உயிரிழந்தனர்.^[20][21][22] இவர்களில் 192 பேர் நெதர்லாந்து நாட்டவர்.^[23][24] சூலை 19 இல் அனைத்து 298 பேரினதும் விபரங்களை மலேசியா ஏர்லைன்சு நிறுவனம் வெளியிட்டது.^[17]

ஆத்திரேலியாவின் மெல்பேர்ண் நகரில் நடைபெறும் 20வது பன்னாட்டு எயிட்சுக் மாநாட்டில் கலந்து கொள்ளவென விமானத்தில் போய்க்கொண்டிருந்த கிட்டத்தட்ட 100 எயிட்சு வல்லுநர்களும், பன்னாட்டு எயிட்சு நிறுவனத்தின் முன்னாள் தலைவர் ஜோயிப் லாங்கேயும் இதில் கொல்லப்பட்டனர்.^[25][26][27] இவர்களுடன் டச்சு மேலவை உறுப்பினர் வெல்லெம் விட்டெவீன்,^[28] ஆத்திரேலிய எழுத்தாளர் லியாம் டேவிசன்,^[29] மலேசியத் தமிழ் நடிகை சுபா ஜெய்,^[30] மலேசியப் பிரதமர் நஜீப் துன் ரசாக்கின் பாட்டியார் சிறீ சித்த அமீரா^[31] ஆகியோரும் இறந்த பிரபலங்களில் அடங்குவர்.

உலக மக்களின் அஞ்சலி

• 
  எஸ்தோனியா நாட்டிலுள்ள நெதர்லாந்து தூதரகத்தின் நுழைவாயிலில் பொதுமக்களின் மெழுகுவர்த்தி அஞ்சலி
• 
  ருசிய அதிபர் விலாடிமிர் புடின் தனது அரசு அதிகாரிகளுடன் மவுன அஞ்சலி

விமானத்தின் விவரங்கள் [32]

• வகை: போயிங் 777 – 2H6ER
• வரிசை எண்: 28411
• பதிவு எண்: 9M-MRD
• தயாரிப்பு விவரம்: போயிங் 777 வகையில் 84 ஆவது விமானம்.
• முதல்முறையாக பறந்த நாள்: 17 சூலை 1997
• மலேசிய ஏர்லைன்சுக்கு விற்கப்பட்ட நாள்: 29 சூலை 1997
• என்ஜின்கள்: இரண்டு Rolls-Royce Trent 800
• விமானத்தின் பயணிகள் கொள்ளளவு: 282

குறிப்புகள்

1. 1 டச்சு-அமெரிக்க இரட்டைக் குடியுரிமை உள்ளவர் உட்பட.
2. 15 பணியாளர்கள் உட்பட.