周庄镇（昆山）

周莊是隸屬於江蘇省崑山市搭仔上海交界處個一座典型個江南水鄉小鎮，目前已經成為著名個風景旅遊區。

吳越主題頁面

江南古鎮頁面

周莊大致有搭900年個歷史，真正興旺是由於明朝著名個富豪沈萬三辣辣此地落戶，沈萬三由於富可敵國，只不過為了要犒勞朱元璋個軍隊，弄得「龍顏大怒」，拔髮配充軍到雲南，葛佬名字竟然上了明史。

周莊辣1979年又因為畫家陳逸飛辣辣此地住了幾個號頭，寫生搜集了大量素材。陳逸飛後來旅居美國，畫了交關手持樂器個人像作品，辣美國小有名氣。伊拿周莊個中心雙橋作為題材個作品《故鄉的回憶》拔美國個「紅色資本家」阿曼德·哈默以重金買下來，辣1984年訪問中國個辰光作為禮物送給辣鄧小平。雙橋辣辣周莊中心一條分叉個河流叉口浪，成直角交叉，一座方形一座圓孔，賽過中國古代個鑰匙，葛佬又叫做鑰匙橋，由此周莊開始出名。

辣辣同濟大學教授個幫助下頭，周莊決定保護自家個古建築，維護原有個水鄉風貌，開闢成功旅遊區，現在周莊所有個景點儕已經形成古鎮旅遊一票制，遊客可以盡情欣賞沈萬三個故居沈廳，由明朝開國元勛徐達個弟弟建造個，可以坐船直接入室個張廳等水鄉建築。上海市也辣此地附近個湖邊浪興建了「雲海度假村」、「楓丹雙橋度假村」、「申江大酒店」、「上海大觀園」等休閒遊樂場所。

周莊於2003年拔評為中國歷史文化名鎮。