宁波市
中国浙江省个地级市 From Wikipedia, the free encyclopedia
Remove ads
寧波（
讀音，國際音標：nʲiŋ˩˨ pɐʊ˦˨或者nʲiŋ˩˨ poʔ˥），簡稱甬，候着也簡稱寧，是東亞臨近東海個一個城市。乃遭屬中華人民共和國浙江省管轄，也是浙江省第二大城市，全市陸地面積9365.58平方公里，人口有得800.5萬（2017）。寧波來勒浙江省東北半邊，杭州灣個南半邊。西搭紹興接牢，南半邊搭台州挨勒眼，東搭舟山隔勒一道海。寧波人講個閒話是主要是屬於吳語太湖片甬江小片個寧波閒話。寧波箇晌里是國家計劃單列市，長三角南翼經濟中心。寧波-舟山港是世界高頭貨運吞吐量頂大個港口，也是中國第三大個集裝箱港口。
Remove ads
歷史
遠古介到隋朝
寧波個歷史堪悠久，是吳越地區頭一批城市之一。石器時代，寧波地區就已經有人類活動當。公元前7000年古越人個河姆渡文明就來宕面誕生。大量栽培稻穀、耕作農具、干欄式建築遺存搭仔家養牲畜遺骨，還有原始宗教用品來河姆渡遺蹟出土。該眼文化遺蹟證明，來7000年前頭，寧波來的個寧紹平原東半邊已經有人類活動的，並且達到一定個文明水平。
寧波個行政區域來該段辰光一直來該變，但是完整個地域概念始終沒形成。夏辰光，寧波來的個塢處謳做鄞。春秋辰光，寧波為越國地。該辰光，越王勾踐曾來今慈城鎮境內建勒只句章城的，成為寧波境內頂頂早個城池。戰國中期後頭，寧波來的個塢處成為楚國轄地。公園前221年，秦搭六國統一仔，寧波地區屬會稽郡，置鄞、鄮、句章3縣（一說鄞、鄮、句章、餘姚4縣）。西漢初年辰光，寧波來的個會稽郡曾經屬於荊國搭吳國。七國之亂平定以後，會稽郡恢復。589年（隋開皇九年)，句章、鄞、鄮、餘姚4縣並為句章縣，設治小溪，隸屬吳州（即會稽郡）。
來三國兩晉南北朝時期，佛教開始影響寧波。甬上頂早個佛寺普濟寺就建勒三國時期，現今個兩大佛寺阿育王寺搭天童寺也好回溯勒東晉。寧波個海防也從該個辰光開始。132年（西漢陽嘉元年），為防範曾旌起義軍，浹口（今鎮海口）頭一埭設戍駐兵。而來起頭個春秋時期，句章港已經成為重要軍港的。
唐代介到元代
明州（寧波）正式制是來唐朝個738年。當代寧波個市域範圍來該辰光已經基本確定該，交關多寧波城市延續至今個建築搭地名也是從該辰光介來個。821年（長慶元年），明州個州治遷勒三江口的，內城也修好的，標誌寧波建城個開始。唐子城個南城門乃界是寧波鼓樓。來該前頭，明州城內外天封塔、靈橋、它山堰等重要建築搭工程都整建好的。該里向，交關多工程經過歷代修繕重建，得以保留勒今日。做辰光，寧波港成為全國主要個對外貿易港口，對外交流日益繁榮，以遣唐使、佛教交流為代表個對日交流搭對外貿易呈現出繁榮態勢，搭揚州，廣州聚隊成為東亞頂大個港口。
宋代，明州經濟得到進一步發展。隨勒以王安石為代表個一批文人官員個上任，明州個文化教育開始發展，經世實用個世風開始形成。特別是南宋建都臨安後頭，依靠挨近首都個地理優勢搭長期個貿易傳統，明州文教搭對外交流一度達到鼎盛。伴隨江南個開發，明州（慶元）個對外貿易搭港口也進一步發展，其標誌為999年（北宋咸平二年），明州市舶司個成立，起海關作用。該後頭，隨勒契丹搭西夏對北宋疆域個進犯，北方港口式微，明州港作為江南港口，地位愈加重要，搭高麗、日本、還有別樣國家統擁有貿易搭文化交流。日本佛教臨濟宗、曹洞宗和總從明州介傳勒日本去該。來航海過程當中，福建介傳來個媽祖信仰來寧波得到傳承，並成為宋朝個官方神靈。
忽必烈定都北京後頭，南宋將領張世傑來慶元抵抗蒙古入侵失利，敗走。但是，抵抗元朝統治個鬥爭沒斷過，一定程度高頭有影響寧波地區個商業發展。但是由於元朝沒抑商，又由於所轄疆域廣大，貿易通路便捷，該辰光個對外貿易仍舊有蠻大個發展，慶元市舶司一度下轄溫州、上海、澉浦多塔市舶機構並直屬於中書省。元末，方國珍割據寧波，1367年（元至正二十七年）12月歸降朱元璋，慶元路名字重新改轉成明州府。
明清時期（1840年前頭）
為避國號諱，1381年（明洪武14年）3月20日，明州因轄有定海縣，取「海定則波寧」之義，更名為寧波，該一地名一直沿用勒今日。明初，寧波設有寧波市舶司，為全國三座市舶司之一，搭日本、朝鮮個官方貿易仍舊繼續來做，寧波成為中日勘合貿易個唯一港口。但是，東南沿海倭寇日益猖獗，為此，明朝政府加強海禁，同時搭島高頭庉個人和總遷勒內陸，市舶司也屢建屢廢，極大影響寧波個對外貿易。晚明，葡萄牙來雙嶼港（來今六橫島）個走私貿易一度繁榮，客觀上也促進寧波個對外交流。由於打擊倭寇個需要，戚繼光搭俞大猷等抗倭名將來寧波作戰多回，交關多海防設施個遺蹟保留勒今日。明代萬曆、天啟年間，寧波幫開始崛起的，來京師成立會館組織，日後逐漸成為全國十大商幫之一。
1645年（清順治二年），寧波明代官員降清。此後，張蒼水在寧波堅持反清長達20年。為勒鎮壓反清運動，清政府頒布遷海令並實施海禁政策，該一政策使得寧波對外貿易損失慘重。直至1679年（康熙二十三年），海禁還只解除，但乾隆年間，海禁重開。來海禁比較鬆弛個時期，日本也實施鎖國政策，箇拉經由寧波個中日貿易沒像閒早介興盛，但是寧波搭西方國家個貿易卻日漸繁榮，早期傳教士開始來寧波活動。黃宗羲、全祖望等聞名全國個大學者創立浙東學派，對後世影響犯關。做一時期，寧波商人作為十大商幫中個重要組成部分，開始影響全國。
近代（1840年 - 1949年）
1840年，第一趟鴉片戰爭爆發，定海、鎮海搭寧波別樣塢宕相繼失守。1840年介到1842年，寧波居民利用各種方式抵抗，清政府也曾派遣奕經率領個官軍試圖收復寧波，但和總輸掉。《南京條約》簽訂好仔，寧波開闢為通商口岸，外資個迅速進入，官吏個腐敗搭仔太平天國個戰亂使得寧波本土經濟凋敝。該辰光，寧波商人大筆頭前往上海，並緩泛來金融搭眾多實業領域占據領導地位，滬上寧波人成為上海個重要族群。寧波本地也來西方搭洋務運動個影響下底慢慢較近代化，並來中法戰爭當中打贏鎮海之戰。
中華民國時期，寧波經歷巨大個動盪。民國初年個軍閥混戰讓寧波政局一度沒穩，一直到20世紀30年代還只好算有眼緩解。該時節，寧波個城市面貌有蠻大個改觀，交關多現代市政設施興建起來的。抗日戰爭時節，日軍來寧波實施細菌戰，造成寧波市中心一百多人死掉的。面對侵略，寧波人也來的反抗。國貨運動彰顯寧波人愛國熱情，促進本土商人個發展。做一辰光，上海個寧波商幫也經歷比較大個波折。抗戰前頭是寧波商人黃金時期，但是，隨勒日本滲透上海，寧波商人個經濟地位慢較開始走下坡路。1945年抗日戰爭結束仔，中國大陸嚴重個通貨膨脹搭仔內戰導致部分寧波商人陸續遷往香港、台灣搭美國，繼續發展。
當代（1949年 - 今日）
中華人民共和國成立後頭，寧波行政區劃發生蠻大變化。老底子來該個交關多制度廢除掉的，寧波成為重要個海防前哨搭仔軍事要地。搭中國大陸別樣地區做樣，各種政治運動席捲寧波。1956年5612號風水登陸辰光，因為片面強調保證豐收，導致救援不力，象山縣3500人橫里死勒風水天價里向。文化大革命時期，餘姚發生震驚全國個武鬥事件，造成堪大傷亡。
改革開放後頭，寧波經濟開始依託港口搭個體私營經濟迅速發展，慢慢較進入中國大陸各城市前列的。1984年，鄧小平提出「搭含天下個『寧波幫』和總動員起來建設寧波」（「把全世界的『寧波幫』都動員起來建設寧波」）個口號，來海外取得成就個寧波幫人士該辰光來包玉剛該些人個帶動下底開始支持家鄉建設。來寧波幫、寧波本地企業家搭政府三股力量個推動下底，寧波鄉鎮企業搭小型國有企業改制成民營或外資企業，形成特有個轉型模式的。寧波港也從內河港口介轉變為海港的，搭舟山港合帶攏個寧波-舟山港吞吐量位居世界第一。臨港加工業成為寧波經濟個重要支柱。進入21世紀仔，寧波已經成為長江三角洲地區重要個經濟中心搭浙江發展海洋經濟個核心區當。
Remove ads
地理搭氣候
寧波市位於東經120°55'搭122°16'，北緯28°51'搭30°33'之間，東臨東海，靠舟山群島。北臨杭州灣搭嘉興、上海相望，西半邊搭紹興相接，南半邊搭台州挨攏，陸地總面積9816平方公里，海域面積9758平方公里，岸線總長1562公里，該當中陸上長788公里，島嶼岸線長774公里，岸線總長好占浙江全省三分之一。
地質地貌
寧波個位置來浙東低山丘陵東北半邊，市域西南為丘陵，東部靠海。山地、丘陵各占市域面積兩成，平原占四成，谷地占一成。境內平原有得堆積平原搭剝蝕平原兩種類型，該當中堆積平原位於市域中部、北部搭港灣兩岸；剝蝕平原大多位於餘姚西南搭仔寧海中部。頂大個平原為市域中部個寧波平原。市域北部個三北平原是市域內第二大平原，其面積由於北宋以來個大面積築塘，因此慢較擴大。市域內頂大個兩隻半島為穿山半島搭象山半島，隔勒象山港相望。市域內主要山脈有四明山搭仔天台山。四明山是天台山脈個支脈，來寧波境內從北介往南穿過餘姚、海曙搭奉化。天台山來寧波境內個支脈除脫四明山，別樣4大分支從寧海西北、西南介進入寧波，延伸勒北侖、鎮海。境內頂高峰是位於餘姚南半邊個青虎灣崗，海拔979米。海拔500米以上，1000米以下個山地多來勒市域西南，而海拔500米以下個丘陵多分布於寧海、象山、象山港搭姚江沿岸。
寧波地貌形成於中生代時期。侏羅紀燕山運動帶來個強烈火山活動，使得寧波個地貌特徵基本形成。白堊紀時期，東北方向斷裂下陷，造成低洼地帶堆積。喜馬拉雅運動早期，陸地大幅抬升，盆地擴大，東部海岸線基本形成。後叟經多回個海侵搭海退，形成海積平原並發育形成新個陸地，壓末形成該晌個地貌景觀。
水文
寧波境內河網密布，主要個水系是甬江水系，好占流域面積個59%。主要入海個河流有甬江、姚江搭仔奉化江。姚江搭奉化江來三江口合流仔還只開始謳甬江。甬江河口呈喇叭形，有明顯個潮汐現象。姚江大閘建好仔，潮流量銳減，箇拉產生明顯淤積，嘦人工搭渠疏浚。姚江發源勒四明山夏家嶺，從四明湖水庫介流過仔搭浙東運河匯合，再從招寶山介流進東海，是寧波歷史高頭個重要航道。奉化江個幹流為剡江，發源勒四明山大灣崗，再東流進亭下水庫到江口，依路搭東江還有鄞江匯合，頂壓末往北流勒寧波三江口搭姚江匯合。整個寧波地區河網密布，灌溉、供水、航運、排澇交關便當。
寧波個海岸線長漫漫，大陸海岸線從餘姚西三閘介一直到寧海旗門港，總長有得788公里。甬江口以北個岸線相對平直，多為泥質、沙質海岸。甬江口以南個岸線比較曲折，多為岩岸、泥質岸相間。杭州灣來勒市域個北端，是錢塘江個河口，扇形介凸出。象山港來勒大陸海岸線個當中央央，穿山半島搭象山半島之間，是狹長個半封閉海灣，生態條件優越，適宜海洋生物生存。三門灣來勒市域南端，適宜海塗養殖，也話仔是浙東海防門戶。沿海潮汐屬非正規個半日期潮型，甬江、象山港、三門灣個潮差自北向南介遞增。
寧波境內大小島嶼亨末冷有得531隻，面積524.07平方公里，當中絕大多數為面積小於0.5平方公里個小島。市域內頂大個島嶼是南田島，來象山縣，面積90平方公里。面積超過20平方公里個島嶼除出南田島還有高塘島、大榭島搭梅山島。重要個列島有泗礁列島、韭山列島、漁山列島、三岳山列島等。該里向，漁山列島當中個五虎礁為中國領海基點之一，韭山列島個部分區域立為國家級自然保護區。
Remove ads
行政搭區劃
寧波市是一個副省級城市，畀寧波市政府管理。現任中共寧波市委書記是彭佳學，市長是裘東耀。
寧波市現轄6市轄區，2縣級市，2縣。鄞州、海曙、江北、鎮海、北侖、奉化是寧波個市轄區，慈谿、餘姚為寧波下底個縣級市，寧海、象山為寧波下底個縣。另外，鎮海區個寧波石化經濟技術開發區、鄞州區個寧波國家高新技術產業開發區搭寧波東錢湖旅遊度假區、奉化區個寧波溪口雪竇山風景名勝區搭仔慈谿市個寧波杭州灣新區沒來行政區劃里向，但分別來所轄個區域裡向賅縣一級個社會行政管理職能。2010年，寧波開展衛星城市試點，截至2011年年末，一塌刮子有餘姚泗門鎮、慈谿觀海衛鎮搭周巷鎮、奉化溪口鎮、寧海西店鎮、象山石浦鎮、海曙集士港鎮、江北慈城鎮8個鎮賦予部分縣級經濟社會管理權限的。
歷史高頭，今舟山市也是畀寧波管轄個，箇拉舟山也講寧波閒話。1953年3月，定海、普陀、岱山搭當時屬於江蘇省個嵊泗部分島嶼成立舟山專區，後頭來改地級舟山市。
經濟
寧波是交關重要個經濟中心搭港口城市。歷史上頭，七世紀開始寧波已經搭外國做貿易。寧波該晌是交關重要個出口港，出口個貨物包括消費品，電子商品，紡織品，食品搭工業品等。
寧波-舟山港是該晌世界貨物吞吐量頂大個港口，地位交關重要。
文化
寧波一到里是中國傳統文化發達之地。自宋代王安石任鄞縣縣令，發展文教以來，寧波歷代產生一系列有影響個學派搭一批重要個大學者，來哲學、史學等方面頗有建樹，並對日本等近鄰國家產生一定個影響。閒話講轉，寧波文化也受到海洋文化搭仔長期經商傳統個影響，該眼影響來民俗、飲食等方面表現勒比較明顯。另外，五口通商、還有寧波商人搭西方個交流也使寧波文化受到西方文化個一定影響。
學派
寧波個學術文化好追溯勒北宋慶曆年間。該辰光，楊適、杜醇、樓郁、王致、王說五位大學者成為寧波學術文化頂早個代表，史稱「四明慶曆五先生」。王安石創立鄞縣縣學，邀請五先生講學，寧波學術活動開始繁盛。南宋時，寧波人楊簡、袁燮、舒璘、沈煥搭陸九淵個心學發展起來，並來月湖講學，吸引大批門人，形成四明學派。該里向楊簡對後世個學術影響頂大。楊簡搭心學溯源勒孔孟，提出「吾心即道」、「永在人心」、「良知良能」、「公心為政」四說。
明代，餘姚思想家王守仁（陽明）繼承陸九淵「心即理」個講法，提出「知行合一」、「致良知」以達到「萬物一體」個境界。王陽明有姓名好考證個弟子有得3000多人，該里向餘姚王學一傳弟子32人，形成姚江學派。其後學對王學個發展奠定下日浙東學派個基礎。王陽明個學說經過日本人中江藤樹搭餘姚人朱之瑜（舜水）個傳播，形成日本個「陽明學」。
清代，餘姚學者黃宗羲受到老師劉宗周個王學影響，進而擺脫王學，形成「盈天地皆氣」個哲學思想。黃宗羲個著作《明夷待訪錄》來政治、經濟、法律、軍事、教育等方面多有論述，體現「民本」個思想。另外，黃宗羲來天文、地理、數學、藝術、宗教等方面也有一定個研究。54歲以後，黃宗羲來浙江各城市講學，該里向，來寧波講學影響頂大，亨末冷有得從學者百餘人，該其中高足18名。該讓寧波成為浙東學派個發祥地，著名後學有萬斯大、萬斯同、全祖望等人。
民間故事
寧波是中國著名民間故事梁祝傳說個發源地之一。根據唐代張讀《宣室志》記載個梁祝故事，梁山伯曾任鄮縣縣令，亡於任上。祝英台出嫁辰光途經梁墓，痛哭以至地陷，遂合葬，稱「義婦冢」。梁山伯廟搭墓位於今海曙區高橋鎮，據民國《鄞縣通志》載，廟建於晉代，宋、明、清、民國曾多次修繕。民間有「若要夫妻同到老，梁山伯廟到一到」個俗語，並形成每年三月初一、八月十六賽會搭八月初七坐夜香會個習俗，同時形成梁山伯護佑康王趙構、梁祝結髮等相關傳說。1999年，以梁山伯廟為中心個梁祝文化公園建成，成為一𡍲愛情主題公園。
除脫梁祝傳說，歷代寧波人也創作出各種各樣個民間故事，涵蓋人物、地理、風速、土特產等各個方面。該里向個徐福東渡傳說搭布袋和尚傳說，搭梁祝傳說聚隊列進中國國家級非物質文化遺產名錄。
戲曲曲藝
寧波個地方劇種有得甬劇、姚劇、平調該眼，外來主要劇種有得越劇、京劇、紹劇該眼。甬劇是寧波本土戲劇，形成勒清乾隆年間，來田頭山歌、唱新聞個基礎高頭吸收馬燈調等民間曲調形成。頂早是只為消閒個清唱，後受到別樣劇種影響加上表演搭伴奏，逐步形成自身個表演風格。傳統作品有《半把剪刀》、《天要落雨娘要嫁》、《借妻》等。藝術特點為形式自由，表演細膩，貼近生活，民間詞彙豐富。寧波市甬劇團為市內主要表演團體。越劇前身「的篤班」於1906年傳勒寧波。此後，越劇在寧波受到了極大個歡迎。寧波市越劇團為市內重要個越劇表演團體，曾多次承擔對外演出任務。
寧波地方曲藝主要有四明南詞、寧波走書、唱新聞等，頂早多為農閒娛樂，後成為賣藝人謀生技藝。演唱材料多為改編後個社會新聞搭民間故事，經過藝人不斷完善形成。四明南詞由民間唱曲發展而成，辭章華麗，曲調高雅，多來喜慶場合演唱。寧波走書由一唱一和式個田頭山歌發展而來，多以四弦琴伴奏，因表演時動作幅度較大而得名。唱新聞由唱「朝報」（官方新聞）演變而來，後來成為盲人來航船上演唱個曲藝形式，箇晌已停唱。
列入國家級非物質文化遺產名錄個寧波戲曲、曲藝有甬劇、姚劇、寧海平調、四明南詞、寧波走書。
Remove ads
名人
交關多個名人是寧波介出來個，還有蠻多人祖宗個屋落寧波來的。
- 潘天壽，國畫家。
- 周信芳，京劇藝術家。
- 沙孟海，書法家。
景點
- 天一閣，寧波頂有名個景點， 天一閣藏書館 (每日天亮8：00到下半日4：30開放; 門票30塊，馱老年證好免費)，來勒湖西河個旁邊。天一閣是1516年造好個，是東亞該晌還來當個頂早個圖書館。明朝個范欽有收藏交關多版制書，手抄儒家經典，還有眼歷史書，辰光好追溯勒11世紀。該晌儂好來勒藏書樓外頭個花園搭外屋參觀。還好看張交關多有名個石刻。景點裡向還有麻將博物館。
- 保國寺
- 天封塔
- 阿育王廟
- 天童廟
- 蔣介石屋落
- 天一廣場
招寶山大橋
天一廣場
中法戰爭鎮海之役勝利紀念碑
參考資料
Wikiwand - on
Seamless Wikipedia browsing. On steroids.
Remove ads