徐家汇

徐家汇（上海吴语国际音标表示为[ʑìkᴀ̋ɦuᴇ᷆]）是俫东亚上海徐汇区个高知名度地区搭商业中心，可以泛指北到广元路，东到宛平路、宛平南路，西到宜山北路，南到南丹路搭仔斜土路个地段。渠是上海个四大副中心交十大商圈之一。地区内弗单有大量经营奢侈品、中高档服饰、电脑电子设备等产品个商店，也有得各种娱乐、餐饮行业商家。

徐家汇日景

徐家汇夜景

乃朝个徐家汇商圈，弗单是一个高楼大厦鳞次栉比，人来人往交关闹猛个城市主要副中心，也是休闲娱乐、宗教活动、美食林立、白领办公搭观光旅游个主要场所。

历史

1920年代个徐家汇

徐家汇个形成好上溯到明代。晚明著名科家家徐光启曾勒个里建立农庄，从事农业实验咾著书立说，死脱后头就埋徕个里。渠个后辈勒此地繁衍生息，初名“徐家厍”，慢慢叫成集镇。其地处蒲汇塘、肇嘉浜搭李漎泾三水汇合处，又因徐氏家族汇居于此，乃末勒清康熙年间得名徐家汇^[1]。

徐家汇是上海天主敎发源地。1842年天主敎耶稣会重新来华后，勒1847年选中徐家汇建立江南传敎区个总部，慢慢较建成包括大、小男修道院，2所女修道院（拯亡会搭圣衣会），藏书楼，气象台，土山湾印书馆，男子中学，女子中学，育婴堂等等一系列机构，形成一大片敎会区。以此为基地，担敎务开展到江苏、安徽2省。1851年建立了一座公用个中型敎堂圣依纳爵座堂，外形属于希腊风格，可能是中国第一所西式敎堂。敎堂以耶稣会个创始人依纳爵命名。乃朝看见个哥特式大敎堂来勒1906年—1910年建立，当时畀人称为远东第一天主敎堂，可以同时接纳2,500名信徒。敎堂钟楼高50多米，勒1920年代以前曾经是上海顶高个建筑物。

敎会养大个大批孤儿，长大后交关定居勒南侧个土山湾，告咾徐家汇一带个人口也逐渐增加，形成集镇。

1896年，盛宣怀勒徐家汇集镇个北侧，开办了著名个南洋公学，即后首来个交通大学。法籍耶稣会士南格禄创办个徐汇公学，天主敎徒马相伯创办个天主敎震旦大学个初期校址，也侪勒拉徐家汇。

1860年代太平天国战争期间，英法两国租界分别修筑仔通往徐家汇个越界筑路，后来命名为海格路搭徐家汇路，即今朝个华山路搭肇嘉浜路。1908年，勒拉大敎堂修筑期间，法国商人开通从上海法租界经过宝昌路（几年后改名霞飞路）搭姚主敎路（天平路）直抵徐家汇个有轨电车线路。1914年，上海法租界大扩展，西面个界限一直到徐家汇个东侧。敎会区仍属于华界。新扩展个法新租界地区隔手建成上海主要个高级住宅区，又新开辟了一条直通徐家汇个景色优美个林荫大道贝当路。两者之间形成重要个交通枢纽。店铺也开始增多，慢慢较发展成城市。之后勒1921年，东方百代购下徐家汇路1434号地皮（现徐汇区衡山路811号，徐家汇公园内）设立唱片制造公司，建起上海第一座录音棚——现百代公司旧址^[2]。

1978年徐光启墓地重辟为南丹公园，并勒1983年徐光启逝世350周年个辰光，改名为光启公园^[2]。八十年代以后，徐家汇个高楼大厦开始增多，1991到1992年，汇联百货搭东方商厦先后开业^[2]，是徐家汇商圈乃朝尚存个商场里向较早开业个百货公司。原徐家汇天主堂前个西区长途汽车站也畀伊拆脱。1997年，美罗城勒原先徐汇剧场个土地上建成营业。1999年，港汇广场建成启用^[2]。随着进年个发展，徐家汇已经成为仔上海一个重要个商业中心搭文化重镇。

现状

商业

徐家汇商业区

夜到个徐家汇

徐家汇个高楼群

徐家汇个商业主要以名牌服饰、奢侈品搭仔计算机、数码产品为主，整个商业区个格调趋向于高端化。徐家汇个主流消费人群是白领、年轻人、电子产品爱好者搭仔游客。勒服饰、奢侈品方面，徐家汇拥有东方商厦、港汇广场、太平洋百货、汇金百货等高端品牌，而勒一般个服饰方面则有汇联百货、市六百货等等。徐家汇个服装价格普遍偏高，主要面向消费水平较高个消费者，同时也吸引了来上海进行购物游个一排外地游客。

徐家汇另外一个大个消费特色就是闹猛个电子产品市场，个𡍲坐落了有太平洋数码广场、百脑汇、中国大陆第一家百思买搭仔弗得了个手机连锁市场。蛮多上海市民勒购买手机、计算机、彩电等电子产品个辰光经常会得光顾徐家汇。外加，搭徐家汇勒服装产品方面较为高端个定位不同，徐家汇个电子市场一直以优惠个价格吸引了众多消费者。

娱乐

徐家汇个娱乐也是属于整个上海市较为高端个水平。勒徐家汇个中心区域就坐落了三家电影院，包括两家五星级影院——永华电影城搭仔柯达电影世界，外加中共建政后个第一家电影院——衡山电影院，其建立于1951年^[3]。同时还拥有几座大型个游艺场所、健身中心等。

公园

徐家汇地区个主干道肇嘉浜路是通过填河而行成个。为仔改善徐家汇地区环境，徐汇区于2000年开始建设徐家汇公园，直至2003年竣工，其规模庞大，保留了橡胶厂烟囱、唱片厂办公楼，园中小桥流水。公园个设计布局按上海版图形状进行模仿，并有近200米长个天桥贯通^[4]。目前交关老建筑已经成为了高档消费场所，供顾客勒其中品茶赏园。

旅游

徐家汇作为一个历史悠久个地区，旅游资源也慢慢较开发出来。2012年，徐家汇个“徐家汇源”景区畀伊批准为国家4A级旅游景区，成为上海头一个开放型都市旅游景区^[5]。徐家汇源共总有14个景点，包括像徐家汇藏书楼一类个历史建筑也包括像钱学森图书馆搭董浩云航运博物馆一类个展览博物馆。景区采取“预约参观”模式，参观者可勒景区游客中心免费领取“徐家汇源景区旅游联票”^[5]。2013年12月8号，徐家汇观象台也开始开放参观^[6]。徐家汇源游客中心来勒漕溪北路90号，景区由上海徐家汇源旅游发展有限公司负责管理。

有名个建筑

徐家汇是一个可以帮助人老好了解上海个过去、现在搭将来个一个场许，大批弗同年代、弗同风格个建筑物比邻而立。

1949年之前

• 徐光启墓（光启公园内）
• 徐家汇圣依纳爵主敎座堂
• 徐家汇藏书楼
• 徐家汇圣衣院（上影集团亚太电影会所）
• 大修道院（徐汇区政府）
• 百代公司旧址（百代小红楼）
• 徐家汇圣母院（今上海老站）
• 徐家汇观象台
• 徐汇中学
• 南洋公学（上海交通大学）
• 启明女校（上海第四中学）
• 贝当公寓

• 
  徐光启墓
• 
  百代公司旧址
• 
  徐家汇圣母院（今上海老站）
• 
  徐汇中学
• 
  徐家汇圣依纳爵主敎座堂
• 
  徐家汇圣衣院

1990年以后

• 港汇广场
• 美罗城
• 汇联商厦
• 建国宾馆
• 圣爱广场
• 上海实业大厦
• 徐家汇中心

• 
  太平洋百货
• 
  百思买
• 
  港汇广场
• 
  美罗城

参见

• 徐家汇圣依纳爵主教座堂
• 土山湾