明朝
中国一朝代 From Wikipedia, the free encyclopedia
Remove ads
明朝（公曆1368年1月23號—1644年4月25號）是中國歷史丄個朝代之一，攏總十六代皇帝，兩百七十六年。開國皇帝是明太祖高皇帝朱元璋，末代皇帝是明思宗烈皇帝朱由檢。居個朝代是趁元朝末期農民起義個辰光興起個，滅在滿族人手裡向（但是亦有流亡政權在中國南方活動，譬如南明、明鄭，朝鮮國也擔渠場自望成功明朝個藩屬國）。國家領土伉今朝個漢地十八省差弗多，並伉今東北地區有軍事機構奴兒干都司。居個朝代是漢人建立個壓末只朝代。在明朝個辰光，皇帝個權力交關集中，原本實行著蠻多年數個丞相制度，在明朝廢脫。蓋咾專制也是家常便飯。明朝按照理學治理國家，妝八股取士，對外戰略收縮，對內加緊漢化西南地區土著民族。明朝個首都在北京順天府，當時亦謳京師；陪都是南京應天府，是頂早辰光個首都。
𪥸拿箇篇文章搭明天弄錯。
.svg)
明朝辰光吳越在行政、商業方面全受著打壓，造成功蘇州咾排場許個居民強制移民到鳳陽搭江淮地區。同時為供給明朝個首都順天府。吳越貤每年提供大部分維持大一統帝國個漕運糧餉。吳越老百姓承受個稅賦，是在整個明朝當中頂頂高個。弗過，因為吳越官僚在文化高頭個優勢，文化搭經濟重心也一直在吳越。造成空談搭弗務正業個文人成為迭個辰光個時代主流。
Remove ads
國號
朱重八定個國號叫大明，表示承襲自小明王韓林兒個號，貤稱作皇明，史稱明朝、明代。 朱元璋手下有一部分明教徒，用「明」作國號以示自家個正統地位，也同時應搭明教當中個「明王出世」預言貼近。其次，用明昰個詞彙喻火，根據五德終始說，表示明朝取代元朝，是以火克金。同時應為皇帝姓朱，貤叫做朱明。1644年北京畀流寇攻克之後，南方個明帝國皇親國戚，在官僚搭軍閥個推舉下，先後建立各類政權，渠場全沿用明帝國個國號，後世擔迭些小朝廷叫做南明。
統治集團
明朝個統治集團，主要由三批人組成。分別是朱明皇親、權貴功勳搭文官士紳。茲三批人壟斷明帝國控制下大部分個財富、文化搭權利。明帝國個統治者為統治龐大個大一統帝國，通過科舉個方式，讓一眼地主晉升統治集團，維持人口階層個流動性。在200許年個辰光里向，套方法全取得成功，個也是朱元璋對帝國頂大個貢獻。
朱家子孫
帝國建立之後，朱元璋效仿老早個帝王，對自家個後代定落一系列規矩。為著防止大臣叛亂，朱元璋宣布分封渠個兒子。弗過分封制度完全搭大一統官僚政治違背。蓋咾朱元璋早期為著平衡兩者關係，擔自家個兒子大多數封到九邊重鎮去著。比方講：代王封到大同，燕王封到北平。分封到當地個藩王，擁有財政軍個大權，基本丄是獨立王國。昰個做法在朱元璋在許個辰光還好，等到渠死脫著之後，逐漸畀後續個統治者慢慢然改革，到朱棣統治個辰光，藩王個權利越來越小，但數目越來越多。為防止渠場謀反，貤弗違背朱元璋個意願，後來個明朝皇帝對渠場個宗室兩極化來險，一方面剝奪渠場所有個行政軍事權利，讓渠場在封地丄何物也弗好妝，貤弗允許渠場擅自離開封地。另一方面，貤無減封制度，王事繁衍增多，全由政府買單。在昰個弗可思議個制度下，明朝個宗室除脫繁衍也無何物值得一講個內容。在明武宗辰光叛亂過個寧王算是一個反例。到明朝末年，宗室人口已經有兩百多萬，消耗明朝大量財政收入。明末流寇興起，大量宗室畀渠場滅門。其餘貤遭受後首滿洲帝國屠殺，留落來個寥寥無幾。
淮西權貴
朱元璋打天下，靠個是渠場老鄉，也就是㬮朝安徽淮河以南，長江以北個軍隊。在戰爭當中，個批人有交關建立著功勳，蓋咾到開國之後，封渠場為公爵，侯爵。常遇春，徐達等人，全有老大個封賞。洪武初年，淮西權貴壟斷著明帝國大部分重要個職位，成為著朱明統治集團里向弗可缺少個一隻重要組成部分。淮西個鳳陽在昰個辰光也是門庭若市，家家戶戶全有親戚做大官。弗過從洪武中期辰光開始，朱元璋為防止權貴對渠個江山產生威脅，逐步削弱渠場個權利；到後期，貤動用恐怖手段，殺脫著幾萬權貴搭渠場個親戚，比方藍玉就畀渠殺脫，李善長也難逃一死。到朱元璋死個辰光，只有相幫渠鎮壓雲南地區個沐英還掌握雲南地區一定個權利。聽落個弗是畀渠殺脫，就是徹底喪失權利，淪為坐吃山空個浪蕩子著。到朱棣辰光，因為篡位個關係，對老早支持建文帝個勛貴後代打壓越加明顯，勛貴徹底淪為一種擺設，基本退出明朝個統治實權階層著。弗過在經濟丄，勛貴還是有大險大個優勢，橫行鄉里，收攏家奴全是家常便飯，居個也成為著一個嚴重險個社會問題。
江南士紳
朱元璋雖然邪氣嫌鄙江南人，但為著讓帝國穩定落來，渠老早就大搞八股取士。種文化考試制度，讓從唐朝就開始繁榮個東南地區占到邪氣大個優勢，尤其是江南五府為主個吳越地區，更是通過科舉產生著無數世代為官個大家族。明朝科舉兩百多年裡向，江南人壟斷至少三分之一個進士一直是一隻常態；到明朝末年，江南士紳長期處於內閣個核心地位，徐階、申時行、王錫爵先後出任首輔。江南紹興個王守仁創立心學，讓江南在學術搭官僚系統當中全具備絕對個統治力。江南發達個經濟加上科舉個得意，讓江南士紳在明朝個中後期成功成為明帝國個統治集團一部分，擔自家個命運搭帝國個命運聯繫在一淘，蓋咾產生著明朝末年個東林黨、復社等組織。弗過，雖然江南士紳成功成為著統治集團個一份子，但渠場個地位比較推板，並無宗藩搭勛貴個世襲保障。還要經常受到特務機關個迫害。居個也是官僚系統在統治階層里向真實地位個體現。
Remove ads
歷史
朱家大一統
在蒙古人建立個元帝國挨末階段，蒙古貴族對整隻帝國個掌控開始力弗從心。在交關場許，渠場本生通過色目人建立個監察體系開始崩潰。此外，因得宮廷稅負弗足，貤開始大量發行紙鈔，帶來通貨膨脹，老百姓民弗聊生。激發怨言搭怒氣。到1351年，元順帝讓自家個親信賈魯去修黃河個水利，調集帝國各地個農民廿萬人到黃河周邊。激發居幫人個衝動。1351年五月，來自皖北黃泛區個白蓮教信徒韓山童搭劉福通造反，擔宗教當狗皮膏藥，自號明王（代表白蓮教信仰個明尊下凡),勾結交關農民，創立紅巾軍。之後， 淮西個村霸郭子興響應渠場個舉動，在淮西叛亂。之後攻占鳳陽。昰個辰光，教化子朱重八自家主動來投靠紅巾軍，因為會弄權術，曉得打仗。得到郭子興個信任，擔自家個養女許畀渠做老安。之後，朱重八離開鳳陽，開始發展自家個勢力。
1356年，朱元璋（已經從朱重八改名）偷襲集慶(㬮朝江蘇省南京市),擔此地改名叫應天府，作為自家個營盤。之後，採取收縮戰略，一面對元帝國獻媚，一面開始網絡各路流竄軍隊搭豪傑。到1360年，對西面個陳友諒勢力開站，獲勝。並且在1363年個鄱陽湖水戰當中擊潰陳友諒，吞併渠在洞庭湖南北個地盤。並對弗聽渠號令個湖南老百姓展開屠殺。之後，朱元璋藉口東面個張士誠對元帝國弗忠，開始侵略渠在吳越個地盤。到1367年，渠攻下平江府，擔張士誠殺脫，因為浙西個老百姓全相幫張士誠抵抗渠，朱元璋對此地個老百姓課重賦，並強制擔交關人移民到淮西鳳陽。之後，渠進兵浙東，擔統治當地個方國珍滅脫。
1368年正月，朱元璋在暗殺小明王之後，在南京自立為皇帝，居個便是後首來個明太祖。之後，渠馬上搭老早獻媚個元帝國翻面孔，讓自家個大將徐達開始北伐。元帝國基本弗曾抵抗就撤退到漠北。1371年，朱元璋貤滅脫重慶個明玉珍勢力，1381年，擔效忠元帝國並占領原大理國全境個元朝梁王滅脫，強制對當地進行殖民同化。昰個辰光，渠個大一統野心算是基本完成，讓東亞大陸大部分地區，貤變成一個大帝國哉。
洪武之治
朱元璋從小在社會底層生長，弗曾受過任何正規教育，對社會個發展搭經濟運行規律基本無概念。對官僚防備心邪氣重，更加痛恨商賈。蓋咾，渠在滅脫別個勢力之後，開始對商人進行打壓，先後擔交關吳越地區個富戶強制移民到南京，假使看弗順眼個，還要抄家充軍。之後，渠開始強制對人口進行編戶齊民並規定渠場個衣着，渠對定規矩興趣老大個，違反渠規矩個，全要殺脫。到晏年，渠更加恐懼淮西權貴對渠政權個威脅，就擔自家個兒子全分封到九邊重鎮當有實際權力個藩王。貤借因頭謀反，先後發起胡惟庸搭藍玉兩場大案。擔自家個老鄉淮西權貴集團基本全殺脫著。昰個事體在帝國文人個講述當中邪氣有名。
朱元璋對讀書人弗信任，但要利用渠場來維持自家個大一統帝國。所以，渠一方面尊崇孔孟之道，另外一方面，貤擔《孟子(書)》當中交關內容刪脫。並制定八股取士個辦法，擔讀書人個思維框煞，弗讓渠場有任何非分之想。對於弗肯搭渠合作個文人。渠採取強制措施，假使弗肯出山當渠個官僚，就擔昰個人屋裡個人捉牢甚至殺脫。昰個做法，貤牽連到交關人。
朱元璋晏年眼烏珠瞎脫，貤弗斷要求各地根據渠個《御製大浩》反貪污，鼓勵老百姓到南京來告狀，擔官員剝皮實草。渠死脫著之後，渠個皇太孫朱允炆繼位，改年號建文。昰個皇太孫，是歡喜儒家個一套妝法個。渠搭渠身邊個文人，譬如講齊泰、黃子澄之類，全覺著藩王權力忒大，就準備擔渠場做脫。弗過，事體做來弗煞根，讓朱元璋個第四個兒子燕王朱棣有機可趁。用所謂「清君側，靖內難」個名義叛亂，末腳占領南京，篡奪皇位。昰個就是靖難叛亂。
遷都北平
作為篡位個人物，朱棣專門想弄一眼偉業讓老百姓服貼渠。貤因為南京是渠篡位辰光攻擊過個場許，渠疑心當地百姓對渠弗忠心。蓋咾就製造輿論，外加開始在北平修紫禁城。以北平為中心個幽燕地區，是華北平原同草原個交界處，所以北平作為首都比南京能更加結棍個掌控全國走向。同時，為著彰顯自家個力道，渠四面發兵，進行擴張。一頭頻頻攻擊北元，另一方面，對南許個安南國(㬮朝越南)干涉內政，趁渠場內亂，擔此地收回。此外，還派渠個親信宦官鄭和帶領大批個船舶，走落到西洋去，宣傳明帝國個「天威」，同時還賺了麼佬佬大鈿。鄭和個活動，聽講還有尋建文帝個意味在里向。弗過，昰個活動，也無何實際結果。在遷都北平之後，紫禁城個三大殿就畀矐睒擊中燒脫，讓永樂皇帝悶悶弗樂，無幾許辰光，就在塞外死脫著。
朱棣死脫著之後，渠個長子朱高熾繼位，號明仁宗。渠當皇帝辰光歲數已經蠻高，本生想擔首都遷回南京。弗過過脫一年自家就死脫著。渠頂大個舉動是停脫著鄭和下西洋。明仁宗駕崩，渠個大兒子朱瞻基繼位，個就是後勢來個明宣宗。渠歡喜享樂，生活糜爛，邪氣歡喜斗蹔𧉆，畀老百姓叫做「促織天子」。同時，渠也搭渠場爹爹（da-da)一樣，信任宦官，讓王振之類個太監開始干預政治活動。1435年，明宣宗縱慾過度，在壯年就死脫，渠統治個段辰光，明帝國表面丄望起來還算強大，蓋咾後世個帝國文人拍馬屁，吹捧昰個辰光叫做仁宣之治。
收縮搭動盪
蹔𧉆天子明宣宗死脫之後，渠場兒子繼位，就是後首來個明英宗。昰個皇帝，繼位辰光小，邪氣相信自家個出窠兄弟宦官王振。王振利用昰個有利條件，開始干涉明帝國個朝政，到1442年，對王振有限制作用個張太皇太后四脫。個辰光，明英宗只有15歲，之後，王振開始越加濫權。到元老三楊死脫之後，王振徹底控制朝政。收買文人，吹捧自家叫做翁父，渠個興趣愛好搭別個宦官差弗多，就是受賄貪污之類，弗過因為是宦官，遭到後首來文人個口誅筆伐。
1435年，內亞個瓦剌部落擔交關蒙古部落兼併，開始對明帝國個九邊重鎮構成威脅。1449年，瓦剌個太師也先南下，進攻明帝國。王振為彰顯天威，教唆明英宗御駕親征，帶兵七八萬（號稱五十萬）離開北平，一路向西，來到王振個老家大同。並無搭蒙古人打仗，就畏首畏尾，要回撤。回去個道路當中，在土木堡畀蒙古人圍住，並徹底殲滅擊潰明帝國個天兵。明帝國自傲個軍隊，瞬間死脫一大半。個也是明朝立國之後頂頂嚴重個敗仗。王振畀人殺脫，明英宗畀蒙古人生擒，作為俘虜。
土木堡事變之後，瓦剌人乘勝追擊，圍住北平，個辰光，交關帝國大臣要求遷都到南京。弗過，效忠帝國個吳越人于謙(兵部侍郎）死活弗同意，在渠個運作下頭，讓明英宗個阿弟朱祁鈺繼位，個就是明代宗。改元景泰。渠讓于謙負責北平個防衛。于謙擔蒙古人擊敗，在之後兩年當中，多趟擔瓦剌部落擊退。之後，蒙古人服軟，1450年擔明英宗放回。弗過，因為明代宗弗肯接受明英宗復位，還擔渠軟禁在南宮。並擔皇太子朱見深廢脫。改立自家兒子朱見濟當太子。個之後，1457年，明英宗趁明代宗病危辰光發動政變，重新奪得皇位。渠場反過來軟禁明代宗，貤擔于謙殺脫。改元天順。昰個事體既反映統治集團反覆無常個內鬥，更表明為帝國賣命個吳越文人個悲慘結局。1464年，明英宗壯年暴斃，渠個兒子朱見深繼位，個就是後勢來個明憲宗，改元成化。
明憲宗是一個口吃，對朝政也嘸啥興趣，弗過因為開始辰光有樣學樣，擔于謙「平反」，貤獲得交關帝國文人拍馬，稱呼渠統治辰光叫做「成化新風」。實際浪，渠統治辰光，後宮一片亂象。明憲宗歡喜一個比渠大交關個女人，封渠叫做萬貴妃。昰個女人心狠手辣，擔懷上明憲宗後代個宮人全殺脫，只有一個明帝國抓到宮裡個苗族女人幫明憲宗生下後代，個就是後勢來個明孝宗。明憲宗歡喜各種娛樂活動，乃朝留有交關渠個行樂圖可以為證。渠還打開宦官特務政治，搞出西廠，同時，為收攬錢財，為自家使用，貤開設皇莊，嚴重擾亂老百姓個經濟生活。到晏年，貤迷信房中術搭煉丹，讓明帝國一片暗無天日。
1487年，明憲宗死脫，渠個兒子朱祐樘繼位，渠沒啥主見，弗過也弗迫害帝國官僚，所以得到文人眾口一致個吹捧，講渠是中興之令主」。實際浪，渠是在和稀泥。沒過幾年，就開始學習自家個爺爺搭爸爸，開始大肆揮霍。讓國庫入弗敷出。明帝國個財政，進一步惡化。弗過，文人為塑造典型，還是擔渠統治辰光吹成弘治中興。
荒唐皇帝
1505年明孝宗死脫之後，渠個兒子朱厚照即位，個就是後勢來個明武宗，改年號正德。昰個皇帝歡喜薄相，並弗擔文官集團擺在眼裡。渠邪氣崇信宦官，外加歡喜到處遊山玩水，文官集團弗肯讓渠御駕親征塞外，渠就替自家封只官職，叫威武大將軍朱壽。自家帶親信到塞外剿匪。渠統治期間，發生宦官劉瑾個專權搭寧王朱宸濠叛亂個大事體。弗過，全一一平定。個當中，吳越人王守仁出力大險。1520年，明武宗藉口要去討伐寧王，御駕親征到應天府。擔已經畀王守仁捉到此地個寧王押送回北平。回去個路浪，在南直隸趁船薄相個辰光落水染病，1521年在自家縱情糜爛個豹房駕崩。
明武宗一個兒子也沒，所以，大臣商議，讓明孝宗個侄子，興獻王個兒子朱厚熜繼承皇位，個就是後勢來個明世宗。明世宗繼位之後，擔年號改成功嘉靖。從渠開始，明朝進入中後期。
嘉靖帝繼位前期，為著擔自家爺娘追封成功皇帝，搭大臣個矛盾邪氣大，居個就是所謂個大禮議之爭。末腳，明世宗擔自家爺娘納入著皇帝系統。樁事體也讓明世宗有機會擔反對渠個文官搭宦官全調成功自家個親信。之後，明世宗開始弗上朝，長年在後宮煉丹。弗過，朝政還是牢牢捏在渠手裡。渠統治個後期，讓歡喜替渠寫青詞個嚴嵩，長期擔當內閣首輔。嚴嵩趁昰個便當，開始營造自家個勢力，渠場兒子嚴世藩貤加變本加厲，打壓反對自家個大臣。到阿末階段，帝國開始出現癱瘓跡象。北面個韃靼人開始進犯；南面因為長期海禁，導致吳越人、閩越人聯合日本海盜，形成所謂個倭寇，進行走私騷擾活動。有名個海瑞也是在嘉靖統治阿末階段出名個。嘉靖死脫之前，擔嚴嵩廢脫，並殺脫嚴世藩，用吳越人徐階取代。
張居正改革
1566嘉靖帝死脫之後，渠個兒子朱載垕繼位，個便是後勢來個明穆宗。因為渠改元隆慶。渠也因此叫做隆慶帝。明穆宗搭明孝宗有眼類似，是無何物主見個皇帝，蠻聽大臣言語。渠登基之後，讓徐階、高拱、張居正成為自家個內閣大臣。弗過，幫人自家先後內鬥，末腳，張居正成為文官權力鬥爭個勝利者。雖然高拱在隆慶末年回京出任首輔，弗過還是被張居正擊敗。隆慶辰光開始，張居正開始實踐自家個措施，北面對韃靼人進行冊封，在東南海面，開放貿易，弗再搞海禁，樁事體叫做隆慶開關。昰個兩樁事體，本生弗難，弗過明帝國個官僚體系效率低險，到昰個辰光，再有應對。從昰歇開始，因為皇帝弗大強勢，明帝國個江南(吳越地區)個文官，對帝國朝政個影響開始越來越大哉。
隆慶身體弗好，1572年中風駕崩。渠9歲個兒子朱翊鈞繼位，個就是後首來大名鼎鼎個明神宗。明神宗繼位之後，改元萬曆，蓋咾也好擔渠稱呼為萬曆帝。在渠統治個前期，張居正得到大宦官馮保個支持，繼續推行自家個改革。渠個做法，主要是加強皇權，增加大一統帝國個稅賦。並重新丈量土地，打壓士紳階層；蓋咾得罪著交關利益相關群體。渠搭戚繼光關係邪好，喊戚繼光領牢著吳越人組成個軍隊到九邊重鎮作為帝國個邊境部隊。弗過，張居正也是一個邪氣濫權個大臣，做過交關授人以柄個事體。1582年，張居正死脫，之後，渠就畀萬曆帝反攻倒算，滿門吞沒。
萬曆亂政
張居正死脫之後，萬曆再算真正開始親政。因為之前放開海禁個緣故，在渠當政開始許歇，明帝國在東南面個各個行省飛速繁榮。積累之前兩百年根本弗可能積累得著個財富。弗過，萬曆自家並無幾許當皇帝個興趣。在幾十年當中，紫禁城只有出過兩三趟，外加全是去看自家個墓。渠因為自家個太子問題，搭大部分大臣關係邪氣緊張。到1601年，再擔朱常洛封成太子，讓自家寵幸個鄭貴妃生個兒子朱常洵封成功福王。為著報復大臣，渠從1587年開始就弗上朝，整日沉浸在花天酒地當中，並大興土木。渠為著彌補自家個消費，貤派宦官到處搜刮稅賦，讓明帝國本生有眼放鬆個財政開始吃緊。此外，因得交關吳越地區個文人把持朝政，對江南地區個稅賦有所放鬆，蓋咾明帝國大部分個財政開始一視同仁追加到各個省份；昰點讓交關內亞地區個平民開始覺著壓力。萬曆帝弗對官僚系統個大臣任命做何物批示，交關年數之後，官僚當中交關位置全出現著空缺，官僚自家個運轉，慢慢然開始出現問題。
在昰個辰光，江南官僚越來越多，渠場因為皇帝個弗作為搭自家力量個變強，開始要求越加大個話語權。為此，渠場用儒家個一套作為標準。1593年，東林黨形成。用自家個對官僚進行拉攏搭打擊，之後，交關別個朋黨也躥出來，相互進行文人攻擊。與此同時，因為明帝國控制力下降，交關地區發生著大規模戰爭。其中，以萬曆三大征頂有名，昰個三大征是：寧夏之役、朝鮮之役搭播州之役，其中對朝鮮個戰爭是保護自家個藩屬國弗畀日本吞併。對播州個戰役全科是想吞併居個地區本身個土司勢力。三場戰爭之後，明帝國獲得表面高頭個光彩，實際丄無任何好處，反倒暴露著自家個國力，國庫越加空虛。
在萬曆末年，東北亞個女真部落酋長努爾哈赤公開造反。自號天命汗，並在1619年個薩爾滸大戰當中，擊潰著明帝國個主力，從此讓明帝國在東北亞轉向戰略收縮。1620年，明神宗在驚恐當中死脫。渠個長子朱常洛繼位，個就是明光宗。弗過，無幾許辰光渠就因得縱慾過度病倒，並因為瀉藥搭紅丸死脫。個就是所謂個紅丸案。個之後，渠個兒子朱由校繼位，改年號天啟，個就是明熹宗。搖搖欲墜個明帝國，一年裡向調著三個天子。到昰個辰光真真是大廈將傾哉。
帝國滅亡
明熹宗基本弗曾受過正規教育，大大小小個事體，全聽自家奶嬸嬸客氏搭客氏個姘頭魏忠賢個言語。開始辰光，渠為著報答東林黨人保護渠登基，任用著大量東林黨個大臣。弗過，後首發覺幫人弗大肯聽自家言話，就失去著耐心，讓自家信任個大宦官魏忠賢干涉朝政。魏忠賢擔所有反對東林黨個勢力集結，形成閹黨。1624年，閹黨掌握實權，開始大肆樹立自家個威望並打擊東林黨。魏忠賢本人是一個毫無文化個村夫，邪氣歡喜面子丄個光彩，渠認交關帝國文人當過房兒子，還要求各地為自家修造生祠。弗過，渠對守備遼東個將領支持蠻大，渠掌權幾年，邊境事體比較少。1626年，北平發生王恭廠大爆炸，死脫靠兩萬人。第二年，明熹宗死脫，渠個阿弟朱由檢繼位，個就是明思宗，渠擔年號改叫崇禎。崇禎帝也是明帝國阿末一隻皇帝。
明思宗本人受儒家教條薰陶，一直認為要勵精圖治。渠登基之後，先擔魏忠賢殺脫，貤啟用東林黨個大臣當官。昰歇，文人全認為渠要成為中興之主。弗過，因為渠實際丄弗信任昰眼大臣，貤面臨邪氣巨大個內部危機，搭百官個關係馬上貤僵脫哉。崇禎二年，帝國西面個貧困省份陝西開始爆發民變。崇禎採取交關措施，調著交關將領到許場去圍剿。弗過，幫流寇用游擊戰策略，在內亞四面流竄，明帝國無辦法徹底擊潰。同時，關外個後金，在皇太極個領導下頭越來越強大。在1636年，擔國號改成大清，並定都奉天。成為著明帝國頂頂大個威脅。崇禎一直在安內搭攘外當中搖擺弗定，結果兩頭全失敗。1642年，松錦大戰之後，明帝國徹底喪失在關外個軍事存在（只有吳三桂個關寧軍），1643年，李自成破潼關，入西安，建立大順。1644年3月，李自成個流寇部隊從西安出發一路北進，所到個場許，明帝國部隊全投降。最後，攻破北進，朱由檢逃到煤山，上吊死脫。明帝國滅亡。
Remove ads
疆域
北面
在明朝建立個辰光，蒙古帝國個殘餘力量還在蒙古高原。為打擊對手，增加自家個合法性。明軍隊進攻過北元交關趟數，弗過效果弗大明顯。到明英宗辰光，貤搭西蒙古個韃靼搭瓦剌作戰，弗過昰個辰光開始，已經弗好主動出擊，尤其是明英宗災難性個失敗搭俘虜，讓明朝放棄進攻政策，開始收縮邊界。在15世紀30年代後，邊境南移。開始修造長城（當時名為邊牆，參見「明長城」）。在之後個兩百多年辰光里向，明朝搭蒙古個邊界就固定在長城丄。明朝為著管理長城，擔長城地區設置九邊重鎮（遼東、薊州、宣府、大同、延綏、寧夏、甘肅、太原、固原）加強防禦。
遼東
明朝開始個辰光，朱元璋在山海關以外設立遼東都司，控制遼東半島。昰個也是唐朝中期之後，中原人個帝國再次控制此地。在明朝開始個辰光，經常在女真部落當中炫耀武力，通過敕封土司個做法，遙控交關小部落，明成祖又設立東北軍事機構奴兒干都司。
到明朝後期，建州女真逐步強大，到努爾哈赤個辰光，從明帝國獨立，自稱大金皇帝（具體參考：後金)。貤逐步占領遼東地區交關土地，讓明帝國在遼東個統治崩潰。只好退回遼西個寧遠孤城。
內亞
明朝開始個辰光，在當今個哈密地區有駐兵，因為當地個統治者昰個辰光信奉佛教，所以對明朝老推崇。弗過明朝對渠場沒有多少重視，到15世紀初個辰光，哈密衛被廢脫，軍隊龜縮到嘉峪關，在差弗多同一個辰光，哈密地區個佛教徒也被回教通過聖戰徹底消滅，哈密地區成為回教地區，搭東亞個聯繫減少，明朝也聽任渠場發展。總體講起來，明朝對內亞個經營是失敗個，並且對哈密地區個佛教徒沒起到保護作用。
原大理地區
洪武十四年（1381年），明帝國擔老早大理國控制個地區全吞併脫，此地也成為著明帝國殖民同化個焦點地區。明帝國擔此地個貴族打散，拔脫，拉攏一眼聽話個貴族，擔渠場當土司、宣慰司。同時，也從長江中下游流域，引導交關移民來到迭個區域。靠昰個辦法，明朝辰光個雲南比現在大交關。包括當今個緬甸中北部、老撾北部、泰國北部一代。
Remove ads
行政區劃
《中國歷史地圖集》當中個明朝疆域。
哈佛大學出版的地圖對明朝永樂年間疆域個描繪。
初期個行政區劃。
行省設置
為達到大一統，割裂地區獨立個可能性，朱元璋繼續採用蒙古人個行政劃分方式，貤擔交關地方進行調整。具體表現在南方交關身份跨自然分界線個劃分高頭。
在抵抗明比較結棍個江南搭湖湘地區，朱元璋擔老早宋代個路拆分，形成南直隸，湖廣箇浪個跨長江行省，通過北面壓制南面，達到渠便於統治個目的。在渠弗大重視個西面搭北面，省份劃分就比較粗糙，比方講，陝西就有老大哥跨度搭面積。
朱元璋為限制行省個權利，貤搞出布政使，所以明朝實際高頭是沒有省份昰個劃分個，一個行省個權力，按照布政使，按察使，總兵劃分，後期貤有弗常設個總督、巡撫作為監視。讓官僚系統邪氣龐大。管理交關臃腫。
在明朝，通常有所謂個兩京十三省，實際來了勒西南搭長城附近，當地個官僚全弗大聽命布政使，在雲南，實際控制權在沐家手裡向。所以，明朝實際能夠通過官僚系統統治個區域，並弗比北宋大多少，但官僚個臃腫搭效率個推板超過宋代交關。
具體分省
在永樂辰光，明朝擔首都遷移到北平，並且擔此地改名叫做北京，相對個，老早個京師就改叫南京，這也是南京稱呼個由來。從此之後，明朝兩京十三省個劃分就確定下來，之後個兩百多年辰光內，全麼多少大個變化。
所謂兩京，是弗設置布政使個兩個首都直轄地區。分別是直隸搭南直隸，其中直隸通過中央政府直接掌控。南直隸通過在南京個留守政府掌控。所以迭兩個地區對明朝來講也是頂重要個地區哉。但具體講起來，南直隸弗論面積還是經濟全較直隸發達交關。直隸完全確保弗了明朝龐大官僚機構在北京個吃住。所以南直隸搭南面個浙江，每年全要通過京杭大運河把北方輸血。其中頂富裕個蘇州、松江地區，上交個財產也是頂多個。高達七成。
南方另外兩個重要個行省是江西搭浙江。浙江老早是吳越國個國土，經濟發達，文化繁榮。搭南直隸個蘇州、松江等地一道，是帝國內部頂發達個文化圈。所以明帝國對浙江一直有交關防範，嚴格限制浙江沿海個商人搭外國人做生意。對金華地區個農民搭礦工徵收沉重個賦稅。江西在唐朝開始就比較發達，到明朝，也一直是科舉重鎮。出脫交關當大官個。弗過明朝對江西個控制明顯弗如對浙江嚴密，在明武宗辰光爆發個寧王之亂，就是在此地爆發個。
福建在宋朝搭元朝個辰光一直是貿易發達個地區，明朝開始辰光個禁海對渠場打擊交關大，福建個經濟水平一直到明朝中央集權衰落個後期才發揮出來，這對福建個發展是老弗好個。
南方其他地區在明朝全弗是老發達。湖南地區個人口經曆元末動亂之後，一直弗超過500萬個水平。湖北也只有武昌府發展起來。四川人口因為蒙古屠殺個關係，一直弗多，文化搭地位也弗好搭宋朝之前相比。廣東大部分地區也沒開發，弗過廣州還算比較發達個地區。
在帝國個西南面，設置有雲南，貴州兩個省，迭兩個地區是朱元璋建立帝國之後交關年數才控制個，屬於新增加個殖民地區，所以統治方法搭其餘地方也弗一樣。在貴州，明帝國設置交關土司，把渠場好處，讓渠場為帝國效勞。在帝國後期，迭幫土司個軍隊成為帝國戰鬥力頂強個軍隊，比方講，廣西個狼兵，重慶個白杆兵。在雲南，帝國通過沐英搭渠個後代進行軍事化統治。交關此地個漢人全是明朝初年遷徙過來個。通過軍事碉堡個方式，逐步擠壓當地土著各生存空間，最後讓土著被消滅，或者同化。所以西南地區儘管全是山，但講個語言卻相當統一。就是昰個原因造成個。
帝國個北面因為蒙古人統治個關係，相當蕭條。人口保存比較完整個只有山西，弗過此地也是一個貧窮個省份。河南、山東等地，洪澇天災弗曾中斷。文化素質已經全面落後南方，尤其是江南地區。帝國也曉得迭些地區弗可能對渠個統治有多少支持。所以一般也弗壓榨渠場，只有到後期，當江南文人控制政府後，帝國開始對江南減稅，貤對江南搭北方一視同仁增加農業稅，最後讓頂窮個陝西開始暴亂。帝國也因此被滅脫。
Remove ads
軍事
明帝國個軍事制度，是在蒙古人軍事制度個基礎高頭，加入交關朱元璋對老早朝代軍事制度個總結搞出來個。具體表現為：軍事權力分散，軍事指揮混亂，軍隊來源固定，軍隊調動緩慢四個方面。明朝個軍隊，總體高頭是防禦性為主，因為軍事制度個關係，弗可能進行大流動性作戰。這也讓明朝後期個軍事帶有明顯個收縮性質。弗過明朝後期個軍隊雖然弗是蠻好，但是打打日本佬還是可以的。戚繼光個軍事改革，也讓明朝後期個軍隊變結棍了。
分散軍權
朱元璋對將領指揮軍隊弗放心，認為會威脅到渠子孫個江山。所以弗使用唐朝以來逐漸削弱個藩鎮制度，採用徹底擔軍事系統指揮權利分散個新方法。渠讓兵部負責全國各個地方軍隊升遷個掌控，平常各地個駐防軍隊沒有命令弗允許有自家個決定搭行動。軍隊個武官沒有決策權利，只好執行帝國中央交把渠場個任務。平常有重大個軍事行動，全需要由中央派遣專門個科舉官僚作為指揮官。弗僅個能，還需要有一個監督武官搭文官個監軍隨行，昰個職位一般全是讓皇帝信任個太監擔任個。在中央軍事指揮高頭，朱元璋老早建立過大都督府，後頭廢脫，分為五軍都護府，政出多門，沒啥實際權力。通過昰個方式，讓軍事指揮決策權利由皇帝掌控，文官命令。老早有老大權利個武官，只好成為附庸。所以明帝國弗推崇有謀略個武官，歡喜沒腦子個莽夫。
軍事指揮混亂
朱元璋制定個制度下頭，武官個地位老推板，能管轄個軍隊也老少，所以一旦有稍許大一點個戰爭，就需要多方武將協作，這些武官全相互品銜差弗多，有些即使地位比較高，但沒有統屬關係，所以並弗擔對方當一回事體。在作戰辰光，全自家顧自家，沒有統一個服從觀念。尤其是在跨省作戰當中，因為轄區個弗同，交關軍隊只管自家範圍內個事體，讓流寇四處遊走，如入無人之境。明朝個倭寇、後頭個闖賊全是鑽昰個方面個空子發展肆虐個。明朝皇帝也認為昰個是大問題，弗過搭威脅君權相比，就弗哪能重要哉。
軍隊階層低下
朱元璋參考蒙古人個制度，讓軍隊成為工匠一樣個軍戶，是一種老殘酷個低下級別，一家人一代代全要當兵，貤沒多少回報。而且弗好從事交關職業或者考科舉。這讓相當多個人為此逃竄，或者花鈔票買通門路，擔別人幫自家頂替。軍隊個管理也搭文官政府分割開來，在長城邊浪向還有西南地區，軍隊全是自給自足個小村落形式。弗哪能搭社會其他方面接觸。一些世襲總兵個家族還好，一些低級士兵就老受社會高頭別人個歧視。這讓明帝國個軍隊缺乏鬥志搭戰鬥力，認為當兵是一種低賤個職業。對明帝國個軍隊素質造成邪氣大個負面影響。
軍隊調動緩慢
因為古怪個軍事制度，明帝國雖然名義高頭維持一隻巨大個常備軍，弗過渠場大部分全是在當地扎根個農民，加上中期之後賬面搭實際情況巨大個差異，讓明帝國老難在遇到問題個辰光派出足夠個軍隊，一般需要從各個地方調度。比方對日本個戰爭當中，明朝個軍隊除脫被認為頂大個遼東鎮之外，貤從全國十幾個地方調來精兵，有些軍隊，從帝國南端開到朝鮮，戰爭已經過去半年哉。這種軍事調度高頭個低效率，讓明朝軍隊機動性弗靈，老容易被機動性強個軍隊各個擊破，明朝末年個流寇搭滿洲人，就利用這點，經常燒殺劫掠，沒遇到任何大規模個會戰或者抵抗。
Remove ads
經濟
明朝個經濟是在蒙古統治個基礎高頭個回升，弗過在北方地區搭巴蜀地區，昰個回升進展緩慢。陝甘地區個經濟更是搭唐朝]、北宋弗好相比。值得講個地區只有東南幾個行省。其中，福建、浙江南部還因為明朝個禁海受到邪氣大個打擊。
混亂個貨幣制度
明朝開始個辰光，朱元璋效仿元朝個紙幣制度，濫發紙幣，弗過由於質地比較推板，推廣弗了，老百姓全弗用渠個寶鈔，到中期之後，明朝沒辦法應付寶鈔使用個通貨膨脹問題，只好默認用銀兩作為計價貨幣個事實。昰個做法，是搭宋朝相比個一個大幅度倒退。
嚴苛個禁海政策
從明朝初期開始，帝國就施行嚴厲個禁海政策，弗允許沿海地區個商人搭國外商人進行交易。原因大致是弗想讓迭些地區個地方勢力靠貿易致富，威脅到朱明王朝個帝國大一統統治。昰個政策，也是對宋朝辰光海上絲綢之路個一個重大打擊。
弗過從16世紀中葉開始，由於倭寇問題越來越嚴重，明朝個官兵戰鬥能力貤大多數比較推板，所以到1567年，總算開放海禁。從此之後，東南地區開始發展，到明朝末年，出現了鄭芝龍等通過海盜、貿易發家個大軍閥。
重農抑商
朱元璋對商人一直弗放心，明朝也執行了長期壓制商人個政策。一直到中期之後，商人才依靠科舉等方式慢慢擴張自家個勢力。弗過，明朝辰光商業並弗是老發達，除脫東南地區個徽州商幫之外，只有到明朝末年崛起個晉商值得一提。
對外貿易
在明朝初年，帝國政府弗允許東南地區個商人直接搭外頭個商人做生意，渠場往來個方式全是通過帝國政府有組織個所謂朝貢貿易進行。即政府頒布限額，讓官方壟斷貿易。昰個做法，在初期還可以維持，弗過到15世紀後半夜，已經因為情況個變化弗適合時代。尤其是西方人進入南海之後，對東亞個貿易帶來交關大個刺激。1567年開放海禁後，明朝個貿易規模飛速增長。歐洲資本主義個興旺也帶來對中國商品個追求。到17世紀上半夜，帝國搭世界市場個聯繫變得緊密，馬尼拉個大帆船每年全帶來交關銀兩，讓帝國後期貨幣混亂個形式因為白銀個流入得到緩解。邪氣是貿易發達個福建、廣東地區，重新開始富裕。江南地區也通過出口茶葉搭絲綢獲得巨大利益。讓東南地區搭內亞個發展繼續誇大差距。
Remove ads
對外關係
天朝上國搭朝貢
弗同於漢朝搭唐朝，明朝對於擴張興趣弗是老大，在明朝初年控制河西、遼東搭雲南後，明朝就開始向內收縮個政策。朱元璋明確制定一系列「弗征討之國」，強化昰個效力。在對外個經濟來往高頭，實施朝貢體制，朝貢貿易薄來厚往，是完全弗經濟個做法，弗過對於構建明朝為中心個東亞體系有好處。所以被明朝長辰光施行。在此體制下頭，搭明朝做生意基本等同於認明朝為渠場個宗主國。因為早期個軍事壓迫搭經濟體量龐大，明朝吸引交關東亞、東南亞小國進行朝貢。鄭和下西洋個事體，貤讓朝貢貿易搭明朝個兒子國達到一個高位。鄭和甚至到過非洲東海岸等地，讓東南亞個交關國家全曉得天朝個概念哉。在內亞方面，除脫北元之外，也讓西面個回教政權來「朝貢」。
蒙古問題
蒙古人雖然回到草原，弗過因為歷史傳承個問題，並沒有丟棄元朝個傳統。這讓自認為「天命所歸」個朱明皇帝老弗放心，所以從朱元璋開始到朱棣，明朝一直對蒙古採取進攻形式，儘管朱棣個蒙古攻略沒啥根本性個效果，弗過北元個政權也在內鬥搭攻擊中消失。蒙古草原走向部落紛爭，但好景弗長，明朝在1430年代個防線收縮以及1450年代災難性個土木堡失敗，讓明朝徹底喪失對蒙古人個優勢，被迫修造長城，進行收縮防禦。蒙古人大部分辰光全尋求搭明朝個和平關係，弗過明朝一直強硬弗理睬，代價是邊關個百姓長辰光遭到掠奪搭燒殺。一直到16世紀末，因為俺答汗個歸順以及蒙古人信仰佛教後人口減少導致個衰落，才讓漠南逐漸太平。到明朝末年，林丹汗搭滿洲作戰失敗，大量蒙古漠南部落倒向滿洲，明朝對蒙古喪失影響力。
女真問題
女真，是生活在東北亞個通古斯民族。在宋朝辰光曾經建立金國，到明朝初年女真大部分投降北伐個明朝軍隊，成為類似西南地區個土司統治地區，弗過因為女真所在個地方環境惡劣，明朝也沒移民多少人過去，這讓當地個女真人在保存自家文化個同時，也缺少交關開化。女真分裂為好幾個大個部落集團，相互之間為爭奪權力搭資源進行燒殺。明朝個遼東總兵利用渠場個內部矛盾，一直控制渠場個勢力。一直到16世紀末，因為豐臣秀吉攻略朝鮮，遼東軍隊抽調，讓有野心個努爾哈赤開始崛起。17世紀初年，努爾哈赤統一女真部落，1616年公開從明朝獨立，自稱大汗，開始搭明朝對立。在一些列個戰鬥當中，女真人全擊敗明朝軍隊。1630年代，皇太極對女真人進行改革，改民族稱號為滿，最終在1644年取代明朝，成為帝國個新統治集團。
帖木兒搭回疆
明朝初年，中亞河中地區個帖木兒崛起，東征西討，建立大帝國。弗過明朝皇帝對此並弗曉得，由於帖木兒麻痹明朝，長期向明朝朝貢。明朝還當渠場是一隻恭順個小國。1400年初，明朝陷入統治集團皇位爭奪個同一辰光，帖木兒扣押明朝個使臣，開始計劃進攻明朝。1404年，帖木兒個大軍出發逼近回疆。明朝總算曉得渠個異常，弗過還是沒有戰爭個準備。幸運個事體發生在1405年，帖木兒在路丄病死，避免大規模個戰爭，讓明朝逃過一劫。
在明朝辰光，瑲朞個新疆地區基本弗畀東亞帝國個勢力統治。明朝搭昰幫回教國家個關係弗大密切，儘管難般也有官方來往，弗過絲綢之路並弗大暢通。喀什等場許在昰個辰光明顯是中亞世界個一部分。好然介講，明朝搭中亞國家個來往弗大密切。
日本
明朝開始辰光，朱元璋派人到日本要求稱臣，弗過，日本擔來訪個使節殺脫，便無下文哉。到後勢來，朱棣辰光，日本個幕府將軍足利義滿為擔自家個聲望拔高，搭明帝國開始貿易，並且接受日本國王個封號。但室町幕府個衰敗，還是讓居種朝貢形同虛設。到應仁之亂後，日本國內形勢弗穩定，流亡到東海丄個浪人增加，渠場搭東南地區個商人一淘，組成功倭寇，進行走私活動，搭明帝國發生衝突。一直到隆慶辰光，日本戰國慢慢走向統一，種事體再稍須少一眼。到萬曆辰光， 統一日本個天下人關白豐臣秀吉企圖發兵攻打明帝國，教訓昰只老大政權。十幾萬日本人從朝鮮登陸。萬曆朝鮮之役爆發。明帝國也派著交關軍隊前往進行對戰。弗過，除脫平壤之戰勝利之外，在碧蹄館之戰當中陷入僵持，還發生著封賞鬧劇。到1597年，戰爭貤繼續開始。居趟，明帝國個表現蠻好，弗有讓日本取得任何戰果。日本一直縮來慶尚道個海邊，沒辦法朝北進攻。到1598年，豐臣秀吉死脫，日本人撤軍回國，此事纔算結束。到江戶幕府建立之後，兩國也未建立官方外交關係。只有吳越、閩越個商船好到日本個長崎去進行貿易。
朝鮮
明朝朝貢體系當中，頂讓明朝覺著滿意個便是朝鮮國。朝鮮昰個名字，也是朱元璋賜畀朝鮮李朝個。朝鮮在明朝辰光個地位相當於一隻有實際權力個藩王，使用明朝個年號，大規模效仿明朝個制度，在各個方面全是明朝個翻版。到1590年代，明朝幫助朝鮮抗擊日本個入侵，讓朝鮮感恩戴德。弗過在17世紀初之後，明朝在搭後金個戰爭里向屢戰屢敗，跟隨明朝一淘參戰個朝鮮也發生著動搖。1630年代，朝鮮畀滿洲人侵略著兩趟，只得斷絕搭明朝個聯繫，成為著滿洲人個附屬國。弗過朝鮮人一直懷念明朝，到18世紀來北京朝賀個朝鮮使節，也常莊在記錄里對滿洲人個統治進行攻擊。
琉球
琉球是另外一隻讓明朝放心個藩國。琉球是沖繩群島丄個一隻小國，立國個根本是靠貿易，蓋咾對明朝一直邪氣服帖。明朝封其為中山王，也擔渠場當做自家個一隻藩國。琉球在居段辰光也接受著交關明朝個制度搭文化，尤其是福建地區個文化，對琉球有深遠個影響。17世紀初，日本個薩摩藩入侵琉球，琉球派使臣到北京求明朝保護，弗過明朝並未當渠一樁事干。從此，琉球便變成功雙向朝貢個國家，認帝國搭日本為渠場個宗主國。
台灣島
明帝國對台灣島無直接統治，一直擔此地當成功化外之邦，單清通過澎湖列島個海巡機構難般巡邏。弗過，在隆慶帝開放海禁之後，開始有蠻多閩南、侯官家族移民到台灣島，讓昰個地方個南面開始接觸著閩文化影響。到17世紀初，西方個大帝國西班牙開始從渠場個西屬菲律賓出發，殖民台灣島個北許（瑲朞個基隆港）。幾乎同一辰光，新興海上強國荷蘭也從渠場個巴達維亞殖民地出發，進入東亞海面。並在17世紀初，登陸台灣島，控制㬮朝個台南附近，趕脫著西班牙人，擔昰個地方變成功渠自個荷屬台灣殖民地。直到1662年，明朝滅亡之後交關辰光，因為攻打南京失敗個鄭成功攻擊渠個貿易對手荷蘭人，新讓此地「光復」。弗過，昰個辰光已經是清朝哉。
西洋各國
明朝搭西洋國家個接觸，是單方面個。主要是通過葡萄牙人，西班牙人進行。到晏期，也受著過荷蘭東印度公司個影響。弗過，總體丄講起來，還是以渠比利亞國家為主。其中，搭葡萄牙人個接觸辰光頂長，對明朝個影響也頂大。16世紀開始辰光，葡萄牙人就來到東方，想擔自家在印度洋丄壟斷個香料貿易擴張到東亞地區。弗過，因為昰歇辰光明帝國個封閉貿易策略，一直無辦法實行。只好到雙嶼島進行走私貿易。之後，明帝國滅脫渠場個根據地，渠場便轉移到珠江口個澳門進行貿易，1559年，葡萄牙人正式在澳門立足。明帝國雖然打壓葡萄牙人，弗過對渠場個奇技淫巧也是清爽個。尤其是軍事方面個技巧，引入蠻快。比方講，有名個西洋火器，便全來自搭葡萄牙人個貿易，蓋咾也叫弗朗機（弗朗機是葡萄牙個舊稱）。
Remove ads
制度
明朝個專制制度在朱元璋辰光定型，之後將近300年裡向，基本無何大改動：
中央官僚制度
- 內閣
朱元璋在當皇帝后，生怕自家個專制權力畀大臣束縛牢，蓋咾擔丞相廢脫著。廢脫丞相個設置以後，覺著辦公精力有限，有常時一個人弗來事，蓋物便設置著內閣大學士來幫襯幫襯，居個職位後首來雖然未得著丞相個名號，實際丄替丞相個職務是一色個。
- 六部
六部，謳起來是：吏、戶、禮、工、刑、兵。該六部，每一部尚書一名，侍郎兩名。
- 五寺
五寺，謳起來是：大理寺、太常寺、光祿寺、太僕寺、鴻臚寺。居五寺，長官叫卿，一名。
- 三法司
三法司，謳起來是：大理寺、刑部、都察院。居三個機構個用場是監察，都察院下底有監察御史，每隻省里向有十幾名來場，有事體望上頭匯報。
- 廠衛
錦衣親軍都指揮使司，謳起來便是今朝名氣交關大個錦衣衛，東緝事廠，也便是東廠。
- 三公
榮譽職稱，無實際權力個，包括太師、太傅、太保。
- 外三監
外三監下底有：國子監、欽天監、上林苑監。
- 內宮十二監四司八局
內十二監下底有：司禮監、內宮監、御用監、司設監、御馬監、神宮監、尚膳監、尚寶監、印綬監、直殿監、尚衣監、都知監。
內四司謳起來是：惜薪司、鐘鼓司、寶鈔司、混堂司。
內八局謳起來是：兵仗局、銀作局、浣衣局、巾帽局、針工局、內織染局、酒醋面局，司苑局。
- 宮女六局
尚宮局、尚儀局、尚服局、尚食局、尚寢局、尚工局
地方官僚制度
在地方丄，明帝國採取分權個方法，採用布政使司然種伉老早元帝國辰光行省一色個模式進行統治，採取省、府、縣個三級統治方法，除脫昰眼，還在一厘關卡設立州，譬如太倉州。行布政使司個內部，權利進行分割，布政使掌握民政權利，按察使掌握司法刑事權利，總兵掌握地方性質個軍事權力。到中後期，在渠場上向，還有從北京派過來個總督、巡撫進行控制，讓權利分散。弗過，種情況也讓總督搭巡撫個權利越來越大，渠場個用場，也從開初辰光個臨時欽差大臣，朝後頭個常備職務轉變。到清朝辰光，終於成為每隻地方或者地區常設個官職哉。
在越加低層個水平丄，官僚便弗及省里向然多哉。知府是正五品或者從五品個官員，屬於中級官僚，掌握一個府城範圍內個大部分權利。渠個幫手包括同知、推官咾啥。還有自家招攬個一眼師爺。到知縣個層面，是帝國官僚體系個終點，作為正七品個官員，渠場直接面對一個縣境內個士紳搭百姓。縣衙內部個官吏大部分弗好算是朝廷個正式官員，包括縣丞，捕快之類，全數十年服務勒縣衙里向，對縣城個管理掌握比交關空降個知縣還要深刻交關。昰個也使得有種場許出現著縣丞架空知縣個狀況。
明代江南
雖然朱元璋對江南展開打壓，弗過江南文化在明朝還是達著自家個頂峰。由於八股取士個科舉制度，交關江南讀書人靠科舉走上著官僚道路。明朝歷代科舉里向，江南人全要占據至少靠三分之一個名額。蘇州、松江、紹興等地，滿街全是公卿；秀才在江南，只好去私塾里向教教書。明代後期個徐階、申時行、王錫爵等首輔，全是江南人。
科舉個繁榮是依靠強大個經濟基礎作為支撐個，在明朝晚期，江南已經形成帝國唯一一個城市群。居只城市群由東南個陪都南京作為軸心，囊括吳越地區北部個幾乎所有城市。包括常州、蘇州、松江、嘉興、湖州、杭州、紹興、寧波等。湧現出交關關心帝國大事個熱血讀書人，明朝末年個東林黨、復社就是其中個代表 。
明朝晚期，江南城市生活豐富多彩，世俗娛樂多種多樣，崑曲個發達，園林藝術個發展，四大才子個出現，還有三言二拍等新型小說個推出，反應了昰歇辰光江南人五光十色個城市生活。
帝王列表
Remove ads
附註
- 是場廟號、諡號基本全是用後一代或是世宗個叫法，因特殊，代宗採用憲宗個叫法，惠宗忒思宗個採用南明隆武帝個版本。
參考資料
Wikiwand - on
Seamless Wikipedia browsing. On steroids.
Remove ads