蘇州軌道交通11號線

蘇州軌道交通11號線（老早叫蘇州軌道交通S1線），是中國江蘇省蘇州市一條軌道交通線路。本線從勒拉蘇州工業園區個蘇州軌道交通3號線唯亭站出發，向東進入崑山市境內，最終到達上海軌道交通11號線花橋站（地鐵）。本條線路個定位是崑山東西交通個大走廊，聯絡蘇崑滬三地^[1]。

本線勒拉2018年11月27號開工。2023年6月16號-20號，11號線開展萬人免費試乘活動^[2]。2023年6月24號上半天11點鐘，伊正式開通運營^[3]。工程總投資約莫294.51億元。

11號線車站報站有普通言話、蘇州言話搭英語，是蘇州軌道交通頭一條使用地方言語報站個線路^[4]。

運營

無感換乘上海地鐵

花橋站往上海地鐵方向個換乘通道，右面是客戶端掃碼專用通道，左面是其他車票乘客通道

本線開通以後，乘客勒拉花橋站好通過三座換乘通道進行換乘。箇當中，兩側個通道有無感換乘通道搭仔出站換乘通道，均弗用再次安檢（除開重大活動），用「蘇e行」或「Metro大都會」軟體掃碼乘車個乘客好通過站內個專用通道進行無感換乘，弗需要先出站再重新進站；使用其他票卡個乘客要出站換乘。中間通道是非付費區，畀進出站乘客專用^[5][6]。雖然講蘇州搭仔上海兩地個地鐵好一票同乘哉，但兩個地鐵網絡是分別算鈔票個^[7]。

大站快車

本線首班車採用「多點同時投入」個運營模式，去花橋方向個首班車勒拉6:00個辰光會得從唯亭、共青同時發車；去唯亭方向個首班車勒拉花橋站5:40發車。末班車會得勒拉22:30個辰光從兩端個終點站雙向發車。本線還會得勒拉首班車之前、末班車以後開首末班大站快車，去花橋方向個快車勒拉5:25搭仔5:45從共青站發車，往唯亭方向個快車勒拉22:53搭仔23:10從花橋站發車，只停10個站頭^[8]。

同3號線貫通運營後，每天早夜個快車運行交路西面延長到東方之門站，東面終點站還是花橋站，同時取消部分停靠車站，當中只停靠唯亭、祖沖之公園、江浦、崑山城市廣場同神童涇^[9]。

同3號線貫通運營

主文章：蘇州市軌道交通11號線與3號線工程貫通運營改造項目

勒拉2023年年底，伊好同3號線貫通運營，也就是車子好從11號線開到3號線個站頭浪^[10]。

2023年12月16號到22號，為咾配合3、11號線貫通工程，唯亭站、草鞋山臨時停運，只挺下來陽澄湖東到花橋個單一交路運營，取消脫夜到頭個大站快車，而唯亭站到陽澄湖東站配備免費個公交接駁服務^[11]。

2024年6月29號，3/11號線完成全線貫通改造並運營。平峰個辰光，全線全車站貫通運營；高峰個辰光，3號線會得開行蘇州新區火車站到葑亭大道站個小交路^[12]。