长兴岛（上海）

長興島是勒拉吳越長江入海口處個沖積島，現面積88平方公里，本地人口約3.6萬人，全島即上海市崇明區長興鎮個行政區域。

地理

長興島浮出水面，最早成型勒明崇禎十七年（1644年），清道光二十二年（1842年）形成功瑞豐沙（原名崇寶沙）、潘家沙、鴨窩沙。光緒六年（1880年）形成功石頭沙、圓圓沙。民國十六年（1927年）形成功金帶沙。

清道光二十四年（1844年）鴨窩沙開始圍灘造田。

但直到1960--1970年間，長興六沙通過整體個堤岸工程，連成一體，成為乃朝個長興島。長興島個經濟主要以農業為主，2008年，中船集團擔旗下4家企業整體搬遷至長興島，長興島將成為中國頂大個造船基地。2007年官方個宣傳已經擔長興島定義為「海洋裝備產業島」哉。

歷史

長興島勒民國辰光開始開發，人口大部分是勒民國時期遷入，早期以漁民為主，靠打漁以及收割野生蘆葦為主要產業。後有部分已經生根個家族圍堤屯田，逐漸形成仔農業。中華人民共和國成立以後，浦東部分漁民遷入，配置耕地，迭部分人畀當地人謳作「新農民」。

長興島個生活風習、語言習慣甚至血統也基本搭崇明、橫沙島同源。 三島語言就是崇明言話，渠搭寶山個方言（嘉定言話）有明顯個區別。崇明言話個發音有老重個喉音、鼻音搭胸腔共鳴，多開口音，弗像寶山話有明顯個齒音和舌尖音。三島由於交通弗便，各方面自有其獨立性，受外界影響少，告咾保留仔不少古風。

譬如話，三島推崇寄親（認過房親），箇是邪氣典型個島嶼文化，為之通過迭種方式，使得嘸沒血統聯繫個人好形成仔一個親眷關係，由於島嶼交通弗便，迭能好圖個互相幫助、突發急事辰光有個照應。

經濟

長興島個產業也歷經變化，從早期個漁業、天然作物收割到農漁、養殖業結合，挨下來又根據土壤氣候條件勒80年代開發仔柑桔特產及搭之相關個觀光農業，到進瑲把定義個海洋裝備產業。截止到2007年底，長興島個外來人口已經超過8萬，是本地人口個兩倍多，而根據有關部門個規劃，還將進一步吸納外來務工人員，使人口總數達到15萬～18萬橫裏。

長興島個主要對外交通方式為船舶，客流量頂大個船舶碼頭為勒拉島南側中部個馬家港碼頭。目前規劃中個上海軌道交通19號線將隨著上海長江隧道延長到長興島。天氣好個辰光，立勒島南側海灘就好肉眼觀測到對岸個浦東新區。

長興島造船基地

長興島港口個「昆明」號052D導彈驅逐艦

中船集團自2005年起建設長興造船基地。長興造船基地一期內建成功三條造船生產線，分別是上海江南長興造船有限責任公司（主營民用船舶）、上海江南長興重工有限責任公司（主營民用船舶）、江南造船（集團）有限責任公司（民用及軍事船舶），以及一家船舶配套企業中船江南重工股份有限公司。^[1]

此外，長興島上另有中海長興修造船基地搭振華重工長興基地。