Pang-chān:中華職業棒球大聯盟
From Wikipedia, the free encyclopedia
Remove ads
中華職業棒球大聯盟（縮寫CPBL），簡稱中華職棒、中職，是目前臺灣（中華民國）唯一而且成立上早兮職業野球聯盟。伊兮前身是佇1989年創立兮中華職業棒球聯盟；創始球隊有味全龍、兄弟象、三商虎佮統一獅。2003年，中華職棒和臺灣職業棒球大聯盟合併了後，改名做這馬兮名稱。目前，中華職棒由六支隊伍組成，分別是統一7-Eleven獅、中信兄弟、富邦悍將、樂天桃猿、味全龍佮台鋼雄鷹，競賽地場主要分佈臺北、新北、桃園、臺中、臺南佮高雄等等大型都市。
 |
Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún. |
Remove ads
發展沿革
中華職業棒球聯盟
創立
1987年12月31，「中華民國職業棒球推動委員會」佇兄弟大飯店董事長洪騰勝兮推動之下成立。1988年1月18，中華民國職業棒球推動委員會宣布，目標佇1990年成立職業聯盟，內底愛有上無4支球隊；半冬了後，委員會大概訂定了職棒聯盟兮發展方向，並且開始欲籌組球團、訂定規章、解決地場問題佮培養裁判人才、建立裁判制度等等兮實際工課。
1989年10月23，「中華職業棒球聯盟」佇兄弟大飯店舉行成立大會，由味全、統一、三商、兄弟成做上開始投入職棒球團經營兮四个企業。
1990年3月17，臺灣野球史上兮頭一个職棒賽季開始[1]，由佇日本拍球兮野球名將王貞治主持開球儀式[2]，開始「職棒元年」，職棒兮頭一戰是統一獅對戰兄弟象，落尾獅隊以4：3拍贏）。
中華職棒元年開幕戰比賽紀錄
| 中華職棒例行賽 G001 （1990/03/17 拜六，地場：臺北市，開始時間：14:45，進行時間：02:51） | |||||||||||||||
| 統一 4 : 3 兄弟 | 投手成績 | 打擊成績 | 相關資料 | ||||||||||||
| 球隊 | 1 | 2 | 3 | 4 | 5 | 6 | 7 | 8 | 9 | R | H | E | 勝投：杜福明（1W） 敗投：張永昌（1L） 救援成功：瑞奇（1） |
勝利打點：羅曼（1上） 全壘打：汪俊良 |
MVP：無 主審：葉南輝 觀眾人數：14,350 |
| 統一 | 2 | 0 | 0 | 2 | 0 | 0 | 0 | 0 | 0 | 4 | 9 | 2
| |||
| 兄弟 | 0 | 1 | 0 | 0 | 0 | 0 | 2 | 0 | 0 | 3 | 7 | 1
| |||
| 中華職棒例行賽 G002 （1990/03/17 拜六，地場：臺北市，開始時間：19:00，進行時間：02:18） | |||||||||||||||
| 味全 0 : 3 三商 | 投手成績 | 打擊成績 | 相關資料 | ||||||||||||
| 球隊 | 1 | 2 | 3 | 4 | 5 | 6 | 7 | 8 | 9 | R | H | E | 勝投：涂鴻欽（1W） 敗投：黃平洋（1L） 救援成功：無 |
勝利打點：鷹俠（3下） 全壘打：無 |
MVP：無 主審：林朝琴 觀眾人數：6,500 |
| 味全 | 0 | 0 | 0 | 0 | 0 | 0 | 0 | 0 | 0 | 0 | 5 | 2
| |||
| 三商 | 0 | 0 | 1 | 0 | 2 | 0 | 0 | 0 | X | 3 | 9 | 0
| |||
全盛時期
中華職棒開拍了後，對職棒元年到職棒八年之間（1990－1997），臺灣野球選手兮待遇佮社會地位攏加較懸，毋但改善了
除了創始兮4支球隊以外，後來閣有中國時報（時報鷹）、俊國建設（俊國熊）、興農集團（興農牛）、和信集團（和信鯨）等等兮企業加入職棒球團兮經營；職棒八年兮單一球季上濟捌有7隊兮規模（統一獅、兄弟象、興農牛、味全龍、和信鯨、三商虎、時報鷹）。除了職棒以外，各級野球隊兮數量嘛一直咧增加，野球、壘球運動誠時行。
衰退時期
- 詳細請看：1996年中華職棒假球事件
1997年（職棒8年）爆發兮球員簽賭、假球事件，致使職棒環境面臨嚴重兮洘流，球迷對職棒球賽兮無信任造成球迷人數直直落。另外佇1996年創立兮臺灣職業棒球大聯盟對中職來講嘛是無米兼閏月[4]。
上早是簽賭案內底涉案上深兮時報鷹宣佈解散[5]，後來三商虎、味全龍嘛佇1999年宣佈解散[6][7]，中華職棒對7支球隊減甲賰4隊。臺灣大聯盟兮成立雖然予逐家看着球員兮合約問題，嘛予兩个聯盟佇互相競爭之下開始職棒環境兮改革，但是互相惡性競爭佮簽賭案猶原造成誠嚴重兮傷害。
重振
2001年（職棒12年）世界盃野球賽佇臺灣舉行，中華民國野球協會向中華職棒徵召15位優秀職棒球員進入國家代表隊參賽，佇業餘選手張誌家（後來捌加盟日本職棒埼玉西武獅）、旅美選手陳金鋒兮𤆬領之下得着銅牌。這是中華隊自簽賭案了後，上好兮國際賽成績，加上比賽佇臺灣舉行，吸引誠濟臺灣民眾兮關注，嘛重新予臺灣儂共對野球兮熱情揣轉來，職棒觀眾人數佮票房收入嘛綴咧回升。
中華職業棒球大聯盟
新紀元
2003年1月13（職棒14年）兩个職棒聯盟簽訂合併協議書，那魯灣公司同意解散臺灣大聯盟，並且共臺灣大聯盟兮4支球隊改做2隊：誠泰太陽（由臺中金剛、嘉南勇士合併）佮第一金剛（由臺北太陽、高屏雷公合併）合併加盟，改名做「中華職業棒球大聯盟」。[8][9]
簽賭案爆發
- 詳細請看：2008年中華職棒假球事件佮2009年中華職棒假球事件
2005年7月25（職棒16年），La New熊新秀捕手陳昭穎佇比賽結束了後予檢方拘提，中華職棒閣一擺爆發簽賭案，球迷兮失望情緒嘛綴咧出現。攏總有6个球員佮1个教練佇偵訊了後夆羈押抑交保候傳（落尾嘛攏予球團開除，永不錄用），後來閣爆發承辦檢察官佮民意代表夆查出涉嫌貪汙、食錢等等兮不法情事，全案佇2008年2月一審宣判。
2008年10月23（職棒19年），前身是誠泰 Cobras 兮米迪亞暴龍球團，因為涉入簽賭事件予中華職棒除名，球團方面兮講法是「經營階層予烏道佮組頭入主」，是頭一擺規支球隊攏予烏道控制去兮狀況發生。
2009年10月27（職棒20年），閣爆發假球事件，前職棒選手黃俊中、蔡豐安、莊宏亮佮烏道四海幫一寡成員夆羈押搜索，兄弟象一寡球員佮設施嘛攏夆搜索。烏道透過前La New熊球員黃俊中、前中信鯨球員佮前兄弟象球員莊侑霖（原名莊宏亮）擔任仲介，去操控夆烏西兮球員拍假球。[10]另外佇這擺兮事件內底，因為檢察官佮媒體完全無遵守「偵察不公開」兮基本道德，致使去傷着無辜兮儂。過無幾冬着爆發一改兮假球案嘛予足濟球迷誠失望，尤其佇2009年兮烏象事件了後，這嘛對中職造成足大兮傷害。佇烏象事件了後，除了中職有針對這个部份去調整、建立制度以外，臺灣嘛立法希望會當避免假球案閣再發生。
東山再起
2012年10月22（職棒23年），經營職棒興農牛十七冬兮興農集團，佇職棒大環境一直無好兮情況之下，因為虧損決議結束球隊經營，並且透過新聞稿揣儂來買，落尾是佮義联集團達成共識。12月17，興農牛正式行入歷史，並且以1.3億箍賣予義联集團，改名號做義大犀牛。[11][12]
2013年世界野球經典賽，中華隊以分組第一兮成績拍入去複賽，閣差一點仔拍贏日本，予臺灣儂閣一擺共對野球兮熱情揣轉來。受着經典賽兮影響，閣加上仝年加盟義大犀牛兮美國球星 Manny Ramirez 引起話題，臺灣閣一擺出現中華職棒兮熱潮。
2013年10月19（職棒24年），兄弟象董事長洪瑞河宣布欲共兄弟象球團賣掉，落尾是中信金控接手[13]。2014年1月5號（職棒25年），中信金控宣布隊名改做中信兄弟，代表動物仝款是象。[14][15]
佇2014年到2018年，（職棒25年－29年）中華職棒定定咧訂定新兮制度，包含避免裁判誤判去影響着比賽兮電視輔助判決、予比賽速度通較緊兮投球時鐘、故意四䆀球等等兮規定。[16]
擴編
因為中華隊佇2013年世界野球經典賽（WBC）兮好表現，佇2013年了後，中職人氣恢復，開始有企業對加入中職有興趣。
2019年（職棒30年）1月，魏應充表示確定欲重組已經解散20冬兮味全龍[17]；4月29，味全龍正式向中職提交加盟申請書[18]，並且佇仝年6月24正式通過加盟程序轉去中職，是中職佮臺灣大聯盟合併了後第一支加盟兮球隊，嘛是目前中職唯一一支佇解散了後又閣重新加盟兮球隊[19]。味全自2020年球季開始佇二軍比賽，2021年球季開始正式成做中華職棒一軍兮第五隊。
2021年（職棒32年），蔡其昌上任中職會長表示，欲積極擴展第六隊，按算佇2022年有機會，有興趣兮企業包括：中華電信、臺灣鋼鐵[20][21]。
2022年2月25（職棒33年），中職公佈由臺灣鋼鐵集團成立第六隊；3月2號，台鋼集團佮中職簽「加盟意向書」，並且確認隊名號做「台鋼雄鷹」；4月27，聯盟常務理事會審查通過。7月參加選秀會，2023年球季佇二軍出賽，2024年球季正式成做中華職棒一軍兮第六隊[22][23]，主場佇大埤湖野球場[24]。
巨蛋熱潮
- 詳細請看：臺北大巨蛋
2023年10月20，自1991年着開始咧討論欲起兮臺北大巨蛋完工，並且佇仝年12月2號啟用，是臺灣兮頭一粒巨蛋。
2024年3月30，味全龍佮樂天桃猿進行中華職棒頭一場佇臺北大巨蛋舉行兮例行賽，落尾是味全龍以3：2拍贏。這場比賽攏總有28,618个觀眾入場，是中職兮新紀錄。
2024年7月20、21，頭一擺佇大巨蛋進行明星賽，兩場比賽分別有33,688佮28,666儂入場，攏總62,354儂，超過中職聯盟原本兮紀錄（1990年3場攏總36,000儂）。
2024年9月21、22，中信兄弟佇臺北大巨蛋舉行周思齊兮引退賽，兩場比賽攏有40,000个觀眾入場，是大巨蛋第1佮第2場滿場兮比賽，嘛成做中職兮新紀錄。[25]
2024年臺灣大賽期間，因為大巨蛋兮關係，5場觀眾人數攏總有132,625儂，嘛是臺灣大賽上濟觀眾兮紀錄，尤其頭一場佇臺北大巨蛋閣有4萬儂滿場，落尾佇10月25，中信兄弟佇臺灣大賽以4勝1敗拍贏統一7-ELEVEn獅，得着隊史第十个總冠軍[26]。
Remove ads
球隊
球隊名變遷
Remove ads
比賽地場
一軍
二軍
.jpg)
參考資料
Wikiwand - on
Seamless Wikipedia browsing. On steroids.
Remove ads