眾數 (文法)

喺語法上，眾數（粵拼：zung3 sou3；英文簡寫 pl）係指當某隻詞語指多過一件物體嗰陣嘅型態。例如英語就有種規則，名詞指緊多過一件物體嗰陣，詞尾要加 [-s] 或者 [-z]（書寫上會用 -s 代表）－即係例如 book 指得一本書而 books 就係指多過一本書。亦有好多語言傳統上認為係冇語法眾數嘅，例如粵語就係噉。

蘇格蘭蓋爾話都有詞形變化：
cù → 一隻狗
dà chù → 兩隻狗
coin → 多過兩隻狗
留意蘇格蘭蓋爾話仲有雙數，即係隻名詞指嘅嘢假如係有兩個，而且係兩個冇多冇少，就有一個特定嘅樣。

歐洲語言

睇埋：詞尾

歐洲語言有別於漢語同其他東亞嘅語言。語法眾數呢家嘢喺歐洲語言中好常見，係詞形變化嘅一部份，最常見嘅做法係隻語言有某款特定嘅詞尾，專門加喺眾數名詞後，而某啲特定嘅詞會不規則變化^[1]。

譬如係英文噉，英文大部分名詞都有單數同複數之分。通常情況之下，英語會喺名詞最尾加 [-s] 或者 [-z] 表示眾數，而喺書寫上會用 -s 或者 -es 嚟標示，例如

• book → books：一本書 → 幾本書（加 -s）
• bus → buses：一架巴士 → 幾架巴士（加 -es）
• child → children：一個細路 → 幾個細路（唔規則變化）

有部份名詞唔跟呢條簡單規則：例如 child 一詞噉，佢嘅眾數唔係 childs 或 childes 而係 children；又例如 foot（近似粵拼：fut1）變做眾數就係 feet（近似粵拼：fit1）；另外英文史上深受羅曼語言（尤其係法文同拉丁文）影響，由呢啲語言大量借詞，呢啲外來詞嘅單眾數變法好多時都不規則^[2]。

諸如法語、德語、葡語... 等咁多歐洲語言，都係用加詞尾嘅做法嚟表達眾數，同時有部份詞語有不規則變化，但係眾數詞尾嘅樣就唔同語言都唔同，而且仲可能要配合性別同格方面嘅變化。

東亞語言

睇埋：分析語同孤立語

漢語

一般認為，漢語傾向孤立語，缺乏詞形變化，但係佢哋都有方法表達眾數方面嘅資訊。

漢語嘅名詞通常冇單眾數之分。喺中文書面語（原則上建基於官話）中，如果講嘅係人或者其他動物，往往會喺名詞後加們（普拼：mén）一詞，例如他係中文書面語中嘅單數第三人稱代詞（相當於佢）而他們就係眾數版本（相當於佢哋）；此外，代名詞以外嘅名詞都可以掕們，例如路人變路人們呀噉。

粵語亦有特有方式嚟表達眾數噉嘅資訊。粵語哋一詞係常用嚟表示眾數資訊嘅形態素，用法同官話嘅們或者英語嘅 -s 好相似，都係掕喺名詞後，分別在於哋只可以用於代名詞，唔可以亂咁加喺其他名詞之後，例如以下呢啲用法係正確嘅^[3]：

• 我哋（我 + 哋）→ 表示我複數，即係我加埋同我一齊嘅其他人。
• 你哋（你 + 哋）→ 表示你複數，即係你加埋同你一齊嘅其他人。
• 佢哋（佢 + 哋）→ 表示佢複數，即係佢加埋同佢一齊嘅其他人。

相比之下，老師哋、學生哋、貓哋呢啲講法，就唔合乎標準粵語嘅語法^{[註 1]}，因為老師、學生、貓等都唔係代名詞。對於呢啲名詞，粵語可以喺詞前加啲嚟表示類似眾數嘅意思，例如啲老師、啲學生、啲貓呀噉。

根據粵語語法，描述呢個情境可以用到啲貓... 噉嘅語句，但貓哋噉嘅用法就錯語法。

除咗哋同啲，粵語（同好多主流漢語）可以喺名詞前加諸呢個形態素，好似歐洲諸國係指歐洲嘅一眾國家。而名詞後面有時亦可以加眾呢個形態素，譬如係觀者變做觀眾、聽者變做聽眾等等，都係表示一大班人。呢啲文言化嘅用法，就算係粵語口語都用得。

其他

日語都會用一啲詞尾去表達眾數，或者類似歐洲語言眾數嘅資訊。如果隻名詞係指緊人，就可以加たちtachi呢個形態素，例如子供（日羅：kodomo）係指細路，而子供たち就可以用嚟指一班細路，而代名詞有時會加らra呢個形態素，例如彼（日羅：kare）係第三人稱男性代名詞，而彼ら指佢哋^[4]。

除此之外，喺東亞嘅語言中，講嘢嘅人可以索性講埋數詞出嚟，通常仲會掕埋量詞，例如一個、兩件、三隻呀噉，噉樣就算冇單眾數嘅詞形變化，聽者都好清楚名詞所指嘅物件係得一件定係有多件。由粵語同官話等嘅漢語，以至日語、泰語... 等都係噉。

睇埋

• 人稱代詞
• 語法數量
• 尊嚴複數

註釋

1. 標準：講緊跟從香港同廣州等地嘅粵語。