脷

脷（粵拼：lei6）係口腔中嘅一大束肌肉，幫手品嚐、咀嚼、吞食物，同埋發音嘅器官之一。脷係味覺器官之一，表面嘅大部分係味蕾。因為脷係幫助發聲嘅器官之一，喺一啲語言，例如葡文、俄文、波斯文、法文、西班牙文、波蘭文、亞美尼亞文、芬蘭文、愛爾蘭文、拉丁文、土耳其文中，「脷」呢個字都可以解「語言」。

脷
生理
屬於	口
識別碼
UBERON ID	0001723
TA	A05.1.04.001
[改維基數據]
睇 傾 改

響中醫入面，可以通過條脷來診斷病情。

原來脷叫做舌，不過廣東人認為「舌sit3」同「蝕sit6」近音，唔吉利，所以就讀蝕嘅相反，讀做利，而且造埋脷呢隻漢字出嚟寫。

味覺

内文：味覺

味覺始於條脷上邊嗰啲味蕾。味蕾包含咗一拃拃味覺感受器（可以睇睇神經細胞嘅概念），呢啲感受器分做好多款，每一款都會喺接觸到某啲特定嘅化合物嗰陣有反應，射神經訊號上去腦部度，腦部處理咗呢啲訊號，就知道條脷掂到嘅物件由乜嘢化學成份組成^[1]。

例如酸味嘅主要來源係嘢食同嘢飲入邊有嘅酸性物質^[2]：pH 值可以用嚟表達一種物質「酸性有幾勁」，例如檸檬汁嘅 pH 值估計就係喺大約 2 至 3 之間^[3]—有顯著嘅酸性，條脷掂到就會令個人感受到一陣酸味。

發音

睇埋：語音學

一個人講嘢嗰陣發出嘅聲（尤其係元音），好大程度上受制於講嘢嘅人條脷嘅郁動。

例如上邊呢幅，係廿一世紀初香港粵語嘅單元音元音圖，當中每個元音都係用國際音標寫^[4]；啲人要將元音分類嗰陣，多數都係睇

1. 條脷最高嗰點喺前定後（元音圖打橫軸）以及
2. 條脷嘅位置有幾接近口腔嘅頂部（元音圖打戙軸）。

用粵語做母語嘅人，可以試吓先後發出粵拼：i1（/i/）、粵拼：u1（/u/）同粵拼：aa1（/a/）噉嘅聲，再一路感受自己條脷嘅郁動。

睇埋

• 元音同輔音：講嘢嗰陣條脷嘅位置同郁動，會決定發出嚟嘅係邊個元音或者輔音。