聲調輪廓

聲調輪廓係指一隻聲調語言入面啲聲調，可能會有「喺隻詞或者段音節中途音高改變」噉嘅情況。用粵語做例子^[1]：

詩si1（陰平）、史si2（陰上）、試si3（陰去）、

時si4（陽平）、市si5（陽上）、事si6（陽去）

標準粵語六調嘅輪廓圖解

同樣嘅元音同輔音，因為音高變化規律唔同咗，段音節表示嘅詞語或者形態素就唔同咗。

基本概念

内文：語音學同音系學

睇埋：音高、聲調同語言韻律

如果畫幅圖 Y 軸做音高^{[註 1]} X 軸做時間，啲聲調會成唔平嘅線，描繪啲聲調嘅「輪廓」，例如下圖就係粵語中詩史試時市事嗰 6 個調嘅輪廓；粵語啲聲調嘅輪廓相對簡單，一個聲調（大致上）一係平一係升一係跌，而相比之下（例如）普通話嘅第三聲調就有「喺隻詞途中，音高開頭嗰陣跌，跟住升」嘅情況。

而下圖就係越南話（北越南音）六調嘅輪廓。留意越南話都係六調，但啲聲調嘅輪廓同粵語嘅有顯著差異。

有研究報告指湖湘話嘅某啲變體聲調上會有更加複雜嘅音高變化^[2]。

基於聲調輪廓嘅諗頭，聲調語言仲有得細分做非平調同純平調^[3]兩大類。粵語就有唔平嘅聲調，粵語第二調－好似係 si2（可能漢字：史）呢吓音噉－會涉及音高喺隻詞途中慢慢上升。如果話一隻聲調語言係純平調嘅，即係話隻語言嘅唔同聲調冚唪唥都係大致平嘅，唔同聲調嘅唯一分別係在於音高唔同，純平調嘅聲調語言喺非洲頗為常見^[4]。

表示方法

圖解：用五度標記法，幫普通話標好四個聲調。

内文：五度標記法

睇埋：變音符號

唔同聲調語言嘅書寫系統，可能會用唔同方法寫聲調，例如喺廿一世紀初，越南話同普通話都係用變音符號表示聲調嘅，唔似得粵拼噉用阿拉伯數字標調。

語音學研究為咗方便分析，通常會想搵返套統一系統同唔同嘅聲調語言標調，當中五度標記法幾多人用，呢套方案將音高分做五度，然後用阿拉伯數字 1 到 5 標調，1 係最低音而 5 係最高音，每個聲調會掕住多過一個數字，表示音高變化。如果用呢套方法標粵語聲調嘅話^[5]：

詩（[si⁵⁵]）、史（[si³⁵]）、試（[si³³]）、

時（[si²¹]）、市（[si²³]）、事（[si²²]）

—詩個聲調高音同大致平，係 55；史個聲調開頭中音然後升上高音，係 35；時個聲調初頭低低哋然後跌到更低，係 21... 如此類推。

語言對比

睇埋：音系類型

好多粵語外嘅語言或方言都有聲調，例如普通話同越南話噉：

話	幾多調	示例
普通話	四調	媽（[ma55]）、麻（[ma35]）、馬（[ma214]）、罵（[ma51]）
越南話[註 2]	六調	ba（33）、bà（21）、bả（313）、bã（3ˀ5）、bá（35）、bạ（3ˀ2ʔ）

普通話頭嗰兩調大致等同粵語嘅詩史，越南話頭兩調近似試時而第五調近似史^{[註 3]}。當中留意越南話屬於南亞語系而非漢藏語系，佢哋啲聲調有一啲粵語同普通話冇嘅符號（ˀ 同 ʔ 等）呢啲符號表示個聲調有聲門塞音化（指發出嗰吓聲嗰陣聲門局部或者完全噉關閉）嘅情況。

泰語（以曼谷嘅音作準）屬於壯侗語系（分佈喺廣西嘅壯語都屬於壯侗語系），分高中低升降五調，輪廓如下圖所示^[6]，當中頭三者有啲似粵語嘅史試時。泰語啲羅馬化方案會用簡單嘅變音符號表示聲調^[7]。

話	幾多調	示例
泰語曼谷音	五調	máa（高）maa（中）màa（低）mǎa（升）mâa（降）

睇埋

• 粵語聲調
• 粵語音系
• 平仄
• 填詞

註解

1. 實證研究表明，啲人判斷聲調嗰陣，會按講嘢嗰方把聲（例如男人嘅聲傾向低音啲）調整預期。
2. 越南唔同地區嘅越南話啲聲調有一定差異。以下係用河內嗰頭嘅音做基準嘅。
3. 大致：話語言 A 嘅第一調完全等同語言 B 嘅第二調，近乎係冇可能嘅。