Ігар Шытаў

Ігар Сяргеевіч Шытаў (нар. 24 кастрычніка 1986 году, Полацак, БССР) — колішні беларускі футбаліст, абарона. Выклікаўся ў нацыянальную зборную.

Ігар Шытаў
Пэрсанальная інфармацыя
Нарадзіўся	24 кастрычніка 1986(1986-10-24)[1][2][3] (38 гадоў) Полацак, Віцебская вобласьць, БССР, СССР
Рост	185 см
Вага	80 кг
Пазыцыя	абаронца
Клюбы
Гады	Клюб	Гульні (галы)¹
2005	Дынама Менск	0 (0)
2006—2008	Тарпэда-БелАЗ	78 (2)
2009—2011	БАТЭ	60 (4)
2011—2013	Дынама Масква	3 (0)
2012—2013	→ Мардовія Саранск	20 (0)
2014—2016	Мардовія Саранск	44 (0)
2016—2018	Астана	41 (1)
2018—2021	Дынама Менск	47 (2)
Зборныя
2004	Беларусь (да 19)[d]	2 (0)
2006—2009	Беларусь (да 21)	23 (2)
2008—2019	Беларусь	66 (1)

Кар’ера

Клюбная

Пачаў займацца футболам у СДЮШАР Полацку. Пазьней трапіў у сыстэму менскага «Дынама». Гуляў у Другой лізе за клюбы «Дынама-БНТУ» і РВАР. У 2004—2005 гадах выступаў за дубль «Дынама», але гэтак і не дэбютаваў у асноўнай камандзе.

На працягу 2006—2008 гадоў абараняў колеры каманды клюбу «Тарпэда» (Жодзін), разам зь якім дэбютаваў у найвышэйшай лізе. Здолеў замацавацца ў асноўным складзе жодзінцаў, ужо паводле вынікаў сэзону 2007 году трапіў у сьпіс 22 найлепшых гульцоў чэмпіянату. Сваёй гульнёй за апошнюю каманду прыцягнуў увагу прадстаўнікоў трэнэрскага штабу клюбу БАТЭ, у табар якога далучыўся ў 2009 годзе. Разам з барысаўчанамі двойчы стаў чэмпіёнам краіны, выступаў у групавым раўндзе Лігі Эўропы. Спачатку гуляў як цэнтральны абаронца, але пазьней пачаў трывала выкарыстоўвацца на правым флянзе абароны, рэгулярна зьяўляючыся ў складзе чэмпіёну краіны.

18 жніўня 2011 году падпісаў 4-гадовы кантракт з маскоўскім «Дынама»^[4]. Аднак ня здолеў замацавацца ў «Дынама», за год у расейскім клюбе правёў толькі 3 матчы. У верасьні 2012 году быў аддадзены ў арэнду клюбу «Мардовія» да чэрвеня 2013 году^[5]. У саранскім клюбе трывала выступаў у асноўным складзе, але ня здолеў выратаваць яго ад вылету з Прэм’ер-лігі. 15 студзеня 2014 году кантракт з маскоўскім «Дынама» быў скасаваны на ўзаемную згоду^[6]. У канцы студзеня 2014 году падпісаў кантракт з «Мардовіяй» на два з паловай гады^[7]. У 2014—2016 гадах гуляў за «Мардовію» ў Прэм’ер-лізе.

У ліпені 2016 году як вольны агент падпісаў кантракт на два гады з казаскім клюбам «Астана»^[8]. У ліпені 2018 году па заканчэньні кантракту пакінуў каманду^[9] і неўзабаве далучыўся да менскага «Дынама»^[10]. У складзе дынамаўцаў хутка замацаваўся ў асноўным складзе. У 2019 годзе шмат прапусьціў праз траўмы, а ў пачатку 2020 году згодна з рашэньнем галоўнага трэнэра Сяргея Гурэнкі быў пераведзены ў дубль^[11]. Аднак, хутка Гурэнка пакінуў пасаду галоўнага трэнэра, і Шытаў вярнуўся ў асноўны склад. У 2021 годзе пачаў радзей зьяўляцца на полі, у ліпені зноў быў накіраваны ў дубль. У верасьні 2021 году па заканчэньні кантракту пакінуў «Дынама»^[12], а ў кастрычніку завяршыў прафэсійную кар’еру^[13].

Міжнародная

Выступаў у складзе моладзевай зборнай Беларусі на моладзевым чэмпіянаце Эўропы 2009 году ў Швэцыі. 2 лютага 2008 году дэбютаваў у нацыянальнай зборнай Беларусі ў матчы супраць зборнай Ісьляндыі на міжнародным турніры ў Мальце. Адзіны гол у міжнароднай кар’еры забіў цягам таварыскай гульні супраць зборнай Фінляндыі на 92 хвіліне, усталяваўшы канчатковы лік у гульні 1:1.

Трэнэрская праца

З чэрвеня 2022 году працаваў трэнэрам па агульнай фізычнай падрыхтоўцы ў дублі расейскага «Краснадару»^[14]. У студзені 2024 году ўвайшоў у трэнэрскі штаб «Менску»^[15].

Узнагароды

• Чэмпіён Беларусі: 2009, 2010
• Бронзавы прызэр чэмпіянату Беларусі: 2018
• Чэмпіён Казахстану: 2016, 2017
• Уладальнік Кубка Беларусі: 2010
• Уладальнік Кубка Казахстану: 2016
• Уладальнік Супэркубка Беларусі: 2011
• У сьпісе 22 найлепшых футбалістаў чэмпіянату Беларусі: 2007, 2008, 2009, 2010, 2018
• Найлепшы абаронца чэмпіянату Беларусі: 2009

Статыстыка

Клюб	Сэзон	Чэмпіянат
		Дывізіён	Матчы	Галы
Дынама Менск	2018	Найвышэйшая ліга	11	0