Гамафобія

Гамафобія (ад стар.-грэц. Ὁμός — «падобны, аднолькавы», φόβος — «страх, боязь») — зборнае азначэньне для розных формаў нэгатыўнай рэакцыі на праявы гомасэксуальнасьці, а таксама на зьвязаныя зь ёю грамадзкія зьявы. Гамафобія разглядаецца ў афіцыйных міжнародных дакумэнтах Эўрапарлямэнту, а таксама некаторымі сацыялягічнымі інстытутамі ў адным шэрагу з расізмам, ксэнафобіяй, антысэмітызмам і сэксізмам^[1].

Гамафобія можа даходзіць да забойстваў, тэрарыстычных актаў, інстытуцыяналізаваных сьмяротных прысудаў, як гэта адбываецца ў Аўганістане, Саўдаўскай Арабіі, Іране, Паўночнай Нігерыі, Маўрытаніі, Судане і Емэне або падчас гэнацыднага перасьледу нацысцкім рэжымам эўрапейскіх гомасэксуальных асобаў^[2].

Гамафобія можа мець рознае паходжаньне, якое можа адрозьнівацца ў залежнасьці ад сацыяльнага і гістарычнага кантэксту. Гэта, у прыватнасьці, можа паўстаць з рэлігійных пазыцыяў, з культурных меркаваньняў аб сацыяльнай ролі палоў і сацыяльных нормаў, якія ідуць зь імі, з маральных меркаваньняў, якія прымаюць клінічныя меркаваньні ў якасьці апраўданьня (у мэдыцыне, асабліва ў псыхіятрыі, і ў псыхалёгіі), або з падаўленых гомасэксуальных жаданьняў^[3].

Дэфініцыя

Гамафобія звычайна азначае «варожае стаўленьне да гомасэксуальных асобаў, мужчынаў або жанчынаў»^[4]. Упершыню панятак выкарыстаны ў Злучаных Штатах у пачатку 1970-х гадоў, гэты тэрмін потым зьявіўся ў францускамоўных слоўніках у канцы 1990-х гадоў для апісаньня «непрыманьня гомасэксуалізму», «сыстэматычнай варожасьці ў адносінах да гомасэксуалаў» або да «тых, хто праяўляе жаданьне, інтарэс да асобаў свайго полу або маеце зь імі сэксуальныя стасункі»^[4].

Тэрмін «гамафобны» апісвае «таго, хто адчувае агіду да гомасэксуалаў» або, шырэй, «да людзей, практыкі або ўяўленіні якіх зьяўляюцца гомасэксуальнымі»^[5].

Для некаторых аўтараў гэты тэрмін ахоплівае наагул нянавісьць да ўсёй ЛГБТК+-супольнасьці^[6].