Джанлюка Скамака

Джанлю́ка Скама́ка (па-італьянску: Gianluca Scamacca; нар. 1 студзеня 1999 году) — італьянскі футбаліст, нападнік клюбу «Аталянта» і нацыянальнай зборнай Італіі.

Джанлюка Скамака
Пэрсанальная інфармацыя
Нарадзіўся	1 студзеня 1999(1999-01-01)[1] (26 гадоў) Рым, Італія
Рост	195 см
Вага	85 кг
Пазыцыя	нападнік
Клюбная інфармацыя
Клюб	Аталянта
Нумар	9
Клюбы
Гады	Клюб	Гульні (галы)¹
2016—2017	Ёнг ПСВ[d]	3 (0)
2017—2022	Сасуолё	39 (16)
2018	→ Крэманэзэ	14 (1)
2018—2019	→ Зволе	8 (0)
2019—2020	→ Асколі[d]	33 (9)
2020—2021	→ Джэноа	26 (8)
2022—2023	Ўэст Гэм Юнайтэд	16 (3)
2023—	Аталянта	29 (12)
Зборныя
2014—2016	Італія (да 17)[d]	28 (6)
2016—2017	Італія (да 18)[d]	4 (3)
2017—2018	Італія (да 19)[d]	11 (8)
2018—2019	Італія (да 20)[d]	12 (5)
2018—2021	Італія (да 21)[d]	15 (9)
2021—	Італія	20 (1)

Кар’ера

Клюбная

Выхаванец футбольных акадэміяў рымскіх клюбаў «Ляцыё» і «Ромы». Аднак, яшчэ падлеткам трапіў у Нідэрлянды, дзе навучаўся ў акадэміі эйндговэнскага клюбу ПСВ^[2]. У моладзевай камандзе клюбу дэбютаваў у другім дывізіёне нідэрляндзкага чэмпіянату.

У студзені 2017 году вярнуўся на радзіму, узгодніўшы працоўную дамову з клюбам «Сасуолё» тэрмінам на чатыры з паловай гады^[3]. 29 кастрычніка дэбютаваў у Сэрыі А, згуляўшы матч супраць «Напалі». У элітным дэвізіёне юнак ня даў рады, таму выправіўся на пачатку 2018 году ў арэнду ў клюб Сэрыі Б «Крэманэзэ»^[4]. Сэзон 2018—2019 гадоў згуляў у Эрэдывізіі, абараняючы колеры «Зволе»^[5]. Пасьля ў арэндзе правёў наступныя гады ў «Асколі» і «Джэноа». Улетку 2021 году вярнуўся ў «Сасуолё», дзе склаў выніковую троіцу з Дамэніка Бэрардзі і Джакама Распадоры. 17 кастрычніка нападнік адзначыўся дублем у браму былога клюбу «Джэноа», а агулам за сэзон улучыў 16 галоў у браму супернікаў.

Такі ўхвальны сэзон вымусіў ангельскі «Ўэст Гэм Юнайтэд» набыць гульца за 30,5 мільёнаў фунтаў. Паводле дамовы пры пэўных варунках італьянцы мусілі атрымаць яшчэ дадаткова 5 мільёнаў фунтаў. Дэбютаваў у Вялікабрытаніі 7 жніўня 2022 году ў матчы супраць «Манчэстэр Сіці»^[6]. Аднак, посьпеху італьянцу бракавала, пагатоў ён яшчэ атрымаў траўму калена, якая вымагала мэдычнай апэрацыі. 7 жніўня 2023 году нападнік прыяднаўся да «Аталянты». Ужо 2 верасьня Скамака адзначыўся дублем у браму «Монцы»^[7]. 11 красавіка 2024 году спрычыніўся да разгрому ангельскага «Лівэрпула» на ягоным полі ў матчы Лігі Эўропы. Гулец двойчы пацэліў мяч у браму мэрсісайдцаў, а выніковы лік 0:3, даў магчымасьць атрымаць перавагу перад другім матчам двубою.

Міжнародная

Дэбютаваў у складзе нацыянальнай зборнай Італіі 8 верасьня 2021 году ў адборачным матчы да чэмпіянату Эўропы 2022 году супраць зборнай Летувы. Гулец зьявіўся на пляцоўцы ў другім тайме, замяніўшы Фэдэрыка Бэрнардэскі^[8]. 17 кастрычніка 2023 году ўлучыў свой першы гол за каманду ў матчы супраць зборнай Ангельшчыны, але апэнінцы зьведалі паразу ў тым матчы зь лікам 3:1.

Дасягненьні

«Ўэст Гэм Юнайтэд»:

• Пераможца Ліга канфэрэнцыяў: 2023

«Аталянта»:

• Пераможца Лігі Эўропы: 2024