Жаночая зборная Бэльгіі па баскетболе

Каралеўская бэльгійская баскетбольная фэдэрацыя была заснаваная ў 1933 годзе. Празь некаторы час была сфармаваная жаночая зборная, якая кваліфікавалася на другі чэмпіянат Эўропы ў 1950 годзе, дзе бэльгійкі занялі восьмае месца пры дванаццаці ўдзельніках.

Пасьля дзесяцігадовай адсутнасьці каманда трапіла на чэмпіянаты Эўропы 1960 і 1962 гадоў, у двух выпадках фінішаваўшы толькі на перадапошнім дзясятым радку. Чакаць наступнага ўдзелу бэльгійкі мусілі некалькі гадоў, згуляўшы на чэмпіянаце Эўропы 1968 году. Спартоўкі перагулялі зборныя ФРН і Нідэрляндаў, але саступілі зборнай СССР, кваліфікаваўшыся ў фінальны раўнд. Пасьля гэтага, аж да канца стагодзьдзя, для бэльгійскіх баскетбалістак быў цяжкі час, бо за наступныя сямнаццаць чэмпіянатаў яны бралі ўдзел толькі ў чатырох зь ім, ды і там зборная Бэльгіі кожным разам фінішавала на апошнім або перадапошнім месцы.

На чэмпіянаце Эўропы 2003 году ў Грэцыі бэльгійкі ня толькі адабраліся на турнір, але і здолелі выйсьці з групы. У чвэрцьфінале спартоўкі зазналі паразу ад зборнай Чэхіі зь лікам 98:62, заняўшы агулам шостае месца на Эўра. Прапусьціўшы наступны чэмпіянат Эўропы, «бэльгійскія коткі» вярнуліся ў 2007 годзе, дзе занялі сёмае месца. Сапраўдны посьпех быў дасягнуты на на чэмпіянаце Эўропы 2017 году. Бэльгійкі здабылі перамогі ў трох матчах сваёй групы, выгуляўшы зборныя Чарнагорыі, Расеі і Латвіі, заняўшы першае месца і кваліфікаваўшыся ў чвэрцьфінал. У матчы на выбыцьцё зь лікам 79:66 была перагуляная зборная Італіі. Гэтая перамога дала гістарычнае прасоўваньне у паўфінал турніру ды дала мажлівасьць зборнай заявіцца на чэмпіянат сьвету 2018 году. У паўфінальным матчы спартоўкі з Бэльгіі сустрэліся з зборнай Гішпаніі, у выніку чаго перамогу зь лікам 68:52 атрымалі баскетбалісткі зь Пірэнэяў. У матчы за бронзавыя мэдалі перамогу сьвяткавала зборная Бэльгіі, якая перагуляла спартовак з зборнай Грэцыі. Матч скончыўся зь пераканаўчым лікам 72:45, а галоўнымі зоркамі ў тым матчы сярод бэльгіек былі Кім Мэстдаг (18 пунктаў, 5 падбораў), Ан Ваўтэрс (14 пунктаў, 8 падбораў) і Эма Мээсэман (15 пунктаў, 4 падборы). Гэта быў першы раз, калі Бэльгія ўзьнялася на п’едэстал на буйных жаночых ці мужчынскіх баскетбольных турнірах^[1]. На чэмпіянаце Эўропы 2019 году бэльгійскія атлеткі трапілі ў чвэрцьфіналу, дзе ў авэртайме саступілі зборнай Францыі зь лікам 80:84^[2].

Ачоленыя французам Рашыдам Мэзьянам, зборная згуляла на чэмпіянаце Эўропы 2023 году. На групавым этапе былі адоленыя зборныя Ізраілю (108:59) і Чэхіі (84:41). У апошнім матчы групавога этапу яны перамаглі італьянак зь лікам 72:64. У чвэрцьфінале на каманду трапілі дзейныя чэмпіёнкі з зборнай Сэрбіі. Тым ня менш, бэльгійкі здабылі ўпэўненую перамогу зь лікам 93:53, а Эма Мээсэман аформіла трыпл-дабл, першы ў гісторыі эўрапейскага баскетболу^[3]. У паўфінале бэльгійкі сустрэліся з спартоўкамі з Францыяй. У напружаным матчы баскетбалісткі Бэльгіі перамаглі зь лікам 67:63 і ўпершыню кваліфікаваліся ў фінал эўрапейскага чэмпіянату. У перапынку фінальнага матчу супраць зборнай Гішпаніі бэльгійкі саступалі зь лікам 32:25, але ў апошняй чвэрці здолелі адгуляцца і здабыць свой першы тытул^[4]. Мээсэман была названая найлепшай гульчыхай турніру і ўвайшла ў пяцёрку найлепшых гульчыхаў турніру поруч з Жулі Ванлёо і Жулі Алеман. На летніх Алімпійскіх гульнях 2024 году зборная спынілася на чацьвертым месцы. У 2025 годзе зборная абараніла свой тытул чэмпіёнак Эўропы.

Жаночая зборная Бэльгіі па баскетболе

Гісторыя

Крыніцы

Вонкавыя спасылкі

Wikiwand - on