Нараўка (вёска)

На́раўка (па-польску: Narewka, назва ў мясцовай беларускай гаворцы: На́раўка^[2]) — вёска ва ўсходняй Польшчы, цэнтар гміны ў Гайнаўскім павеце Падляскага ваяводзтва. Разьмяшчаецца над ракой Нараўка, ад якой і ўзяла сваю назву.

Нараўка
польск. Narewka
Герб Нараўкі
Першыя згадкі:	1639
Былая назва:	Малая Нараўка
Мясцовая назва:	Нараўка
Краіна:	Польшча
Ваяводзтва:	Падляскае
Павет:	Гайнаўскі
Гміна:	Нараўка
Насельніцтва:	935 чал. (2013)[1]
Часавы пас:	UTC+1
летні час:	UTC+2
Паштовы індэкс:	17-220
Геаграфічныя каардынаты:	52°50′10″ пн. ш. 23°45′27″ у. д.
Нараўка на мапе Польшчы Нараўка
Галерэя здымкаў у Вікісховішчы

Гісторыя

Заснаваная ў 1639 г. Томашам Выдрай-Палікоўскім у месцы здабычы жалезнай руды. Разьвіцьцю вёскі паспрыялі рэформы Антонія Тызэнгаўза ў берасьцейска-кобрынскай эканоміі, калі ў Нараўцы зьявілася невялікая гута жалеза. У 1774 г. кароль Станіслаў Аўгуст Панятоўскі фундаваў тут касьцёл у імя Яна Хрысьціцеля, а ў 1794 г. на могілках зьявілася ўніяцкая царква. Да 1844 г. вёска находзілася ў арэндзе прыватным уладальнікам, пасьля перайшла ў казну — з таго моманту тут пасяляюцца габрэі (большасьць з Орлі і Пружанаў). 22 ліпеня 1866 г. царскія ўлады перадалі драўляны касьцёл праваслаўным і згареў ён як царква ў пажары 1900 г.. У 1908 г. каталікі дабіліся аднаўленьня парафіі, а новы касьцёл быў адбудаваны да 1914 г. ^[3]. У міжваенны пэрыяд Нараўка была цэнтрам гміны Масева Бельскага павету Беластоцкага ваяводзтва. Паводле польскага перапісу насельніцтва 1921 г. пражывала тут 1205 жыхароў (204 каталікоў, 242 праваслаўных, 1 лютэранін, 758 габрэяў; 376 жыхароў было запісаных палякамі, 213 беларусамі, 611 жыдамі, 5 расейцамі)^[4]. Пасьля пажару драўлянага касьцёла ў 1965 г. новы мураваны будынак быў адбудаваны да 1973 г.^[3].

Гістарычныя каштоўнасьці

• 
  Царква сьв. Міколы
• 
  Габрэйскія могілкі

• Царква сьв. Міколы — пабудаваная ў 1864 г. як царква сьв. Аляксанда Неўскага.
• Плян вёскі — нязьменны з 18 ст.
• Габрэйскія могілкі — закладзеныя ў сярэдзіне 19 ст.

Страчаная спадчына

• Уніяцкая могілкавая царква сьв. Яна Хрысьціцеля (пабудаваная ў 1794, згарэла ў пажары 1898 г.)
• Касьцёл сьв. Яна Хрысьціцеля (пабудаваны ў 1914 г., згарэў у 1965 г.)
• Сынагога (пабудаваная ў сярэдзіне 19 ст., згарэла ў 1940 г.)^[5]

Выбітныя землякі

• Тамара Саланевіч (1938 — 2000) — беларуска-польскі кінарэжысэр і сцэнарыст.
• Аляксандр Ваўкавыцкі(1895-1945) — беларускі настаўнік і адзін з заснавальнікаў адукацыі ў Нараўцы ў Падляшшы, беларускі актывіст.