Плянта (Пружанскі раён)

Пля́нта — былы маёнтак у ваколіцах Пружанаў Берасьцейскай вобласьці. Колішняя сядзіба Пуслоўскіх, Казлоўскіх, Заянкоўскіх.

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Плянта.

Плянта
трансьліт. Plianta
Краіна:	Беларусь
Вобласьць:	Берасьцейская
Раён:	Пружанскі
Часавы пас:	UTC+3
Тэлефонны код:	+375 1632
Нумарны знак:	1
Геаграфічныя каардынаты:	52°26′35″ пд. ш. 24°21′6″ з. д.
Плянта на мапе Беларусі ± Плянта Плянта

Мінуўшчына

За расейскім часам — у Гарадзечанскай воласьці Пружанскага павету Гарадзенскай губэрні^[1]. На пачатку XIX стагодзьдзя выкупленая ў графа Пятра Румянцава-Задунайскага былым маршалкам Слонімскага павету Войцехам Брунанам Пуслоўскім.

У часе паўстаньня 1830—1831 рокаў уласьнік Плянты Тытус Пуслоўскі, сын Войцеха, сфармаваў ва ўласным маёнтку паўстанцкі атрад^[2].

Апошнім гаспадаром быў Юзэф Заянкоўскі.

Апісаньне

Маёнтак разьмяшчаўся між вёскамі Козі Брод, Сасноўка, Прылуччына.

У сядзібна-паркавы ансамбль уваходзілі сядзібны дом, гаспадарчыя пабудовы, пэйзажны парк і сажалка. Сядзібны дом пабудаваны ў другой палове XIX стагодзьдзя; драўляны, аднапавярховы, прастакутны ў пляне. Плошча парку складала каля 6 га.

Сучасны стан

У паваенны час сядзіба была разабраная і перавезеная ў вёску Чахец^[3] (паводле іншых зьвестак — у Пружаны^[4]). На яе месцы часткова засаджаны хвойнік і бярозавік, частка тэрыторыі заараная. З гаспадарчых пабудоваў ацалеў толькі мураваны склеп.

Ад парку засталіся рэшткі ліпавай алеі, дубовай альтанкі, грабавы і бярозавы гаі, плянтацыя дэкаратыўнага хмызьняку, адзінкавыя дрэвы пладовага саду. Каналы і сажалка моцна зарослыя.