Ракітнаўскі раён

Ракітнаўскі раён (па-ўкраінску: Рокитнівський район) — адміністрацыйна-тэрытарыяльная адзінка на поўначы Ровенскай вобласьці Ўкраіны. Адміністрацыйны цэнтар — мястэчка Ракітнае.

Гэта артыкул пра раён у Ровенскай вобласьці. Калі вам патрэбны артыкул пра раён Кіеўскай вобласьці, глядзіце артыкул Ракітнянскі раён.

Ракітнаўскі раён
Рокитнівський район
Герб	Сьцяг
Агульныя зьвесткі
Краіна	Украіна
Статус	раён
Уваходзіць у	Ровенская вобласьць
Адміністрацыйны цэнтар	Ракітнае
Дата ўтварэньня	1939
Афіцыйныя мовы	украінская
Насельніцтва (2001)	52 тыс.чал
Нацыянальны склад	украінцы — 83,6% беларусы — 15,4% расейцы — 0,4% палякі — 0,4%.
Плошча	2350 км²
Месцазнаходжаньне
Мэдыя-зьвесткі
Часавы пас	GMT +2
Афіцыйны сайт
Дадатковыя мультымэдыйныя матэрыялы

Мяжуе на поўначы зь Пінскім раёнам Беларусі.

Гісторыя

Першыя паселішчы на тэрыторыі раёну згадваюцца ў апісаньні ўласнасьці ўкраінскіх магнатаў сярэдзіны XVI стагодзьдзя. З часу заснаваньня і да 1922 году паселішча было вядомае як Ахотнікава. Паходжаньне гэтай назвы найперш зьвязвалі зь імем уласьніка земляў. Новы этап разьвіцьця паселішча пачаўся ў 1888 годзе, калі бэльгіец Розэнбэрг выкупіў невялікую дзялянку з кварцавымі пяскамі ў ваколіцы сяла Ракітнае. Гэтыя пяскі былі прыдатныя для шкловарэньня, а таму тут былі ўсе неабходныя ўмовы стварыць, няхай і прымітыўную, але дзейную гуту. Гэта зрабілася штуршком для хуткага разьвіцьця паселішча, і ў выніку ў 1898 годзе быў заснаваны шклозавод.

У 1900 годзе праз раён была пракладзеная чыгунка Кіеў — Ковель. Каляіна праходзіла праз паселішча, і такім чынам зьявілася чыгуначная станцыя «Ракітнае» (па-ўкраінску: Рокитне), што станоўча сказалася на разьвіцьці прамысловасьці ў краі. Паводле Рыскай мірнай дамовы Ахотнікава адышло да Польшчы. Праз год паселішча было перайменаванае ў Ракітнае, а чыгуначная станцыя атрымала назву Ракітнае-Валынскае (па-ўкраінску: Рокитне-Волинське).

У верасьні 1939 году Ракітнае ў складзе Заходняй Украіны было далучанае да УССР, а праз год, у студзені 1940 году паселішча зрабілася раённым цэнтрам.

Беларусы

Ракітнаўскі раён зьяўляецца адзіным раёнам ва Ўкраіне, дзе беларусы займаюць другое месца па колькасьці насельніцтва (15,4% згодна з вынікамі Ўсеўкраінскага перапісу насельніцтва 2001 году).^[1]