Дынар

Дына́р (ад па-лацінску: dēnārius «што складаецца зь дзесяці», ад па-лацінску: dēnī «па дзесяці», ад па-лацінску: decem «10»^[1]) — грашовая адзінка розных краінаў, большасьць зь якіх — арабамоўныя або былі часткаю Асманскае імпэрыі (напрыклад, дзяржавы, што ўваходзілі ў склад Югаславіі). Слова «дынар» (па-арабску: دينار‎) пайшло ад дэнарыя, назвы манэты Рымскае імпэрыі. Грошы, што згадваюцца ў Каране, таксама маюць назву дынараў.

Краіны, што ўжываюць (або ўжывалі) дынар

Дынар Кралевіча Марка. Авэрс.

Краіны, што выкарыстоўваюць дынар як уласную валюту

• Альжыр: альжырскі дынар
• Бахрэйн: бахрэйнскі дынар
• Іран: іранскі рыял складаецца з 100 дынараў
• Ірак: ірацкі дынар (глядзіце таксама курдыстанскі дынар)
• Ярданія: ярданскі дынар
• Кувэйт: кувэйцкі дынар
• Лібія: лібійскі дынар
• Сэрбія: сэрбскі дынар
• Паўночная Македонія: македонскі дэнар
• Туніс: туніскі дынар.

У 2015 годзе было абвешчана пра выпуск тэрарыстычнаю арґанізацыяю «Ісламская дзяржава», дзеючай як няпрызнаная дзяржава на тэрыторыі Сырыі й Іраку, залатых манэтаў — дынараў. Курс гэтага дынару роўны 139 далярам ЗША^[2].

Краіны, што раней выкарыстоўвалі дынар як уласную валюту

• Босьнія і Герцаґавіна: дынар Босьніі і Герцаґавіны
• Харватыя: харвацкі дынар
• Рэспубліка Сэрбская: сэрбскі дынар
• Рэспубліка Сэрбская Краіна: дынар Сэрбскай Краіны
• Фэдэрацыя Паўднёвай Арабіі: паўднёваарабійскі дынар
• Паўднёвы Емэн: дынар Паўднёвага Емэну
• Югаславія: югаслаўскі дынар
• Судан: суданскі дынар