Карым Абдул-Джабар

Кары́м Абду́л-Джаба́р (па-ангельску: Kareem Abdul-Jabbar, народжаны Фэрдынанд Льюіс Алсындор-малодшы па-ангельску: Ferdinand Lewis Alcindor Jr.; нар. 16 красавіка 1947 году, Нью-Ёрк, ЗША) — амэрыканскі прафэсійны баскетбаліст. Цягам 20 сэзонаў сваёй гульнёвай кар’еры выступаў за «Мілўокі Бакс» і «Лос-Анджэлес Лэйкерз» у Нацыянальнай баскетбольнай асацыяцыі.

Карым Абдул-Джабар
па-ангельску: Ferdinand Lewis Alcindor, Jr.
Пазыцыя:	цэнтравы
Рост:	218 см[1]
Вага:	102 кг[1]
Грамадзянства:	ЗША[2][3][4][…]
Нарадзіўся:	16 красавіка 1947(1947-04-16)[5][6][7][…] (78 гадоў) Нью-Ёрк, Нью-Ёрк, ЗША[5][8][9]
Альма-матэр:	Каліфарнійскі ўнівэрсытэт у Лос-Анджэлесе[d][10] Power Memorial Academy[d]
Драфт
1, драфт НБА 1969 году Мілўокі Бакс
Клюбы
Гады	Клюб
1965—1969	ЮКЛА Бруінз[d]
1969—1975	Мілўокі Бакс
1975—1989	Лос-Анджэлес Лэйкерз
Асабістыя ўзнагароды і дасягненьні
NBA Rookie of the Year Award[d] (1970) зборная навічкоў НБА[d] (1970) зборная ўсіх зорак НБА[d] (1971) самы каштоўны гулец фіналу НБА (1971) Узнагарода самаму каштоўнаму гульцу НБА[d] (1971) Узнагарода самаму каштоўнаму гульцу НБА[d] (1972) зборная ўсіх зорак НБА[d] (1972) зборная ўсіх зорак абароны НБА[d] (1974) Узнагарода самаму каштоўнаму гульцу НБА[d] (1974) зборная ўсіх зорак НБА[d] (1974) зборная ўсіх зорак НБА[d] (1973) зборная ўсіх зорак абароны НБА[d] (1975) зборная ўсіх зорак НБА[d] (1976) Узнагарода самаму каштоўнаму гульцу НБА[d] (1976) Узнагарода самаму каштоўнаму гульцу НБА[d] (1977) зборная ўсіх зорак НБА[d] (1977) зборная ўсіх зорак абароны НБА[d] (1979) зборная ўсіх зорак НБА[d] (1980) Узнагарода самаму каштоўнаму гульцу НБА[d] (1980) зборная ўсіх зорак абароны НБА[d] (1980) зборная ўсіх зорак НБА[d] (1981) зборная ўсіх зорак абароны НБА[d] (1981) зборная ўсіх зорак НБА[d] (1984) Спартсмен года па версіі Sports Illustrated[d] (1985) самы каштоўны гулец фіналу НБА (1985) зборная ўсіх зорак НБА[d] (1986) NAACP Image Award for Outstanding Literary Work – Children[d] (2013) Каліфарнійская заля славы[d] (2014)
Статыстыка на NBA.com

Кар’ера

«Мілўокі Бакс»

«Гарлем Глабтротэрз» прапанавалі Алсындору 1 мільён даляраў, каб той гуляў за іх, але гулец адмовіўся і быў абраны пад першым нумарам на драфце НБА 1969 году клюбам «Мілўокі Бакс», якія толькі другі сэзон спаборнічалі ў лізе.

У тым жа годзе баскетбаліст браў удзел і ў драфце Амэрыканскай баскетбольнай асацыяцыі, дзе яго абраў таксама пад першым нумарам клюб «Нью-Ёрк Нэтс»^[11]. Менавіта гэты клюб быў абсалютна ўпэўнены, што спартовец аддасьць перавагу ім, бо ў рэшце рэшт, ён быў родам зь Нью-Ёрку. Гулец, аднак, разважыў інакш — ад кожнай каманды ён прыняў толькі адну прапанову кошту. Агенты Мілўокі прапанавалі вялікую суму, што і вызначыла далейшую кар’еру гульца. Пасьля таго, як Алсындор абраў прапанову «Мілўокі Бакс» у памеры 1,4 мільёнаў даляраў, «Нэтс» прапанавалі гарантаваныя 3,25 мільёна даляраў. Алсындор адхіліў гэтую прапанову, адзначыўшы, што такая вайна прыніжае ўсіх уцягнутых людзей^[12].

Абдул-Джабар у 1974 годзе ў сваіх фірмовых акулярах.

Прысутнасьць Алсындора дазволіла «Бакс» у сэзоне 1969—1970 гадоў заняць другое месца ва Ўсходнім дывізіёне НБА з паказьнікам у 56 перамог і 26 паразаў. Баскетбаліст імгненна стаў зоркай, заняўшы другі радок у лізе паводле выніковасьці, маючы ў сярэднім 28,8 пунктаў за матч, і трэцяе месца паводле падбораў, за што ён атрымаў званьне навічка году НБА^[13]. Да Джэйсана Тэйтума ў 2018 годзе, Алсындор быў адзіным пачаткоўцам, які зьбіраў больш за 20 пунктаў у плэй-оф. У наступным сэзоне «Бакс» набылі зорнага абаронцу Оскара Робэртсана. Мілўокі працягнулі паляпшаць свае вынікі ў лізе, а Алсындор атрымаў сваё першае званьне самага каштоўнага гульца НБА^[13]. Ён таксама ачоліў лігу паводле агульнай колькасьці пунктаў, якіх было 2596^[14]. У плэй-оф «Бакс» выйгралі чэмпіянат. 1 траўня 1971 году, на наступны дзень пасьля таго, як «Бакс» сталі чэмпіёнам, баскетбаліст узяў мусульманскае імя Карым Абдул-Джабар. У іслам ён навярнуўся яшчэ калі навучаўся ва ўнівэрсытэце. Да 1975 году спартовец тры разы прызнаваўся самым каштоўным гульцом НБА ды акрамя таго, улучаўся ў пяцёрку найлепшых гульцоў НБА паводле пунктаў, падбораў, перахопаў і адсотку кідкоў з гульні.

Не зважаючы на тое, што агулам вынікі і добрае стаўленьне спартоўца да Мілўокі і мясцовых прыхільнікаў, празь некаторы час Сярэдні Захад перастаў задавальняць Абдуд-Джабара, таму ён запатрабаваў пераводу альбо ў Нью-Ёрк, альбо ў Лос-Анджэлес. Патрабаваньне было задаволенае, у выніку чаго ў 1975 годзе спартовец перайшоў у «Лос-Анджэлес Лэйкерз»^[15].

«Лос-Анджэлес Лэйкерз»

За першы ж сэзон на новым месцы Карым стаў лідэрам лігі паводле згуляных на пляцоўцы хвілінаў, блёк-шотаў і падбораў. У сярэднім ён зьбіраў 27,7 пунктаў за гульню. Ягоныя 1111 падбораў пад сваім кошыкам застаюцца рэкордам НБА^[16]. Паводле вынікаў году спартовец атрымаў чацьвертую прэмію як самы каштоўны гулец НБА. З часам у Абдул-Джабара зьявіўся сындром эрозіі рагавіцы, то бок ягоны вочы не ўвільгатняліся належным чынам і вельмі хутка перасыхалі, таму баскетбаліст пачаў насіць свае фірмовыя акуляры. Гэта не паўплывала на якасьць гульні, бо наступныя тры сэзоны ён правёў на ўсё тым жа высокім узроўні. Абдул-Джабар прапусьціў толькі адзіную гульню ў сэзоне 1986—1987 гадоў, калі ягоныя вочы спухнулі празь перасыханьне.

Абдул-Джабар атрымлівае перадачу ад Мэджыка Джонсана ў 1985 годзе.

Сэзон 1976—1977 гадоў для Абдул-Джабара быў вельмі ўдалым. Ён быў лідэрам лігі паводле адсотку трапнасьці з гульні, заняў другое месца паводле падбораў і блёк-шотаў ды быў трэцім паводле пунктаў за гульню. Ён дапамог «Лэйкерз» усталяваць найлепшы вынік у НБА і здабыў сваю пятую прэмію самаму каштоўнаму гульцу лігі. У плэй-оф 1976—1977 гадоў «Лэйкерз» выгулялі «Голдэн Стэйт Ўорыярз» у паўфінале Заходняй канфэрэнцыі, прабіўшся ў фінал канфэрэнцыі да «Портлэнд Трэйл Блэйзэрз». Вынікам стаў запамінальны матч, у якім Абдул-Джабар згуляў супраць маладога, яшчэ не траўмаванага Біла Ўолтана. Не зважаючы на тое, што баскетбаліст дамінаваў у сэрыі паводле статыстыкі, але Ўолтан і «Трэйл Блэйзэрз» выбілі «Лэйкерз» з турніру.

Празь дзьве хвіліны пасьля пачатку адной з гульняў сэзону 1977—1978 гадоў Абдул-Джабар ударыў гульца «Мілўокі Бакс» Кента Бэнсана ў адплату за занадта агрэсіўны ўдар локцем. Удар зламаў Бэнсану сківіцу і руку самому Абдул-Джабару. У выніку траўмы рукі Абдул-Джабар адсутнічаў два месяцы, пры гэтым ліга пастанавіла не адхіляць яго. У выніку ён быў змушаны прапусьціць Матч усіх зорак НБА 1978 году, у ім адзіны раз за кар’еру гульца яго бракавала. Гульня Абдул-Джабара заставалася моцнай цягам наступных двух сэзонаў, але двойчы ў 1978 і 1979 гадах «Лэйкерз» быў выбіты «Сіетлам».

У 1980-х гадоў дзякуючы далучэньню да каманды Мэджыка Джонсана «Лэйкерз» сталі адной з самых дамінуючых камандаў лігі, зьявіўшыся ў фінале восем разоў і выйграўшы пяць чэмпіянатаў НБА. Асабіста Абдул-Джабар ня быў ужо такім зорным, якім ён быў у 1970-я гады, але меў шэраг яскравых момантаў. Сярод іх была ягоная рэкордная шостая ўзнагарода самаму каштоўнаму гульцу НБА ў 1980 годзе, а ў 1985 годзе баскетбаліст стаў самым каштоўным гульцом фіналу НБА. 5 красавіка 1984 году ён скасаваў рэкорд Ўілта Чэмбэрлена паводле колькасьці пунктаў, закінутых за ўсю кар’еру. Гуляючы ў Лос-Анджэлесе, Абдул-Джабар пачаў займацца ёгай у 1976 годзе, каб палепшыць сваю гнуткасьць, і быў вядомы сваім пільным стаўленьнем да рэжыму фізычнай падрыхтоўкі^[17]. У 1983 годзе Абдул-Джабаравы дом згарэў. Многія ягоныя рэчы, улучна зь ягонай улюбёнай калекцыяй джазавых плытак, якая налічвала блізу 3 тысяч альбомаў, былі зьнішчаныя^[18]. Заўзятары «Лэйкерз» адпраўлялі і прыносілі яму новыя альбомы, што неверагодна натхніла гульца.

13 чэрвеня 1989 году баскетбаліст у веку 42 гадоў апошні раз выйшаў на пляцоўку ў матчы НБА. У гэты дзень «Лэйкерз» саступілі «Дэтройт Пістанз» у апошняй гульні фінальнай сэрыі плэй-оф. 28 чэрвеня гулец аб’явіў аб заканчэньні 20-гадовай кар’еры ў НБА. За час гэтак званага разьвітальнага тура ён атрымліваў авацыі, а таксама падарункі. На зладжаным у ягоны гонар разьвітальным матчы ўсе спартоўцы надзелі ягоныя фірмовыя акуляры.