Марыяна Шчоткіна

Марыя́на Акіндзі́наўна Шчо́ткіна (нарадзілася 20 лістапада 1958 году, востраў Кільдзін Мурманскай вобласьці РСФСР) — беларуская дзяржаўная дзяячка расейскага паходжаньня, міністар працы і сацыяльнай абароны Рэспублікі Беларусь (2009—2016).

Марыяна Шчоткіна
Міністар працы і сацыяльнай абароны Рэспублікі Беларусь
4 сьнежня 2009 — 15 сьнежня 2016
Прэзыдэнт	Аляксандар Лукашэнка
Прэм’ер-міністар	Сяргей Сідорскі (да 28 сьнежня 2010), Міхаіл Мясьніковіч
Папярэднік	Уладзімер Патупчык
Наступнік	Валеры Малашка
Асабістыя зьвесткі
Нарадзілася	20 лістапада 1958 (66 гадоў) Мурманская вобласьць, РСФСР
Адукацыя	Санкт-Пецярбурскі дзяржаўны ўнівэрсытэт (1982) Акадэмія кіраваньня пры прэзыдэнце Рэспублікі Беларусь (2007)
Узнагароды	Ганаровая грамата Нацыянальнага сходу Рэспублікі Беларусь[d] Ганаровая грамата Савету Міністраў Рэспублікі Беларусь

Біяграфія

Марыяна Шчоткіна нарадзілася 20 лістапада 1958 году на востраве Кільдзін Тэрыберскага раёну Мурманскай вобласьці РСФСР.

У 1982 годзе скончыла Ленінградзкі дзяржаўны ўнівэрсытэт імя А. А. Жданава па спэцыяльнасьці «фізыка», у 2007 годзе — Акадэмію кіраваньня пры прэзыдэнце Рэспублікі Беларусь па спэцыяльнасьці «дзяржаўнае кіраваньне сацыяльнай сфэрай».

1982—1986 — інжынэр вытворчага аб’яднаньня «Інтэграл», інжынэр Паўночнае філіі Акустычнага інстытуту імя М. Андрэева ў Севераморску.

1986—2003 — настаўніца фізыкі, намесьніца дырэктара школы, дырэктарка школы, начальніца ўправы адукацыі адміністрацыі Фрунзэнскага раёну г. Менску.

2003—2005 — намесьніца кіраўніка адміністрацыі Ленінскага раёну г. Менску.

2005—2007 — старшыня камітэту па працы, занятасьці і сацыяльнай абароне Менскага гарадзкога выканаўчага камітэту.

З 2007 году намесьніца, першая намесьніца міністра працы і сацыяльнай абароны Рэспублікі Беларусь.

З 4 сьнежня 2009 па 15 сьнежня 2016 году — міністар працы і сацыяльнай абароны Беларусі.

23 чэрвеня 2010 году абраная старшынёй Рады па сацыяльнай палітыцы пры Інтэграцыйным камітэце ЭўрАзЭС^[1]. 15 жніўня 2015 году абраная старшынёй Беларускага саюзу жанчын^[2]. 24 лютага 2016 году абараніла дысэртацыю на атрыманьне навуковай ступені кандыдата сацыялягічных навук па тэме "Дзяржаўны сацыяльны заказ у арганізацыі сацыяльнага абслугоўвання насельніцтва Беларусі: сацыялягічны падыход" (навуковы кіраўнік Сьвятлана Лапіна)^[3]. 12 кастрычніка 2016 году абраная намесьніцай старшыні Савета Рэспублікі Нацыянальнага сходу Беларусі^[4]. 25 мая 2017 году прызначаная Нацыянальным каардынатарам па дасягненьні мэтаў устойлівага разьвіцьця^[5]. 13 лютага 2020 году вызваленая ад пасады Нацыянальнага каардынатара па дасягненьні мэтаў устойлівага разьвіцьця^[6].

Замужам, мае сына.

Узнагароды

• Падзяка Прэзыдэнта Рэспублікі Беларусь^[7]
• Дыплём аб прысваеньні ганаровага званьня "Заслужаны работнік сацыяльнай абароны Рэспублікі Беларусь" (5 сьнежня 2019 году)^[8].