Аляксандр Іванавіч Рэмер

Аляксандр Іванавіч Рэмер (1856 — ?) — грамадзянскі інжынер і архітэктар часоў Расійскай імперыі^[1].

Аляксандр Іванавіч Рэмер
Дата нараджэння	1856
Дата смерці	невядома
Альма-матар	Дзвінскае рэальнае вучылішча[d] Санкт-Пецярбургскі дзяржаўны архітэктурна-будаўнічы ўніверсітэт
Медыяфайлы на Вікісховішчы

Біяграфія

Адукацыя

Нарадзіўся ў 1856 годзе. Выхоўваўся ў Дынабургскім рэальным вучылішчы  (руск.). У 1876 годзе паступіў у Пецярбургскае будаўнічае вучылішча, па сканчэнні якога ў 1882 годзе атрымаў званне грамадзянскага інжынера і права на чын X класа^[1].

Прафесійная дзейнасць

Будынак былога прыюта «Яслі»

Пасля вучобы А. Рэмер быў прызначаны малодшым інжынерам гродзенскага губернскага праўлення. Ён загадваў адведзеным яму раёнам і выконваў розныя тэхнічныя даручэнні, а потым быў пераведзены малодшым архітэктарам у валынскае губернскае праўленне ў 1884 годзе^[1]. У гэты час Аляксандр Іванавіч, акрамя звычайных прац па даручаным яму раёне, не раз удзельнічаў у міжнародных камісіях па збудаванні і аднаўленні дзяржаўных памежных знакаў^[1].

Прыватная яго дзейнасць заключалася галоўным чынам у складанні чарцяжоў і праектаў, а таксама і ў рамонтных працах^[1].

У 1888 годзе Аляксандр Іванавіч быў пераведзены губернскім інжынерам у Волагду. Тут ён па ўласным праекце ўзвёў будынак майстэрняў для малалетніх злачынцаў, перабудаваў пад прытулак «Яслі» ахвяраваны купцом Калеснікавым мураваны будынак і ўдзельнічаў у санітарнай камісіі ў горадзе Волагдзе^[2]. Акрамя сваіх прамых абавязкаў, Аляксандр Іванавіч не аднойчы замяшчаў губернскіх саветнікаў і займаў пасаду віцэ-губернатара^[1].

Творчасць

У Гродзенскай губерні

Свята-Сафійская царква ў Страдзечы.

Свята-Уладзімірская царква ў Чыжэўшчыне.

На працягу 1882—1884 гадоў ажыццявіў наступныя праекты:

• Заканчэнне будаўніцтва яшчэ двух драўляных цэркваў у Брэсцкім і Кобрынскім паветах.
• Заканчэнне перабудовы мураванага каталіцкага касцёла ў праваслаўную царкву ў Бельскім павеце.
• «Каралеўскі» мост на сваях 42 сажаняў даўжыні ў Гродзенскай губерні.
• Пабудова драўлянай царквы Святой Сафіі ў вёсцы Страдзеч Брэсцкага павета — не захавалася.
• Пабудова драўлянай царквы ў Блошах.
• Праект іканастаса для царквы Прападобнай Параскевы Сербскай ў вёсцы Балаце Кобрынскага павета (1880-я)^[3].
• Праект перабудовы Свята-Пакроўскай царквы ў вёсцы Дзеткавічах Кобрынскага павета (1884)^[3].
• Праект Свята-Ільінскай царквы ў вёсцы Велікарыце Брэсцкага павета (1882) — не захавалася^[3].
• Праект Свята-Уладзімірскай царквы ў вёсцы Чыжэўшчыне Кобрынскага павета (1884; у суаўтарстве з М. В. Раманавым^[4]).

У Валынскай губерні

На працягу 1884—1888 гадоў займаўся наступным:

• Капітальны рэмонт і прыбудова да будынка павятовага казначэйства ў горадзе Ковелі (па гатовым праекце).
• Пабудова дзяржаўных памежных знакаў.

У Волагдзе

У 1888—1892 гадах ім былі пабудаваны^[1]:

• Будынак для псіхічнахворых на 80 чалавек (па праекце І. Штрома  (руск.))^[5] у пасёлку Куўшынаве  (руск.)^[6].
• Дом купца Свешнікава.
• Капітальны рамонт прыходскай царквы.
• Перабудова мураванага будынка пад прытулак «Яслі».
• Прыбудова і капітальны рамонт дома купца Бутарава^[7].

Зноскі

1. Барановский Г. В. Юбилейный сборник сведений о деятельности бывших воспитанников Института гражданских инженеров (Строительного училища) 1842—1892
2. Заключение старшего врача Вологодской губернской земской управы Ф. Ф. Ульриха и губернского инженера А. И. Ремера в санитарную комиссию городской управы о необходимости дополнительного замощения мостовых в г. Вологде (руск.)
3. Кулагин А. Н. Гродненские зодчие XIX — начала XX веков (новые архивные изыскания). // Пытанні мастацтвазнаўства, этналогіі і фалькларыстыкі. Выпуск 24. — Мінск, «Права і эканоміка». — 2018. — С. 76
4. Барановский Г. В. Юбилейный сборник сведений о деятельности бывших воспитанников Института гражданских инженеров (Строительного училища) 1842—1892. — С. 291
5. Историческая справка о Вологодской областной психиатрической больнице Архівавана 3 верасня 2018. (руск.)
6. Образованная таким образом строительная комиссия поручила непосредственное производство работ гражданскому инженеру Ремеру, и 9 июня 1889 г. в сельце Кувшинове состоялась торжественная закладка новых зданий лечебницы для душевнобольных. (руск.)
7. 13. Бывший мануфактурный магазин купца Буторова (руск.)