Анятова

Анято́ва^[1] (трансліт.: Aniatova, руск.: Анетово) — вёска ў Пухавіцкім раёне Мінскай вобласці. Уваходзіць у склад Рудзенскага сельсавета.

Вёска Анятова Краіна Беларусь Вобласць Мінская Раён Пухавіцкі Сельсавет Рудзенскі Каардынаты 53°36′57″ пн. ш. 27°51′48″ у. д.HGЯO Ранейшыя назвы Анятоў двор Раўнаполле Насельніцтва ▲183 чал. (2019) Часавы пояс UTC+3 Тэлефонны код +375 1713 Аўтамабільны код 5 Анятова Анятова

Анятова на Вікісховішчы

Назва

Ранейшая назва маёнтка — Анятоў^[2]. Назва паходзіць ад імя Анна, можа паказваць на імя колішняй уласніцы маёнтка. Гэтыя землі адносіліся да маёнтка Дукора, уласнік Дукоры Леў Оштарп назваў у гонар дачкі Леакадзіі маёнтак Кадунін (цяпер вёска Кадунова), таксама ў яго была дачка Анна (Ганна), таму назва можа быць звязана з ёй. У Оштарпа таксама была дачка Людвіка, да дукорскіх земляў адносіўся маёнтак Людвіноў (пазней Людвінова).

Гісторыя

Школа ў будынку сядзібы, 1932 г.

У пачатку XIX стагоддзя ў Ігуменскім павеце Мінскай губерні, адносілася да маёнтка Дукора. Пасля 1830 года маёнтак Анятоў быў куплены Харэвічамі^[2], называўся таксама двор Раўнаполле (вёска Раўнаполле адпрацоўвала паншчыну для двара^[3]). Пасля 1861 года ў Дукорскай воласці Ігуменскага павета. У 1889 годзе маёнткам Анятова валодаў дваранін рыма-каталіцкага веравызнання Станіслаў Ільдафонсавіч Харэвіч, меў 870 дзесяцін зямлі^[4].

З канца лютага 1918 года тэрыторыя акупаваная войскамі Германскай імперыі. 25 сакавіка 1918 года згодна з Трэцяй Устаўной граматай абвешчана часткай Беларускай Народнай Рэспублікі. Жыхары Дукорскай воласці пісалі звароты ў Народны Сакратарыят Беларусі са скаргамі на дзеянні нямецкіх акупацыйных улад^[5]. У снежні 1918 года занята Чырвонай Арміяй, з 1 студзеня 1919 года ў адпаведнасці з пастановай І з’езда КП(б) Беларусі яна ўвайшла ў склад Савецкай Беларусі, з 27 лютага 1919 года — у ЛітБел ССР. У час польска-савецкай вайны ў жніўні 1919 — ліпені 1920 гадоў пад акупацыяй Польшчы (Мінская акруга ГУУЗ).

З 31 ліпеня 1920 года ў Беларускай ССР. Маёнтак нацыяналізаваны. У 1924 годзе ў колішняй сядзібе адкрылася Рудзенская пачатковая школа^[6].

У Другую сусветную вайну з канца чэрвеня 1941 года да пачатку ліпеня 1944 года пад акупацыяй Германіі.

Насельніцтва

• 1908 год — 5 двароў, 65 жыхароў
• 1917 год — 1 двор, 76 жыхароў, усе беларусы^[7]
• 2002 год — 25 двароў, 60 жыхароў
• 2009 год — 69 жыхароў
• 2019 год — 183 жыхары^[8]

Славутасці

• Капліца. Дзейнічала з 1905 г., закрыта ў 1930-я гады, перабудавана ў жылы дом^[9][10].

Страчаная спадчына

• Сядзіба Харэвічаў (XIX ст.).