Геранім Кеневіч (1796—1884)

Геранім Антонавіч Кеневіч (польск.: Hieronim Kieniewicz; руск.: Иероним Антонович Кеневич, 1796/1797, (?) вёска Дарава, (?) Навагрудскі павет, Расійская імперыя — 1884, Рым, Італія) — буйны землеўласнік Расійскай імперыі, мазырскі павятовы харунжы.

Геранім Антонавіч Кеневіч
Нараджэнне	1796(1796) (?) вёска Дарава, (?) Навагрудскі павет, Расійская імперыя
Смерць	1884(1884) Рым, Італія
Род	Кеневічы
Бацька	Антон Нестар Кеневіч (1775—1822), мазырскі павятовы суддзя
Маці	Кацярына Адынец
Жонка	Кацярына Ігнатаўна Горват (1807—1891)
Дзеці	1) Ядвіга Геранімаўна Кеневіч (1829—1892); 2) Каміла Геранімаўна Кеневіч (1828—?); 3) Ванда Геранімаўна Кеневіч (к.1837—?); 4) Геранім Геранімавіч Кеневіч (1830—1911), мазырскі павятовы маршалак; 5) Юзафіна Геранімаўна Кеневіч (1820—1876)
Веравызнанне	каталік

Біяграфія

Належаў да шляхецкага роду Кеневічаў герба «Равіч». Нарадзіўся ў сям’і Антона Нестара Кеневіча, мазырскага павятовага суддзі, і яго жонкі-шляхцянкі каталічкі Кацярыны Адынец^[1]. Быў хрышчаны ў каталіцтва.

Вучыўся ў 1815—1817 гг. у Віленскім універсітэце. Атрымаў ступень кандыдата філасофіі. Быў знаёмы з Іаахімам Лялевелем.

Выбіраўся дваранамі на пасаду мазырскага павятовага харунжага ў Мазырскім павеце Мінскай губерні Расійскай імперыі. Быў членам мясцовай масонскай ложы.

Пасля смерці бацькі ў 1822 г. атрымаў маёнтак Лобча (Лобча, Засоп’е і інш.) у Мазырскім павеце^[2].

Ажаніўся са шляхцянкай-каталічкай Кацярынай Ігнатаўнай Горват.

17 снежня 1837 г. купіў у графа Аляксандра Францішка Хадкевіча (1776—1838) маёнтак Брынёў (Брынёў, Ляскавічы і інш.) — 614 рэвізскіх душ^[3].

Праз 10 гадоў пасля падаўлення Лістападаўскага паўстання (1830—1831) Геранім Антонавіч Кеневіч выкупіў маёнтак Дарашэвічы ў свайго брата-паўстанца Фелікса Антонавіча Кеневіча (1802—1863), што ўратавала маёнтак Дарашэвічы ад канфіскацыі расійскімі ўладамі. З завяршэннем будаўніцтва палаца ў Дарашэвічах Геранім Кеневіч адначасова залажыў цудоўны парк і пабудаваў у ім фамільную капліцу-пахавальню Кеневічаў.

• 
  Сядзіба Кеневічаў у маёнтку Дарашэвічы
• 
  Каталіцкая капліца Кеневічаў у маёнтку Дарашэвічы

Сям’я

У шлюбе з Кацярынай з Горватаў (1807—1891) меў дзяцей:

• 1) Ядвіга Геранімаўна Кеневіч (1829—1892);
• 2) Каміла Геранімаўна Кеневіч (1828—?). Муж: Януарый Мікульскі;
• 3) Ванда Геранімаўна Кеневіч (к.1837—?). Муж: Вітольд Орда;
• 4) Геранім Геранімавіч Кеневіч (1830—1911), мазырскі павятовы маршалак. Жонка: Ядвіга Аляксандраўна Горват (к.1840—1916);
• 5) Юзафіна Геранімаўна Кеневіч (1820—1876). Муж: Баляслаў Казіміравіч Яленскі. Шлюб у 1862 г. у Вільні.

• 
  Кацярына Ігнатаўна Горват (1807—1891), жонка Гераніма Антонавіча Кеневіча (1796—1884). Мастак Ядвіга Кеневіч
• 
  Геранім Геранімавіч Кеневіч (1830—1911). Мастак Ё. Шрам
• 
  Геранім Геранімавіч Кеневіч (1830—1911) са сваёй жонкай Ядвігай з роду Горватаў у сядзібным доме ў Дарашэвічах
• 
  Геранім Кеневіч (1867—1925) стаіць другім справа з жонкай Адэляй; Антон Кеневіч (1877—1960) сядзіць першым справа, за ім жонка Магдалена Грабоўская; Геранім Кеневіч (1830—1911) сядзіць трэцім справа — па правую руку жонка Ядвіга Горват; Ваўрынец Путкамер (1859—1923) стаіць другім злева, перад ім сядзіць жонка Сафія Кеневіч. Сядзіба Дарашэвічы, 14 лістапада 1907 г.
• 
  Геранім Геранімавіч Кеневіч (1830—1911)

Зноскі

1. Анішчанка, Я. К. Ураднікі беларускіх земляў Расійскай імперыі на рубяжы XVIII—XIX стст. — Мінск, 2011. — С. 156.
2. Kieniewicz A. 1989, s. 30.
3. Kieniewicz A. 1989, s. 32.