Дзмітрый Мікалаевіч Крутой

Дзмітрый Мікалаевіч Крутой (10 студзеня 1981, Бялынічы, Магілёўская вобласць) — беларускі дзяржаўны дзеяч.

Дзмітрый Мікалаевіч Крутой
Міністр эканомікі Рэспублікі Беларусь 18 жніўня 2018 — 29 лістапада 2019
Прэзідэнт	Аляксандр Лукашэнка
Кіраўнік урада	Сяргей Румас
Папярэднік	Уладзімір Зіноўскі
Пераемнік	Аляксандр Чарвякоў
Намеснік Міністра эканомікі Рэспублікі Беларусь 30 чэрвеня 2014 — 27 студзеня 2017
Прэзідэнт	Аляксандр Лукашэнка
Кіраўнік урада	Міхаіл Мясніковіч Андрэй Кабякоў
Першы намеснік Міністра эканомікі Рэспублікі Беларусь 27 студзеня 2017 — 18 жніўня 2018
Прэзідэнт	Аляксандр Лукашэнка
Кіраўнік урада	Андрэй Кабякоў
Нараджэнне	10 студзеня 1981(1981-01-10) (44 гады) Бялынічы, Бялыніцкі раён, Магілёўская вобласць, Беларуская ССР, СССР
Адукацыя	Беларускі дзяржаўны тэхналагічны ўніверсітэт (2003) Акадэмія кіравання пры Прэзідэнце Рэспублікі Беларусь (2010)

Біяграфія

Нарадзіўся 10 студзеня 1981 года ў гарадскім пасёлку Бялынічы Магілёўскай вобласці. Бацька — Мікалай Іванавіч Крутой, старшыня канцэрна «Беллеспаперапрам» (1999—2003).

У 1998—2003 гадах вучыўся ў Беларускім дзяржаўным тэхналагічным універсітэце. Са жніўня па кастрычнік 2003 года — інжынер кафедры эканомікі і кіравання на прадпрыемствах хіміка-ляснога комплексу Беларускага дзяржаўнага тэхналагічнага ўніверсітэта. У 2004 годзе скончыў аспірантуру БДТУ.

У 2004—2006 гадах — вядучы, галоўны эканаміст сектара арганізацыі аплаты працы і цэнаўтварэння ўпраўлення эканомікі і інвестыцый Міністэрства лясной гаспадаркі Рэспублікі Беларусь. У 2006—2010 гадах намеснік начальніка ўпраўлення ляснога комплексу галоўнага ўпраўлення аграпрамысловага і лясной комплексаў Міністэрства эканомікі Рэспублікі Беларусь.

У 2010 годзе скончыў Акадэмію кіравання пры Прэзідэнце Рэспублікі Беларусь.

У 2010—2014 гадах намеснік начальніка галоўнага ўпраўлення аграпрамысловага і ляснога комплексаў — начальнік упраўлення ляснога комплексу Міністэрства эканомікі Рэспублікі Беларусь. У 2014^[1]—2017 гадах — намеснік Міністра эканомікі Рэспублікі Беларусь.

З 27 студзеня 2017 года — першы намеснік Міністра эканомікі Рэспублікі Беларусь. 18 жніўня 2018 года прызначаны Міністрам эканомікі Беларусі^[2]. 29 лістапада 2019 года стаў першым намеснікам прэм’ер-міністра Беларусі, працаваў на пасадзе да 3 чэрвеня 2020 года, пасля чаго быў прызначаны намеснікам Кіраўніка Адміністрацыі Прэзідэнта Рэспублікі Беларусь.

31 жніўня 2020 года Крутой быў уключаны ў спіс асобаў, на якіх накладзена бестэрміновая забарона на ўезд у Латвію, пяцігадовая забарона на ўезд у Эстонію і забарона на ўезд у Літву ў сувязі з тым, што «сваімі дзеяннямі ён арганізаваў і падтрымаў фальсіфікацыю прэзідэнцкіх выбараў 9 жніўня і наступнае гвалтоўнае задушэнне мірных пратэстаў»^[3].

1 жніўня 2022 года прызначаны Надзвычайным і Паўнамоцным Паслом Рэспублікі Беларусь у Расійскай Федэрацыі^[4]. На гэтай пасадзе шматразова накіроўваў у розныя расійскія інстанцыі лісты супраць Анжалікі Агурбаш ды іншых праціўнікаў Лукашэнкі, якія жывуць у Расіі^[5].

27 чэрвеня 2024 года прызначаны кіраўніком Адміністрацыі Прэзідэнта Рэспублікі Беларусь^[6].

Сям’я

Жанаты. Мае дваіх дзяцей.

Зноскі

1. Александр Лукашенко рассмотрел кадровые вопросы (руск.). Прэс-служба Прэзідэнта Рэспублікі Беларусь. Праверана 21.08.2018.
2. Румас стаў прэм’ер-міністрам, абнавіліся чатыры віцэ-прэм’еры (нявызн.). Наша Ніва (18 жніўня 2018).
3. Латвія, Літва і Эстонія ўключылі Лукашэнку і яшчэ 29 чыноўнікаў ў спіс пэрсон нон-грата. ПОЎНЫ СЬПІС (нявызн.). Беларуская служба Радыё «Свабода» (31 жніўня 2020).
4. Максім Ермаловіч зменіць Дзмітрыя Крутога на пасадзе намесніка кіраўніка Адміністрацыі Прэзідэнта
5. З’явілася яшчэ адно сведчанне пераследу спявачкі Агурбаш былым паслом у Расіі Дзмітрыем Крутым (нявызн.). Наша Ніва (9 ліпеня 2024).
6. Лукашэнка назначыў кіраўніком Адміністрацыі Прэзідэнта Крутога, першым намеснікам кіраўніка — Пяткевіч