Дружны (Пухавіцкі раён)

У паняцця ёсць і іншыя значэнні, гл. Дружны.

Дру́жны^[3] (трансліт.: Družny, руск.: Дружный) — пасёлак у Пухавіцкім раёне Мінскай вобласці. Цэнтр Свіслацкага сельсавета. Месціцца за 27,5 км на паўночны захад ад Мар’інай Горкі, 42,5 км ад Мінска, за 4 км на паўночны ўсход ад Рудзенска. Каля дарогі Р69 Шацк — Смілавічы. Непадалёк ад ракі Свіслач, каля возера Мацярынскага і вадасховішча Земснарад.

Пасёлак Дружны Краіна Беларусь Вобласць Мінская Раён Пухавіцкі Сельсавет Свіслацкі Каардынаты 53°37′26″ пн. ш. 27°53′56″ у. д.HGЯO Першая згадка 1983 Плошча 171,33 га[1] Вышыня цэнтра 173 м[2] Насельніцтва ▲10 202 чал. (2019) Часавы пояс UTC+3 Тэлефонны код +375 1713 Паштовыя індэксы 222852 Аўтамабільны код 5 СААТА 6244759021 Дружны на карце Беларусі ±

Дружны на Вікісховішчы

Гісторыя

Мінская ЦЭЦ-5.

Паводле пастановы ЦК КПСС і Савета Міністраў БССР ад 26 чэрвеня 1980 года, у 1988 годзе павінна была быць запушчана Мінская атамная цеплаэлектрацэнтраль^[4]. Пастановай Савета Міністраў БССР ад 13 лютага 1981 года выбар пляцоўкі для будавання атамнай ЦЭЦ быў вызначаны на землях калгасаў Пухавіцкага раёна за 25 км ад мяжы Мінска^[5]. 4 мая 1982 года загадам Мінэнерга СССР № 253 арганізавана Дырэкцыя будаванай Мінскай АТЭЦ. Паралельна пачалося будаўніцтва новага пасёлка. На камсамольска-моладзевай будоўлі працавала 3,5 тыс. чалавек з усяго СССР.

У пачатку 1985 года быў збудаваны першы дом (вуліца Чэпіка, 24). Пры будаванні будоўлі ўзніклі праблемы з грунтам, палі танулі ў балоце, будаўнічая тэхніка гразла. Ненадзейны тарфяны грунт даводзілася знімаць, а замест яго ўкладалі намыты пясок са штучнага возера^[4].

2 лютага 1985 года ў выніку праведзенага конкурсу сярод школьнікаў указам прэзідыума ВС БССР была зацверджана назва пасёлка. У верасні 1985 года палова пасёлка фактычна была збудавана, планавалася, што другая палова будзе ўзведзеная бліжэй да тэрміну здачы станцыі. У 1986 годзе ў Дружны пасля Чарнобыльскай катастрофы эвакуіравана больш за 1200 чалавек з Прыпяці, першыя 250 сем’яў прыехалі праз некалькі месяцаў пасля аварыі^[4]. У 1986 годзе былі здадзены першыя дамы.

У 1986 годзе пасёлак перададзены з Дукорскага сельсавета ў адміністрацыйнае падпарадкаванне Свіслацкаму пассавету^[6]. У сувязі з аварыяй у Чарнобылі, 1 ліпеня 1987 года пастановай ЦК КПСС было даручана закансерваваць будаванне станцыі.

У 1989 годзе ў Дружным былі сярэдняя школа, 2 дзіцячыя сады, дзіцячая школа мастацтваў, 2 бібліятэкі, аддзяленне сувязі, Дом культуры, лячэбны цэнтр. У 1990-я гады ў Дружным аднавілася ўзвядзенне жылых дамоў для персаналу. Для мадэрнізацыі энергасістэмы Беларусі было прыняло вырашэнне перапрафіляваць атамную электрастанцыю ў цеплаэлектрацэнтраль на арганічным паліве (Мінская ЦЭЦ-5)^[7].

У 2007—2009 гадах жыхары Дружнага праводзілі грамадскую кампанію супраць будаўніцтва завода пестыцыдаў ЗАТ «Аўгуст-Бел», які адносіцца да 1-га класа небяспекі.

Дружны ў 2021 г.

У 2014 годзе з’явіліся планы стварэння вакол Мінска шасці гарадоў-спадарожнікаў. У снежні 2016 года быў зацверджаны генплан, дзе Дружны планавалася дабудаваць да 2030 года і аб’яднаць з Рудзенскам і Свіслаччу ў горад з сучаснай інфраструктурай^[8].

У жніўні 2020 года ў Дружным прайшлі масавыя акцыі пратэсту супраць фальсіфікацыі прэзідэнцкіх выбараў^[9][10][11].

22 лістапада 2021 года ў пасёлак Дружны быў перанесены цэнтр Свіслацкага сельсавета^[12].

Насельніцтва

• 1989 год — 5 тыс. жыхароў
• 1999 год — 7876 жыхароў
• 2002 год — 7689 жыхароў
• 2009 год — 7984 жыхары
• 2010 год — 8713 жыхароў
• 2013 год — 8978 жыхароў
• 2016 год — 9038 жыхароў
• 2019 год — 10202 жыхары^[13]

Эканоміка

Мінская ЦЭЦ-5 ёсць горадаўтваральным прадпрыемствам, дзейнічае філія «Белэнэргабудіндустрыя». ЗАТ «Аўгуст-Бел», ТАА «Строй мантаж».

Сацыяльная сфера

Аркестр Дружненскай дзіцячай школы мастацтваў, канец 1990-х. Дзень энергетыка, Мінская ЦЭЦ-5.

Сярэдняя школа № 1, яслі-сад «Сонейка»^[14], яслі-сад «Зубраня»^[15], дзіцячая школа мастацтваў, фізкультурна-аздараўленчы комплекс, пасялковая бібліятэка, Дом культуры. Ёсць паліклініка, пасялковая медыцынская амбулаторыя^[16].

Спорт

У 1997 годзе існаваў футбольны клуб Энергія-ЦЭЦ-5

Рэлігія

Дзейнічаюць праваслаўная царква ў гонар Раства Хрыстова і Царква Святло Евангелля хрысціян веры евангельскай.

Спіс вуліц

• Асенняя вуліца
• Бярозавы завулак
• Зорная вуліца
• Зялёны завулак
• Кветкавы завулак
• Лугавая вуліца
• Лясная вуліца
• Маладзёжны завулак
• Міру вуліца
• Паркавая вуліца
• Сонечная вуліца
• Ціхая вуліца
• Цэнтральная вуліца
• Чэпіка вуліца
• Шаманоўскага вуліца^[17] (да 1998—1999 Паркавая)

Помнікі

Помнік у цэнтральным парку.

• Помнік у цэнтральным парку (помнік Шаманоўскаму).
• Валун з памятнай дошкай у гонар Мікалая Чэпіка.
• Валун з памятнай дошкай аб першай палі Дружнага.

Вядомыя асобы

• Аляксандр Дзмітрыевіч Кротаў — беларускі футбаліст.