Кагосіма (горад)

У паняцця ёсць і іншыя значэнні, гл. Кагосіма.

Кагосіма (яп.: 鹿児島市 Кагосіма-сі)^[1] — цэнтральны горад Японіі, адміністрацыйны цэнтр і найбуйнейшы населены пункт прэфектуры Кагосіма. За размяшчэнне на беразе заліва ля падножжа стратавулкана Сакурадзіма, а таксама за гарачы клімат горад часта завуць «Неапалем Усходу».

Цэнтральны горад Кагосіма яп.: 鹿児島市 Сцяг Герб Краіна  Японія Прэфектура Кагосіма Каардынаты 31°35′48″ пн. ш. 130°33′26″ у. д.HGЯO Мэр Хыраюкі Моры Заснаваны 1 красавіка 1889 Цэнтральны горад з 1996 Плошча 547,07 км² Водныя аб’екты Kagoshima Bay[d], Port of Kagoshima[d], Kōtsuki-gawa[d], Nagata-gawa[d], Omoi-gawa[d] і Inari River[d] Насельніцтва 605 609 чалавек (2012) Шчыльнасць 1 107 чал./км² Часавы пояс UTC+9 Тэлефонны код 99 Паштовы індэкс 〒892-8677 Код 46201-2 Афіцыйны сайт city.kagoshima.lg.jp (яп.) Рэгіён Кюсю Сімволіка Кветка: Алеандр Дрэва: Камфорнае дрэва Кагосіма на карце Японіі

Медыяфайлы на Вікісховішчы

Плошча горада складае 547,07 км²,^[2] насельніцтва — 605 609 чалавек (1 красавіка 2012)^[3], шчыльнасць насельніцтва — 1 107 чал./км².

Кагосіма ўяўляе сабой буйны транспартны вузел у паўднёвай частцы вострава Кюсю. Тут функцыянуюць прамысловыя прадпрыемствы тэкстыльнай (бавоўна, шоўк), хімічнай, харчовай галін. Наладжана масавая вытворчасць фарфоравых вырабаў (сацумскі фарфор). Развіты рыбалоўны промысел. Маецца ўніверсітэт^[4]. Побач з горадам ёсць аэрапорт. У 50 кіламетрах на паўднёвы ўсход, на паўвостраве Осумі размешчаны касмічны цэнтр Кагосіма, адкуль 11 лютага 1970 года быў запушчаны першы японскі спадарожнік «Осумі».

1 лістапада 2004 года ў склад горада ўвайшлі пяць прыгарадаў, за кошт чаго агульная плошча Кагосімы вырасла амаль у два разы. Гэта былі населеныя пункты Ёсіда, Кіірэ, Карыяма, Мацумота, Сакурадзіма.

Гісторыя

На працягу шматлікіх стагоддзяў Кагосіма служыла рэзідэнцыяй для самурайскага роду Сімадзу. У перыяд Эда горад уяўляў сабой буйны палітычны цэнтр і камерцыйны порт. Пасля прыходу еўрапейцаў тут моцна актывізавалася дзейнасць хрысціянскіх місіянераў, да таго часу пакуль улады не ўвялі забарону на іншаземную рэлігію ў канцы XVI — пачатку XVII стагоддзяў. У 1863 годзе горад падвергся артылерыйскаму нападу з боку Каралеўскага флоту Вялікабрытаніі, які адказаў такім чынам на забойства англійскага гандляра Чарльза Ленакса Рычардсана (англ.).

Тут нарадзіўся Сайго Такаморы — адзін з найбольш уплывовых самураяў у японскай гісторыі. Кагосіма таксама з’яўляецца радзімай Хэйхаціра Тога — адмірала, які камандаваў Аб’яднаным флотам Японіі ў руска-японскай вайне 1904—1905 гадоў.

У 1914 годзе адбылося вывяржэнне вулкана Сакурадзіма, якое, аднак, не прывяло да якіх-небудзь сур’ёзных разбурэнняў.

Геаграфія

Кагосіма знаходзіцца на беразе Кагосімскага заліва Усходне-Кітайскага мора. Плошча горада складае каля 547,07 км². Рэльеф Кагосімы, за выключэннем раёна Сакурадзіма, пагорысты. Вышыня ўзгоркаў і ўзвышшаў вагаецца ад 100 да 300 м над узроўнем моры. Па горадзе працякаюць рэкі сярэдняй і малой велічыні, якія ўпадаюць у Кагосімскі заліў: Інары, Кацукі, Каміна, Тагамі, Вакіта і Нагата. У наваколлі гэтых рэк ёсць невялікія раўніны. У цэнтральнай частцы ўзбярэжжа размешчана прамысловая зона з гарадскім портам. Насупраць яе знаходзіцца дзеючы вулкан Сакурадзіма вышынёй 1 117 м.

Клімат

Клімат Кагосімы субтрапічны мусонны, з частымі асадкамі і тайфунамі. Сярэднегадавая тэмпература складае 18 ℃,а ўзровень ападкаў 2000—2700 мм. Кірунак вятроў паўночна-заходні, аднак улетку ён змяняецца на процілеглы.

Клімат Кагосімы
Паказчык	Сту	Лют	Сак	Кра	Май	Чэр	Ліп	Жні	Вер	Кас	Ліс	Сне	Год
Сярэдні максімум, °C	12,2	13,1	16,5	21,3	24,7	27,3	31,4	32,2	29,5	25,1	19,8	14,6	22,3
Сярэдняя тэмпература, °C	7,2	8,3	11,4	16,4	20,1	23,4	27,4	27,9	25,1	20,0	14,5	9,2	17,6
Сярэдні мінімум, °C	2,6	3,7	6,5	11,8	15,9	20,0	24,2	24,5	21,4	15,3	9,6	4,4	13,3
Норма ападкаў, мм	87,4	102,7	160,6	229,8	259	399,5	303,7	213,1	216,4	106,1	87,6	70,9	2 236,8
Крыніца: Ганконская абсерваторыя

Бяспека

У горадзе размешчаны штаб Берагавой аховы Японіі Ён забяспечвае бяспеку межаў і тэрытарыяльных вод Японіі на поўдні прэфектур Кагосіма, Міядзакі і Кумамота^[5].

Эканоміка

Дзелавы цэнтр Кагосімы.

Кагосіма з’яўляецца горадам, дзе дамінуюць прадпрыемствы трацічнага сектара эканомікі, асабліва прадпрыемствы аптовага продажу і сферы паслуг. У горадзе шмат кампаній малога і сярэдняга бізнесу.

Сярод галін прамысловасці найбольш прыбытковай з’яўляецца харчовая прамысловасць, а менавіта вытворчасць мяса і тавараў з морапрадуктаў. Развітымі таксама з’яўляецца дрэваапрацоўчая, цэлюлозна-папяровая, тэкстыльная і хімічная прамысловасць. Большасць прамысловых прадпрыемстваў сканцэнтраваны ў прыбярэжнай зоне горада. У Кагосіме таксама развіты традыцыйныя рамёствы, такія як вытворчасць эпонжа, сацумскай керамікі, бамбукавых і алавяных вырабаў.

Важная роля ў эканоміцы Кагосімы належыць сельскай гаспадарцы, хоць колькасць занятых у ёй чалавек няўхільна памяншаецца. Жыхары гарадскіх ускраін вырошчваюць рыс, батат, гародніну, цукровы трыснёг, цытрусавыя, чай і тытунь.

Гарады-пабрацімы

Кагосіма з’яўляецца горадам-пабрацімам наступных гарадоў:

• Неапаль, Італія (1950)
• Перт, Аўстралія (1974)
• Чанша, КНР (1982)
• Маямі, ЗША (1990)

Галерэя

• 
  Кагосіма ў 1914 годзе
• 
  Краявід горада і вулкана Сакурадзіма
• 
  Краявід горада з іншага боку
• 
  Будынак гарадской управы

Зноскі

1. БЭ у 18 т. Т.18, кн.1. — С. 282.
2. Плошча ўказваецца паводле даных сайта Geospatial Information Authority of Japan (яп.) з улікам змен, апублікаваных 1 кастрычніка 2011 года.
3. 鹿児島県毎月推計人口（平成24年4月1日現在） (яп.)  (нявызн.) ?. Адміністрацыя прэфектуры Кагасіма (1 красавіка 2012). — Насельніцтва прэфектуры Кагасіма. Праверана 28 красавіка 2012.
4. Кагосіма(недаступная спасылка) ў ВСЭ
5. Афіцыйная старонка Берагавой аховы Японіі