Наталля Віктараўна Якубіцкая

У Вікіпедыі ёсць артыкулы пра іншых людзей з прозвішчам Якубіцкая.

Наталля Віктараўна Якубіцкая (нар. 22 верасня 1971, Смалявічы, Мінская вобласць, Беларуская ССР, СССР) — беларускі палітычны і дзяржаўны дзеяч, старшыня Мінскага абласнога Савета дэпутатаў з 2018 года, член Савета Рэспублікі Нацыянальнага сходу Рэспублікі Беларусь 7-га склікання.

Наталля Віктараўна Якубіцкая
Старшыня Мінскага абласнога Савета дэпутатаў з 27 лютага 2018
Губернатар	Анатоль Міхайлавіч Ісачанка
Папярэднік	Іван Эдуардавіч Ліпніцкі
Нараджэнне	22 верасня 1971(1971-09-22)[1] (53 гады) Смалявічы, Смалявіцкі раён, Мінская вобласць, Беларуская ССР, СССР
Партыя	беспартыйная
Член у	Канстытуцыйная камісія
Адукацыя	Мінскі інстытут кіравання (2007) Акадэмія кіравання пры Прэзідэнце Рэспублікі Беларусь (2014)

Біяграфія

Нарадзілася 22 верасня 1971 года ў горадзе Смалявічы Мінскай вобласці^[2].

У 2007 годзе скончыла Мінскі інстытут кіравання па спецыяльнасці «Фінансы і крэдыт», у 2014 годзе — Акадэмію кіравання пры Прэзідэнце Рэспублікі Беларусь па спецыяльнасці «Дзяржаўнае кіраванне нацыянальнай эканомікай»^[2].

Працоўную дзейнасць пачала ў 1994 годзе эканамістам-фінансістам Крупскага каапнарыхтпрама Мінскай вобласці.

У 1994—2007 гадах працавала на розных пасадах у СПК «Раніца-агра», участку «Світанак» РУСВП «Смалявіцкая бройлерная птушкафабрыка» Смалявіцкага раёна.

З 2007 па 2008 гадах працавала ў Інспекцыі Міністэрства па падатках і зборах па Заводскім раёне горада Мінска, камунальным унітарным прадпрыемстве «Упраўленне дарожна-маставога будаўніцтва і добраўпарадкавання Мінгарвыканкама».

З 2008 года па 2018 год працавала ў Смалявіцкім раённым выканаўчым камітэце: выконваючым абавязкі начальніка, начальнікам аддзела эканомікі, намеснікам старшыні па эканамічных пытаннях.

18 лютага 2018 года была выбрана дэпутатам Мінскага абласнога Савета дэпутатаў 28-га склікання па Пекалінскай выбарчай акрузе № 21. За яе кандыдатуру было пададзена 72,92 % (11 667 галасоў), пры яўцы выбаршчыкаў 70,71 %^[3].

27 лютага 2018 года абрана старшынёй Мінскага абласнога Савета дэпутатаў 28-га склікання^[4].

15 сакавіка 2021 года ўвайшла ў склад Канстытуцыйнай камісіі, якая ў мэтах ажыццяўлення рэзалюцыі шостага Усебеларускага народнага сходу распрацоўвае прапановы па змяненні Канстытуцыі Беларусі і забяспечвае іх усенароднае абмеркаванне^[5]. Дэлегатка VI і VII Усебеларускіх народных сходаў^[2].

Выбрана ў 2024 годзе членам Савета Рэспублікі Нацыянальнага сходу Беларусі 8-га склікання ад Мінскай вобласці (вылучана ад Мядзельскага, Лагойскага і Вілейскага раёнаў). З’яўляецца намесніцай старшыні Пастаяннай камісіі па рэгіянальнай палітыцы і мясцовым самакіраванні^[2].

Узнагароды

Узнагароджана ганаровымі граматамі Нацыянальнага сходу Рэспублікі Беларусь, Міжпарламенцкай асамблеі дзяржаў — удзельніц СНД, Мінскага аблвыканкама, медалём «За бездакорную службу» III ступені, юбілейным медалём «МПА СНД. 30 год»^[2].

Мае падзякі Міністра эканомікі, старшыні Смалявіцкага райвыканкама^[2].