Піт Паўлаў

У Вікіпедыі ёсць артыкулы пра іншых людзей з прозвішчам Паўлаў.

Піт Па́ўлаў, поўнае імя Пётр Паўлаў (нар. 7 лістапада 1966, Слуцк) — беларускі музыкант, удзельнік гуртоў N.R.M., Pete-Paff, GARADzKIJA^[1], PAPARAĆ, Pit Pawlaw.

Піт Паўлаў
Канцэрт «N.R.M.» у Горках, 2011 год
Асноўная інфармацыя
Поўнае імя	Пётр Паўлаў
Дата нараджэння	7 лістапада 1966(1966-11-07) (58 гадоў)
Месца нараджэння	Слуцк, Слуцкі раён, Мінская вобласць, Беларуская ССР, СССР
Краіна	Беларусь
Дзеці	Ян-Вінцэнт Луцэвіч
Альма-матар	Беларускі дзяржаўны ўніверсітэт інфарматыкі і радыёэлектронікі
Музычная дзейнасць
Прафесіі	гітарыст, спявак
Гады актыўнасці	з 1983
Інструменты	гітара і мандаліна
Жанры	рок-музыка, беларуская этнічная музыка
Калектывы	«Мроя», «N.R.M.», «KRIWI», «Pete-Paff», «Garadzkija»
Лэйблы	West Records

Біяграфія

Нарадзіўся ў сям’і вайсковага ўрача і медыцынскай сястры. Дзяцінствам жыў Германіі, дзе бацькі служылі ў складзе Групы савецкіх войск у Германіі, вучыўся ў школе, займаўся спортам — плаваннем, грэка-рымскай барацьбой. Скончыў МРТІ. Служыў у паветрана-дэсантных войсках УС СССР.

З 1994 года — гітарыст гурта «N.R.M.», пасля зыходу з калектыву Лявона Вольскага — вакаліст гурта. Заснавальнік і лідар гуртоў «GARADzKIJA» і «Pete-Paff». У 1999—2005 гадах — удзельнік гурта KRIWI. Стваральнік і кіраўнік ініцыятывы «ЖывыГукOn-line». Грае канцэрты з гуртом Pit Pawlaw.

Актыўна ўдзельнічаў ў пратэстах 2020 года ў Беларусі. Граў перад страйкоўцамі на фабрыках і падчас шэсцяў. Быў адным са стваральнікаў ініцыятывы «Дваравыя канцэрты». Граў болей за сто разоў у мінскіх дварах. Граў разам з гуртом і сольна шмат дабрачынных інтэрнэт канцэртаў у падтрымку палітычных зняволеных.

На сваім YouTube-канале пачаў весці праграму "Як граць гэтую песню", каб падтрымаць музыкаў і навучыць людзей граць песні пратэсту.

На сваім YouTube-канале пачаў весці цыкл праграм PAMIEŽŽA

У 2022 годзе рэлакаваўся ў Варшаву.

Выступаў з канцэртамі разам з гуртамі і сольна ў Кілі (Германія), Стакгольме (Швецыя), Таліне (Эстонія), Рызе (Латвія), Вільні (Літва), Тбілісі, Батумі (Грузія), Капенгагене (Данія), Гаазе (Нідэрланды), Лімасоле (Кіпр)

У 2022 годзе выдаў альбом Pit Pawlaw — Zbroja. Zołata. Kabiety (Зброя. Золата. Кабеты).

Творчы шлях

• студэнцкі гурт «Испорченный понедельник» на базе Мінскага тэхналагічнага інстытута (1983—1985)
• у войску — стваральнік і кіраўнік ВІА «Голубые береты» (1985—1987, але не аднайменны цяперашні гурт)
• гітарыст рок-гурта «Poltergeist» (1990—1992)
• гітарыст гурта «Мроя» (1993—1994)
• гітарыст гурта «N.R.M.» (з 1994)
• гітарыст і вакаліст гурта «N.R.M.» (з 2007)
• гітара, домра, мандаліна — гурт KRIWI (1999—2005)
• стварэнне гурта «GARADzKIJA» (з 2003)
• стварэнне гурта «Pete-Paff» (з 2003)

Удзел у праектах

• «Narodny Albom»
• «Сьвяты вечар 2000»
• «Я нарадзіўся тут»
• Вольныя танцы: слухай сваё (1999)
• Вольныя танцы: альтэрнатыва_by (2001)
• Personal Depeche (2003)
• Viza Незалежнай Рэспублікі Мроя (2003)

Дыскаграфія

• N.R.M. — ŁaŁaŁaŁa (1995)
• N.R.M. — Одзірыдзідзіна (1996)
• N.R.M. — Пашпарт Грамадзяніна N.R.M. (1998)
• N.R.M. — Тры Чарапахі (2020)
• N.R.M. — Дом Культуры (2002)
• N.R.M. — 06 (2007)
• N.R.M. — Д. П. Б. Ч. (2013)
• Народны Альбом (1997)
• Сьвяты Вечар (1999)
• Я нарадзіўся тут (2000)
• Personal Depeche (2003)
• KRIWI За туманам… (1998)
• KRIWI Людзям Live (1999)
• KRIWI Minsk-Berlin (2002)
• PAPARAĆ Pete-Paff - Pahłybleńnie (2003)
• Pit Pawlaw — GARADzKIJA (2003)
• Pit Pawlaw — Zbroja. Zołata. Kabiety. (2022)