Сяргей Анатолевіч Волкаў

У Вікіпедыі ёсць артыкулы пра іншых людзей з прозвішчам Волкаў.

Сярге́й Анато́левіч Во́лкаў (нар. 18 сакавіка 1942, Мінск) — беларускі мастак-графік.

Сяргей Анатолевіч Волкаў
Дата нараджэння	18 сакавіка 1942(1942-03-18) (83 гады)
Месца нараджэння	Мінск, Генеральная акруга Беларусь, Рэйхскамісарыят Остланд
Грамадзянства	Беларусь
Бацька	Анатоль Валянцінавіч Волкаў
Род дзейнасці	графік, шаржыст, мастак-плакатыст
Месца працы	Вожык Вясёлка
Жанр	кніжная графіка, графіка, плакат, станковая графіка і шарж
Вучоба	Мінскае мастацкае вучылішча (1962) Беларускі дзяржаўны тэатральна-мастацкі інстытут (1970)
Уплыў	Людвіг Асецкі, Павел Любамудраў, Арлен Кашкурэвіч
Партыя	КПСС
Член у	Беларускі саюз мастакоў
Узнагароды	Літаратурная прэмія імя Васіля Віткі

Біяграфія

Нарадзіўся 18 сакавіка 1942 года ў Мінску^[1]. Сын мастака Анатоля Волкава, унук мастака Валянціна Волкава^[2]. У 1962 годзе скончыў Мінскае мастацкае вучылішча, а ў 1970 годзе — Беларускі тэатральна-мастацкі інстытут, дзе вучыўся ў Л. Асецкага, П. Любамудрава і А. Кашкурэвіча^[1].

Удзельнічае ў мастацкіх выставах з 1971 года. У 1962—1982 гадах працаваў у часопісе «Вожык», а з 1968 года — у часопісе «Вясёлка»^[1].  

Сябра Беларускага саюза мастакоў з 1973 года^[1], старшыня секцыі графікі ў 1984—1989 гадах. З 1989 года ўваходзіць у аб’яднанне «Верасень», старшыня ў 1989—1992, 1999—2019 гадах.

Сябра праўлення Саюза мастакоў СССР у 1985—1990 гадах.

Член КПСС, быў сакратаром партыйнай арганізацыі Саюза мастакоў БССР.

Творчасць

Працуе ў галіне станковай і кніжнай графікі^[1][2], у тэхніках акварэлі, малюнка, літаграфіі, шаўкаграфіі. З’яўляецца аўтарам станковых серый «Спартыўныя суддзі» (1971), «Працоўны Мінск» (1977), «Армейскія будні» (1979), «Абаронцы роднай зямлі» (1980, 1984), «Начныя палёты» (1982), «Будучыя алімпійцы» (1988) і інш^[1][2]. Аформіў больш за 140 кніг, у тым ліку «Палескія рабінзоны» Я. Маўра (1981), «Спех — курам на смех» Э. Валасевіча (1982), «Пра нашу Дашу» П. Кавалёва, «Беларускія народныя загадкі» (1982)^[1][2], «На двары Алімпіяда» Э. Агняцвет (1984), «Дзед і ўнучка» М. Маляўкі (1984), «Кыонг і яго сябры» У. Карызны (1984)^[2], «Казкі для дзяцей Беларусі» (1995)^[1][2].

Стварыў больш за сто плакатаў і некалькі серый сяброўскіх шаржаў^[2][1], сярод якіх выявы Н. Гілевіча, В. Зуёнка, А. Грачанікава, І. Навуменкі, Р. Барадуліна, І. Чыгрынава^[1].

Творы мастака захоўваюцца ў Нацыянальным мастацкім музеі Беларусі, у фондах БСМ, Музеі сучаснага выяўленчага мастацтва ў Мінску, а таксама ў фондах Міністэрства культуры Расійскай Федэрацыі^[1].

Прызнанне

Удастоены звання Заслужанага дзеяча мастацтваў Беларусі (1989)^[1]. Узнагароджаны медалём Францыска Скарыны (2017)^[3]. Лаўрэат прэміі імя Васіля Віткі (2004).

Зноскі

1. Волкаў Сяргей Анатольевіч // Беларускі саюз мастакоў, 1938—1998 = Belarussian union of artists, 1938—1998 : Энцыкл. давед. / Аўт.-склад.: Б. А. Крэпак і інш.. — Мн.: ВТАА «Кавалер Паблішэрс», 1998. — 663 с. — 3 000 экз. — ISBN 985-6427-09-6.
2. Волкаў Сяргей Анатолевіч // Беларуская энцыклапедыя: У 18 т. Т. 4: Варанецкі — Гальфстрым / Рэдкал.: Г. П. Пашкоў і інш. — Мн. : БелЭн, 1997. — Т. 4. — 480 с. — 10 000 экз. — ISBN 985-11-0035-8. — ISBN 985-11-0090-0 (т. 4).
3. Указ Прэзідэнта Рэспублікі Беларусь № 373 «Аб узнагароджанні» (нявызн.). Национальный правовой Интернет-портал Республики Беларусь (10 кастрычніка 2017).